د ملګرو ملتونو سرمنشي انټونیو ګوترش ويلي، د نړۍ په بېلابېلو هېوادونو کې خبریالان اوس هم د رښتیا او حقیقت ویلو له کبله درنده بیه پرې کوي.

ګوترش د خبریالانو پر وړاندې د جرمونو د بې‌سزا پاتې کېدو د پای ته رسولو نړیوالې ورځې پر مناسبت، چې د نومبر پر دوه‌یمه لمانځل کېږي؛ خبرداری ورکړی، چې د خبریالانو پر نښه کول او د هغوی د غږ غلي کول خلک له معلوماتو بې‌برخې کوي او ټول زیانمنوي.

هغه ویلي:« کله، چې خبریالان پر نښه کېږي او د هغوی د راپورونو خپرول بندېږي؛ په حقیقت کې مونږ ټول زیان وینو.»

د ملګرو ملتونو سرمنشي په خپل پیغام کې د خبریالانو لپاره د عدالت پر ټینګښت او د رسنیو د کارکوونکو پر وړاندې د جرمونو د عاملانو د ځواب‌ویلو پر اړتیا ټینګار کړی دی.

د اسلامي امارت رییس‌الوزراء ملا محمدحسن آخوند په ارګ کې د یوې غونډې پر مهال د افغانستان لپاره د بېلاروس د نااستوګن سفیر او ځانګړي استازي الکسانډر اوګوروډنیکوف باورلیک ومانه.

د باورلیک منلو په مراسمو کې د بهرنیو چارو وزیر امیرخان متقي او د رییس‌الوزراء د دفتر عمومي رییس ملا عبدالواسع هم حضور درلود. دواړو لوریو د افغانستان او بېلاروس ترمنځ د سیاسي، اقتصادي او ټرانزیټي اړیکو پر پراختیا خبرې وکړې.

ملا محمدحسن آخوند د نوي سفیر د ماموریت پیل د دواړو هېوادونو په اړیکو کې د نوي پړاو نښه وبلله او هیله یې څرګنده کړه، چې دغه ماموریت به د کابل او مینسک ترمنځ د سیاسي، اقتصادي او ټرانزیټي همکاریو په پیاوړتیا کې مرسته وکړي.

نوموړي زیاته کړې، افغانستان په دې برخو کې هر اړخیزې همکارۍ ته چمتو دی.

دغه راز د بېلاروس نوي سفیر په افغانستان کې د خپل ماموریت له پیلېدا خوښي څرګنده کړه او څرګندوي، چې هېواد یې غواړي له افغانستان سره د کرنې، خوراکي توکو او درملو په برخو کې سوداګري زیاته کړي.

نوموړي همداراز بېلاروس ته د اسلامي امارت د بېلابېلو پلاوو وروستي سفرونه د دواړو هېوادونو ترمنځ د باور پیاوړتیا او د دوه‌اړخیزو اړیکو د پراختیا لپاره اغېزناک وبلل.

اسوشیټډ پرس خبري آژانس د یکشنبې پر ورځ د محکمې د اسنادو د څرګندونو له مخې  راپور ورکړی، چې د امریکا حکومت غواړي په دې هېواد کې نیول شوي یو شمېر افغان کډوال د پاکستان له لارې افغانستان ته ولېږدوي.

د دغو اسنادو له مخې؛ امریکا په پام کې لري، چې د افغان کډوالو د لېږد بهیر د دوشنبې پر ورځ له لوییزیانا ایالت څخه پاکستان ته پیل کړي او وروسته یې افغانستان ته ولېږدوي.

د افغان کډوالو د حقونو مدافع ډلې«افغان ایوک» دغه پرېکړه غندلې او د هغو افغانانو د پخوانیو همکارانو په اړه یې د پایلو خبرداری ورکړی، چې له امریکايي ځواکونو سره یې همکاري کړې وه.

دغه پرېکړه د یو شمېر ډیموکراټو قانون‌جوړوونکو له نیوکو سره هم مخ شوې ده.

ډیموکراټ سناټور ریچارډ بلومنټال ویلي، چې امریکا له هغو افغانانو سره پر کړې ژمنې پښېمانه ده، چې د جګړې پر مهال یې له امریکايي ځواکونو سره همکاري کړې وه.

د ویرجینیا ایالت سناټور ټیم کین هم ویلي: « زموږ افغان همکارانو له امریکا سره د مرستې لپاره خپل هر څه له خطر سره مخ کړل. اوس ټرمپ غواړي د هغوی د کورنیو غړي د طالبانو تر واکمنۍ لاندې افغانستان ته ولېږدوي؛ د هغوی د سرښندنو په بدل کې خیانت کول د شرم وړ دي او په راتلونکو شخړو کې به د امریکا لپاره د مرستې ترلاسه کول خورا ستونزمن کړي.»

له دې مخکې د ټرمپ حکومت د افغانانو د بیا مېشتېدنې هغه پروګرام درولی و، چې د جوبایډن د حکومت پر مهال پیل شوی و.