د افغانستان کرکټ ملي لوبډلې د شل‌آوریزو سیالیو د لړۍ په لومړۍ لوبه کې د سې‌شنبې پر ورځ په شارجه کې زیمبابوی ته د ۳۷ منډو پر توپیر ماتې ورکړه.

افغانستان د لوبې په دولسم آور کې د پنځه لوبغاړو پر سوځېدا یوازې ۶۶ منډې کړې وې؛ خو د اعجاز احمدزي پر توپ‌وهنه د لوبې بهیر بدل شو. هغه یوازې پر ۲۰ توپونو پنځوس منډې وکړې او په پیاوړو ګوزارونو یې د زیمبابوې توپ‌اچوونکي تر فشار لاندې راوستل.

احمدزي او شاهدالله، چې پر ۴۲ توپونو یې ۴۶ منډې کړې وې؛ د افغانستان د منډو د زیاتولو لپاره هڅې وکړې. دغو دواړو لوبغاړو په ۴.۵‌آورونو کې د لوبډلې پر منډو ۶۱ منډې ورزیاتې کړې او افغانستان یې له ستونزمن حالت څخه وایست.

راشدخان هم د توپ‌وهنې په وروستیو شېبو کې وځلېد او په یوازې ۱۰ توپونو یې ۳۰ منډې وکړې، چې څلور شپږیزې او یوه څلوریزه هم په کې وه.

افغانستان د خپل وار تر پای ته رسېدا یو توپ مخکې خپل ټول لوبغاړي له لاسه ورکړل؛ خو بیا یې هم د ۱۷۷ منډو هدف وټاکه.

نیومن نیام‌هوري د زیمبابوی تر ټولو بریالی توپ‌اچوونکی و، چې د ۳۱ منډو په بدل کې یې څلور لوبغاړي وسوځول.

زیمبابوی د ۱۷۸ منډو د هدف په تعقیب کې د افغانستان د منظمو توپ‌اچونو پر وړاندې ستونزې درلودې او د ټولو لوبغاړو پر سوځېدو یې یوازې ۱۴۰ منډې وکړې او لوبه یې وبایلله.

راشدخان د ۲۰ منډو په بدل کې دوه لوبغاړي وسوخول. فضل‌الحق فاروقي هم درې لوبغاړي وسوځول او زیمبابوی لوبدله یې د هدف له پوره کولو راوګرځاوله.

افغانستان په منځنیو آورونو کې د راشدخان او مجیب‌الرحمان پر غوره توپ‌اچونې پر زیمبابوی فشار زیات کړ. مجیب هم دوه لوبغاړي وسوځول.

دا د زیمبابوی پر وړاندې په نړیوالو شل‌آوریزو سیالیو کې د افغانستان شپږمه پرله‌پسې بریا وه.

له دې بریا سره د دواړو لوبډلو ترمنځ په شل‌آوریزو سیالیو کې د افغانستان د بریاوو شمېر ۲۰ ته ورسېد. په داسې حال کې، چې زیمبابوی یوازې دوه لوبې ګټلې دي.

دواړه لوبډلې به د پنجشنبې پر ورځ په دوه‌یمه شل‌آوریزه لوبه کې یو ځل بیا د سیالۍ ډګر ته ووځي.

آریانا راډیو ټلویزیون په افغانستان کې د ۲۰۲۶ کال داکار ځوانانو المپیک سیالیو د ټلویزیوني او ډیجیټلي خپرونو ځانګړي حقونه ترلاسه کړي دي.

دغه سیالۍ به د اوکټوبر له یودېرشمېې د نومبر تر دیارلسمې د سنګال په پلازمېنه کې ترسره شي. دا د المپیک لومړنۍ سیالۍ دي، چې کوربه‌توب یې د افریقا لویه وچه کوي.

په دغو سیالیو کې به د څه باندې ۲۰۰ ملي المپیک کمیټو شاوخوا ۲۷۰۰ لوبغاړي ګډون وکړي. سیالۍ به په داکار، دیامناډیو او سالي ښارونو کې ترسره شي.

د سیالیو پروګرام ۲۵ سپورټي څانګې او د مډالونو ګټلو ۱۵۳ سیالۍ رانغاړي. لوبغاړي به په منډو، لامبو، باسکټبال، سوک‌وهنې، جمناسټیک، بایسکل‌ځغلونې، غېږنیونې، جوډو، تورې‌وهلو، اووه‌کسیز رګبي او ساحلي والیبال کې سیالي وکړي.

د دغو سیالیو شعار« افریقا هرکلی کوي، داکار جشن نیسي» دی. دغه سیالۍ د ځوانو لوبغاړو د وړتیاوو د ښودلو، کلتوري تبادلې او د بېلابېلو هېوادونو د لوبغاړو ترمنځ د ملګرتیا د پیاوړتیا لپاره مهم فرصت ګڼل کېږي.

دغه راز د افغانستان له ۱۸ کلنو ټیټ عمره فوټسال ملي لوبډله هم د سیالیو له پیل مخکې د سنګال پلازمېنې داکار ته رسېدلې ده.

د افغانستان فوټبال فډراسیون ویلي، چې دغه لوبډله به د سیالیو له پیل مخکې شپږ ورځنی روزنیز کمپ ترسره کړي.

د آریانا ټلویزیون له‌خوا د دغو سیالیو ځانګړې خپرونې افغان مینه‌والو ته زمینه برابروي، چې د نړۍ د ځوانو لوبغاړو سیالۍ وګوري او په نړیوال سپورټي ډګر کې د هغوی له کړنو خبر شي.

آریانا ټلویزیون د دغو سیالیو له ټلویزیوني او ډیجیټلي خپرولو سره په افغانستان کې د نړۍ د مهمو سپورټي سیالیو پوښښ پراخوي او هڅه کوي، چې افغان لیدونکي له نړیوالې سپورټي ټولنې سره ونښلوي.

د داکار ځوانانو المپیک سیالیو پرانیست‌غونډه به د اوکټوبر پر یودېرشمه ترسره شي او سیالۍ به د نومبر تر دیارلسمې روانې وي.

مینه‌وال کولی شي د تازه خبرونو، معلوماتو او سیالیو د مهالوېش لپاره د آریانا ټلویزیون خواله رسنۍ وڅاري.