د ایټالیا پولیسو ویلي، چې د دغه هېواد په سویل کې پر لوی لاس د یوه موټر د سوځولو له کبله د څلورو کرنیزو کارګرانو د مړینې په تړاو یې دوه کسان نیولي دي.

د ایټالیا دولتي ټلویزیون RAI راپور ورکړی، چې قربانیان یو پاکستانی او درې افغانان دي.

د راپور له مخې، نیول شوي دوه کسان هم د پاکستان وګړي دي.

دا پېښه د ایټالیا د سویلي کالابریا ولایت د آمنډولارا سیمې د تېلو په یوه پمپ کې رامنځته شوې ده.

د امنیتي کمرو هغه انځورونه، چې ایټالیايي رسنیو خپاره کړي ښيي، چې شکمنو کسانو د سوځېدو وړ مایع موټر ته اچولې او بیا یې اور وراچولی دی.

د راپور له مخې، یو شکمن هڅه کوله د موټر دروازې تړلې وساتي. په داسې حال کې، چې اور غړانده شوی و. د موټر یوه بله سپرلۍ، چې افغان و؛ پر تېښته بریالی شوی او د سوځېدو د ټپونو له کبله روغتون ته لېږدول شوی دی.

د کاستروویلیاري ښار څارنوال السانډرو ډالسیو تائید کړې، چې د څلورو کسانو جسدونه د دوشنبې پر ورځ د موټر دننه موندل شوي او د دې پېښې په تړاو دوه شکمن کسان نیول شوي دي.

په افغانستان کې د روسیې د سوداګریز مرکز مشر رستم حبیبولین د افغانستان او روسیې ترمنځ د ویزو د لغوه کېدو وړاندیز کړی او څرګندوي، چې دا اقدام به سوداګري، پانګونه او ګرځندوی پیاوړی کړي.

د حبیبولین د څرګندونو له مخې، د مسکو او کابل ترمنځ د اړیکو د پراختیا په پام کې له نیولو سره د دواړو هېوادونو ترمنځ د سفر آسانتیا یو منطقي وړاندیز دی.

هغه د روسیې او افغانستان په اړیکو کې وروستیو پرمختګونو ته هم نغوته کړې، چې د روسیې ولسمشر ولادیمیر پوتین ته د افغانستان د سفیر له لوري د باورلیک وړاندې کول، د روسیې او اسلامي نړۍ په غونډه کې د دواړو هېوادونو د ګډ دولتي کمیسیون لومړنۍ غونډه او د پوځي ـ تخنیکي همکاریو د هوکړه‌لیک لاسلیکول؛ په کې دي. دغه هوکړه‌لیک د یوه نړیوال امنیتي کنفرانس په څنډه کې لاسلیک شو، چې د روسیې د امنیت شورا تر څارنې لاندې جوړ شوی و.

حبیبولین ویلي، چې د پوځي ـ تخنیکي همکاریو دا هوکړه‌لیک په افغانستان کې د روسي تجهیزاتو د ترمیم او بیارغونې پروګرامونه رانغاړي.

د نوموړي د څرګندونو له مخې، افغانستان اوس هم له روسي وسایطو او الوتکو، د «ام آی ـ ۱۷» چورلکو او کاماز موټرو په ګډون؛ کار اخلي.

په افغانستان کې د روسیې د سوداګریز مرکز مشر همدارنګه د افغانستان د انرژۍ او کانونو په سکټورونو کې د روسي شرکتونو د مخ پر زیاتېدونکي حضور یادونه کړې او څرګندوي، چې دغه شرکتونه اوس‌مهال د تېلو د تولید، چاڼ او د کاني زېرمو د استخراج په پروژو کې ونډه لري.