نړۍ
د بایډن کورنيو بحرانونو نړیوال ناورین رامنځته کړی – جمهوري غوښتونکي
د جمهوریت غوښتونکیو یوې څېړنیزې کمېټې په ډاګه کړې، چې د روسیې، افغانستان او انرژي پالیسۍ په اړه د ولسمشر جو بایډن ناکامیو نړیوال ناورین رامنځته کړی دی.
د فاکس نیوز ډیجیټل له یادښتونو ترلاسه شوي معلومات د بایډن د ولسمشرۍ د لومړي کال یو لړ خنډونو ته نغوته کوي او څرګندوي؛ کورنی کړکیچ یې رامنځته کړ، مخالفین یې وهڅول او امریکا یې کمزورې کړه.
د RSC په دې یادښت کې راغلي؛ اوس د جو بایډن کورني بحرانونه د نړیوال ناورین لامل شوي دي.
دغه راز په ډاګه شوې؛ د اوکراین کړکیچ باید د بایډن د تېر کال د ناکامیو په شرایطو کې مطرح شي. په ځانګړې توګه انفلاسیون، له کورنۍ انرژۍ سره جګړه او د افغانستان د جګړې بایلل یې د ماتې سترې بېلګې دي.
هغه یادښت، چې د سې شنبې پر ورځ د دې ټولنې په اړه د جو بایډن له لومړنۍ وینا مخکې خپور شو؛ نوموړی د پوتین پر زړورکولو، پر اوکراین یرغل کولو او له افغانستان څخه بې مسوولیته وتلو پړ ونومول شو او څرګندوي، چې پر روسیې د مخکینیو بندیزونو په مخنیوي کې هم پاتې راغلی دی.
ویل کیږي؛ په افغانستان کې د ۲۰ کلنې جګړې ماتې، په کور دننه د تاوتریخوالي ډېرېدو ډېري امریکایان ناهیلي کړي؛ ځکه، چې بایډن په ټولو جبهو کې ناکام او بېوسه شوی او هغه باید د لرې کیڼ اړخو پرځای جمهوري غوښتونکیو ته مخه کړې وای، چې د ولسمشرۍ په اړه یې ځان له مشورو بې برخې کړ.
نړۍ
د چورلکې په راغورځېدو کې د ایران د ولسمشر مړینې غبرګونونه راوپارول
رویټرز د دوشنبې پر ورځ د چارواکو او دولتي رسنیو له قوله ویلي: د ایران ولسمشر ابراهیم رییسي، چې له اوږدې مودې راپدیخوا د ستر مذهبي مشر ایتالله عليخامنهیي بالقوه ځای ناستی ګڼل کېده؛ د آذربایجان پولې ته څېرمه په غرنۍ سیمه کې د چورلکې د راغورځېدو په پېښه کې مړ شو.
د دې خبر په اړه لاندې غبرګونونه رامنځته شوي دي:
د فلسطين د ادارې مشر محمود عباس، د ترکيې ولسمشر رجب طيب اردوغان، د عراق د کردستان سيمې ولسمشر نيشروان بارزاني، د عرب ليګ، د ماليزيا لومړي وزير، د جاپان حکومت او د وینزویلا ولسمشر په دې اړه پیغامونه خپاره کړي دي.
د چين د بهرنيو چارو وزارت وياند هم په دې اړه خواشيني څرګنده کړې او څرګندوي، چې چينايانو يو ښه ملګری له لاسه ورکړ.
د اروپايي شورا رییس چارلس میشل هم ویلي: اروپایي ټولنه د ولسمشر رییسي او د بهرنیو چارو د وزیر امیر عبداللهیان او د دغه پلاوي له نورو غړیو او سپرلۍ د مړینې له کبله خپله ژوره خواشیني څرګندوي.
د مصر ولسمشر، د لبنان حزب الله، د سریلانکا ولسمشر او د اردن پاچا هم د خواخوږۍ پیغامونه خپاره کړي دي. د پاکستان حکومت یوه ورځنی ماتم او د سوریې حکومت درې ورځنی ماتم اعلان کړی دی.
