د کورنیو چارو وزیر سراج‌الدین حقاني د خوست ولایت په لوی جومات کې د خپلې وینا پر مهال ویلي: هغه څه، چې د امیر له لوري په یوه ټاکلي چوکاټ کې د مسوولانو لپاره ځانګړي شوي؛ ټول د هېواد او ولس په خیر دي.

نوموړي ټینګار کړی، چې د اسلامي امارت مسوولان دغه لارښوونې په بشپړه توګه مني او ځانونه د هغو پلي کېدا ته ژمن بولي.

سراج‌الدین حقاني زیاته کړې؛ اسلامي امارت بې‌پالیسۍ ندی او د واحد مشرتابه تر رهبرۍ لاندې په یوه منظم او جوړ شوي چوکاټ کې پر مخ روان دی.

دا څرګندونې په داسې حال کې وړاندې کېږي، چې د اسلامي امارت چارواکو پر ځلونو د یووالي پر اړتیا، له رهبرۍ اطاعت او د ټاکل شوي چوکاټ په دننه کې د پالیسیو پر سمې پلي کېدا ټینګار کړی دی.

د اسلامي امارت د ویاند مرستیال حمدالله فطرت ویلي، چې د اسلامي امارت رهبر شیخ هبة‌الله آخوندزاده په کندهار ولایت کې د یو شمېر وزارتونو او ادارو د مسوولانو درې‌ورځنی اصلاحي سمینار ته د وینا پر مهال د اسلامي شریعت د اوصولو پر پلي کېدا او رښتیني خدمت ټینګار کړی دی.

د حمد الله فطرت د څرګندونو له مخې؛ د اسلامي امارت مشر په دې غونډه کې ویلي، چې د اسلامي امارت قوانین د اسلام له دین څخه اخیستل شوي او د څو کسانو د شخصي نظر پر بنسټ جوړ شوي ندي.

نوموړي زیاته کړې؛ د نظام د پیاوړتیا لپاره باید ټولې چارې د اسلامي شریعت له اوصولو سره سمې پر مخ یووړل شي.

دغه راز نوموړي ویلي، چې هبة‌الله آخوندزاده په خپلو خبرو کې د یتیمانو، کونډو، معلولانو، بې‌وزلو، کډوالو او بندیانو د حقونو پر اړتیا او ساتنې ټینګار کړی او د دغو قشرونو خدمت، روزنه او پالنه یې د حکومت له اساسي مسوولیتونو څخه بللي دي.

د اسلامي امارت مشر له مسوولانو غوښتي، چې خلکو ته پر اخلاص، شفقت او د اسلامي شریعت پر بنسټ خدمت او د هېوادوالو ستونزو او اړتیاوو ته پوره پاملرنه وکړي.

د کار نړیوالې ټولنې (ILO) په افغانستان کې ۱۵۰ پخوانیو روږدو(معتادینو) ته تخنیکي او کارپنځوونکې زده‌کړې برابرې او ورته یې د بیاهڅېدنې او اقتصادي ځان‌بسیاینې زمینه برابره کړې ده.

دا پروګرام په ۲۰۲۵ کال کې د هېواد د جنوب‌ختیځو سیمو لپاره «له بیاهڅونې ترهڅېدنې: د کارپنځونې او کارموندنې نوښتونه» تر سرلیک لاندې د ۷۵ ښځو او ۷۵ نرینه‌وو په ګډون پلی شو. د زده‌کړو دا کورسونه په لوګر او غزني ولایتونو کې ترسره شول او د بازار له اړتیاوو سره سم پر مهارتونو راوڅرخېد.

ګډونوالو خپل سوداګریز کاري پلانونه چمتو کړل او ۶۰ غوره کسان یې د نورو مالي مرستو او لارښوونو د ترلاسه کولو لپاره د ملګرو ملتونو د پراختیا پروګرام (UNDP) ته ور وپېژندل.

د کارپنځونې پر زده‌کړو سربېره دې پروژې د کار په بدل کې د پیسو د ورکولو کاري فرصتونو ته هم لاسرسی زیات کړی دی. د بازار ارزونې له مخې؛ ۱۱۰ ګډونوال په بېلابېلو تخنیکي کورسونو کې لکه: لاسي صنایع، د موبایل رغول، برښنايي کارونه، د سولر سیسټمونو لګول، د موټرسایکل  او خیاطي کاري برخو کې شامل شول.

دا نوښت، چې د افغانستان د ځانګړي اماني صندوق (STFA) له لوري تمویلېږي؛ د بیا روږدېدا په مخنیوي، د اقتصادي مقاومت پیاوړتیا او ټولنیز ادغام کې مهم رول لري.

د افغانستان لپاره د کار نړیوالې ټولنې لوړپوړي همغږي کوونکې ټیته حبیاکار ویلي، چې دا پروګرام د بیا‌رغونې او اقتصادي هڅېدنې ترمنځ اړیکه څرګندوي او د مهارتونو او فرصتونو برابرول د پخوانیو روږدو د راتلونکې په بیا جوړونه او د ټولنې د مقاومت په پیاوړتیا کې مرسته کوي.