د ایران ولسمشر مسعود پزشکیان ويلي، د امریکا د بندیزونو او د ایران د بحري بندرونو د محاصرې له کبله د دغه هېواد صادرات او واردات نږدې ۳۵ سلنه کم شوي دي.

پزشکیان ویلي، سره له اقتصادي فشارونو؛ ایران له امریکا سره د جون د لنډمهالې هوکړې پر مهال شاوخوا ۹۰ میلیون بېرله تېل پلورلي دي. هغه د دغې هوکړې د بیا پلي کېدا غوښتنه کړې ده.

دغه راز د ایران حکومت ویلي، چې د جګړې او بندیزونو د اقتصادي پایلو مخنیوی یې لومړیتوب دی. د انفلاسیون کمول، د بازار سمبالول، د کار زمینه برابرول، د کورني تولید ملاتړ او له ډالر سره د تړاو کمول د یادو پروګرامونو له ډلې دي.

د راپورونو له مخې، په ایران کې کلنی انفلاسیون تېره میاشت ۶۶ سلنې ته رسېدلی دی. د ایران رهبر هم له حکومته غوښتي، چې د خلکو د اقتصادي ستونزو د کمولو لپاره جدي ګامونه واخلي.

تهران ټینګار کړی، چې د امریکا د فشارونو پر وړاندې به شاتګ ونه‌کړي او خپلې ډیپلوماټیکې هڅې به روانې وساتي. قطر او پاکستان هم د ایران او امریکا ترمنځ د خبرو او هوکړې د بیا پیل لپاره هڅې کړې دي.

د هرمز تنګی اوس هم د تهران او واشنګټن ترمنځ د اختلاف له مهمو موضوعاتو څخه دی.

دغه اوبلاره له جګړې مخکې د نړۍ د شاوخوا ۲۰ سلنې تېلو او مایع ګازو د لېږد لپاره کارېده او ایران وايي، چې د دې لارې کنټرول له دوی سره دی.

رویټرز خبري آژانس راپور ورکړی؛ د قطر لومړی وزیر او د بهرنیو چارو وزیر شیخ محمد بن عبدالرحمن آل ثاني به د پنجشنبې پر ورځ تهران ته سفر وکړي، چې د ډیپلوماسۍ د بیا پیل او د ایران او امریکا ترمنځ د کړکېچ کمولو هڅې له نږدې وڅاري.

قطر له دې مخکې هم د ښکېلو لوریو ترمنځ د منځګړي رول لوبولی او د جون د اوربند په رامنځته کېدا کې یې ونډه لرله.

د ایران بهرنیو چارو وزارت ویاند اسماعیل بقايي ویلي، چې د قطر لومړی وزیر به په خپل سفر کې له ایراني چارواکو سره د قطر د منځګړیتوب د هڅو د دوام او په سیمه کې د وروستیو تحولاتو په اړه خبرې وکړي.

د قطر بهرنیو چارو وزارت د ویاند د څرګندونو له مخې؛ د هرمز تنګي له لارې د بېړیو د تګ راتګ آزادي او د فبرورۍ له اته‌ویشتمې مخکې وضعیت ته بېرته ستنېدل به هم د خبرو له مهمو موضوعاتو څخه وي.

هرمز تنګی د نړۍ د تېلو د لېږد له مهمو لارو څخه دی او اوس هم د تهران او واشنګټن ترمنځ د اختلاف له مهمو موضوعاتو ګڼل کېږي. د رویټرز د راپور له مخې، د دې اوبلارې د کنټرول او له هغې څخه د ترلاسه کېدونکو عوایدو د څرنګوالي په اړه د ایران او عمان خبرې هم روانې دي؛ خو تر اوسه په دې اړه وروستۍ هوکړه نه‌ده شوې.

د پاکستان د پلازمېنې اسلام‌آباد په یوه دولتي روغتون کې د هوا سړولو سیسټم د تخنیکي ستونزې له کبله د اورلګېدنې په پېښه کې لږ تر لږه ۱۵ نوي زېږېدلي ماشومان مړه شوي دي.

د جیو ټلویزیون د راپور له مخې؛ اور د پاکستان د طبي علومو انسټیټیوټ«پمز» په روغتون کې لګېدلی او د اور وژنې چارې اوس هم روانې دي.

د راپور له مخې؛ د اورلګېدنې پر مهال د روغتون د ښځینه ناروغیو په څانګه کې ۱۶ نوي زېږېدلي ماشومان ول، چې یو ماشوم ترې ژغورل شوی دی.