د کورنیو چارو وزارت درې کسیز پلاوي په چین کې د نړیوال امنیتي کنفرانس له ګډون، د دغه هېواد له امنیتي او اداري مسوولانو او د بېلابېلو هېوادونو له استازیو سره له لیدنو وروسته خپل اووه ورځنی کاري سفر پای ته ورساوه.

د کورنیو چارو وزارت د مقام د دفتر رییس مولوي زین‌الله عابر پر مشرۍ دغه پلاوي د سپټمبر پر اتمه د چین پر رسمي بلنه په لیانیونګانګ ښار کې پیل شوي نړیوال امنیتي کنفرانس کې ګډون کړی و. په دې کنفرانس کې د ۱۲۷ هېوادونو د کورنیو چارو وزیرانو، لوړپوړیو مسوولانو او د نړیوالو امنیتي بنسټونو استازو ګډون کړی و.

پلاوي د کنفرانس په درې واړو برخو کې فعاله ونډه واخیسته؛ د امنیتي موضوعاتو په اړه یې د ګډونوالو ویناوې واورېدلې، له چینايي امنیتي او اداري مسوولانو سره یې کاري ناستې وکړې او د دغه هېواد له امنیتي او شرطې(پولیسو) اړوند ادارو څخه یې لیدنې وکړې.

د کنفرانس په اصلي غونډه کې د کورنیو چارو وزارت د مقام سر یاور عبدالرحیم ثاقب د اسلامي امارت د امنیتي تګلارې، د هېواد د امنیتي وضعیت او په دې برخه کې د لاسته راوړنو په اړه پراخه وینا وکړه. د نوموړي وینا هم‌مهاله د کنفرانس ګډونوالو ته پر څو ژبو وژباړل شوه.

د اسلامي امارت پلاوي د کنفرانس په څنډه کې د چین د عامه امنیت وزارت له امنیتي او تأمیناتي مسوولانو سره هم کاري لیدنه وکړه.

دغه راز یې د متحده عربي اماراتو، لیبیا، تاجکستان، الجزایر، تونس، ایران، سوریې، عراق، پاکستان، یمن او یو شمېر نورو هېوادونو له استازیو سره بېلابېلې لیدنې وکړې.

د سفر پر وروستۍ ورځ دې پلاوي د سوژو ښار د عامه خدمتونو له یوې ادارې څخه هم لیدنه وکړه او وروسته یې په چین کې د اسلامي امارت له سفارت سره پر لیدنه خپل اووه ورځنی کاري سفر پای ته ورساوه.

په دې سفر کې د زین‌الله عابر ترڅنګ عبدالرحیم ثاقب او د کورنیو چارو وزارت د مخابراتو او معلوماتي ټکنالوژۍ لوی رییس محمد ناصري هم ګډون کړی و.

د اسلامي امارت د ویاند مرستیال حمدالله فطرت ويلي، په افغانستان کې د القاعدې په ګډون کومه بهرنۍ ډله شتون او حضور نه‌لري او افغانستان به کومې ډلې ته اجازه ورنه‌کړي، چې د دې هېواد خاوره د بل هېواد پر ضد کار وکاروي.

فطرت وايي، هغه ډلې، چې په تېر کې موجودې وې؛ حضور یې د تېر جهاد او د هغه وخت له اړتیاوو سره تړاو درلود، خو په سیمه کې له لویو بدلونونو وروسته وضعیت بدل شوی او اوس دغه ډلې په افغانستان کې حضور نه‌لري.

د اسلامي امارت د ویاند مرستیال ټینګار کړی، په افغانستان کې د دغو ډلو د حضور د ثابتولو لپاره هم کوم شواهد په لاس کې نشته.

فطرت ویلي:« دغه ادعاوې یوازې مغرضې کړۍ او استخباراتي کړۍ مطرح کوي، چې غواړي افغانستان ناامنه وښيي، په سیمه کې ناامني پراخه کړي او له همدې کبله دا سناریوګانې مطرح کوي.»

د نوموړي د څرګندونو له مخې،« عیني واقعیت دا دی، چې اسلامي امارت وسله‌والو ډلو ته د کوم فعالیت اجازه نه‌ورکوي.»

د اسلامي امارت د ویاند مرستیال په افغانستان کې د بهرنيو ډلو حضور «پروپاګند» بللی او ویلي یې دي: «مونږ دا ډول ادعاوې په کلکه ردوو.»

فطرت یو ځل بیا ټینګار کړی، چې افغانستان به هیچا ته اجازه ورنه‌کړي، چې د دغه هېواد له خاورې د بل هېواد پر ضد کار واخلي.

د اسلامي امارت ویاند ذبیح‌الله مجاهد وايي، حکومت هڅه کوي له سیمه‌ییزو او له سیمې بهر هېوادونو سره د کابل اړیکې نورې پیاوړې او پراخې کړي؛ ځکه، چې بهرنی سیاست یې پر اقتصاد او سیمه‌ییزې نښلېدا ولاړ دی.

مجاهد ویلي، اوسني حکومت په تېرو پېنځه کلونو کې له سیمه‌ییزو او نړیوالو هېوادونو سره پر باور ولاړې اړیکې رامنځته کړې دي.

هغه زیاته کړې، چې افغانستان ته د ځینو هېوادونو د لوړپوړیو چارواکو تګ راتګ او له یو شمېر هېوادونو سره د سوداګریزو اړیکو پراختیا د دغو اړیکو د پراخېدا ښکارندويي کوي.

د اسلامي امارت ویاند ټینګار کړی، چې افغانستان د سیمه‌ییزو همکاریو د پیاوړتیا او د اقتصادي او سیمه‌ییزې نښلېدا د پالیسۍ د پلي کېدا لپاره د ګاونډ او سیمه‌ییزو هېوادونو همکاریو او اغېزمن رول ته اړتیا لري.

مجاهد ویلي، اسلامي امارت هڅه کوي له سیمه‌ییزو هېوادونو سره د کابل اړیکې پراخې او ټینګې کړي.

د بهرنیو چارو وزارت د څرګندونو له مخې، اسلامي امارت اوس په بېلابېلو هېوادونو کې ۴۰ فعالې سیاسي استازولۍ لري.

دغه راز د نړیوالو اړیکو یو شمېر شنونکو ويلي، له نړۍ سره د افغانستان د تعامل پراختیا کولی شي د دې هېواد د سیاسي انزوا په کمېدا، د ډیپلوماتیکو اړیکو په پیاوړتیا، د پانګونې په جلب او په پای کې د اقتصادي ودې له پیاوړتیا سره مرسته وکړي.