حماس په یوه خبرپاڼه کې د ایران ستر رهبر علي خامنهيي، د ایران حکومت او د ایران خلکو ته پر دې لوی غم خپله ژوره خواخوږي او پیوستون وړاندې کړی دی.
دوی د ایران د مړ شویو مشرانو ستاینه وکړه او څرګندوي، چې دوی د فلسطینیانو ملاتړ او د اسرائیلو پر وړاندې یې ټینګار کړی او باور یې څرګند کړ، چې د ایران ژورې ریښې لرونکې ادارې د دې توان لري، چې د دې لوی غم پر زغم بریالي شي.
د یمن د حوثيانو د سترې انقلابي کمیټې مشر محمد علي الحوثي په ایکس پاڼه کې لیکلي: مونږ د ایران خلکو، د ایران مشرتابه او د ولسمشر رییسي او ورسره مل پلاوي کورنیو ته د هغوی د مړینې په اړه خپله ژوره خواخوږي او خواشیني وړاندې کوو. له الله پاکه د دوی کورنیو ته د زړه صبر او زغم غواړو. بیشکه مونږ د الله یوو او د هغه لوري ته ورګرځو. د ایران خلک به د پاک الله پر اراده د خپلو خلکو وفادار مشرانو ته وفادار پاتې شي.
د هند لومړي وزیر نرېندرا مودي په ایکس پاڼه کې لیکلي: د ایران اسلامي جمهوریت د ولسمشر ډاکټر سید ابراهیم رییسي پر غمجنه مړینه خواشینی او خواخوږی شوم. د هند – ایران دوه اړخیزو اړیکو په پیاوړتیا کې د هغه ونډه به تل یاده وي. د هغه کورنۍ او د ایران خلکو ته د زړه له کومې تسلیت وایم. هند د غم په دې وخت کې له ایران سره ولاړ دی.
اسلامي امارت هم د خواخوږۍ او خواشینۍ تر څنګ څرګنده کړې، چې په دې سختو شېبو کې د ایران له خلکو سره یوو او د دغې پېښې ټولو قربانیانو ته د مغفرت او د هغوی کورنیو ته د جمیل صبر غوښتنه کوو.
نړۍ
د سعودي او امریکا چارواکو په غزه کې پر جګړه او دوه اړخیزې هوکړې خبرې وکړې
د سعودي عربستان دولتي خبري آژانس د یکشنبې پر ورځ راپور ورکړی، چې د دغه هېواد ولیعهد محمد بن سلمان او د سپینې ماڼۍ د ملي امنیت سلاکار جیک سالیوان په غزه کې د اسرائیلو پر جګړې او دوه اړخیزې هوکړې خبرې اترې کړې دي.
د یوې خبرپاڼې له مخې: د سعودی عربستان په ظهران ښار کې د دواړو هېوادونو ترمنځ د ستراتیژیکو هوکړو د مسودې نیمه وروستۍ بڼه، چې تقریباً د وروستي کېدو په حال کې ده؛ وارزول شوه.
واشنګټن او ریاض د یوې پراخې هوکړې د یوې برخې په توګه د امریکا د امنیتي ډاډ او ملکي اتومي مرستو په اړه خبرې کړي، چې هیله لري د سعودي او اسرائیلو د اړیکو د عادي کیدو لامل شي.
د سعودي ولیعهد او د امریکا د ولسمشر جوبایډن ستر امنیتي سلاکار د اسرائیلو او فلسطینیانو لپاره د دوه دولتونو د حل لارې د موندلو، په غزه کې د حماس پر ضد د جګړې د بندولو او د بشري مرستو د رسولو د اسانتیا په اړه هم خبرې وکړې.
رویټرز د دې میاشتې په پیل کې راپور ورکړی و، چې د بایډن اداره او سعودي عربستان د اټومي هوکړې د وروستي کولو په لټه کې دي. په داسې حال کې، چې د اسرائیل او سعودي اړیکو عادي کول په شک کې پاتې دي.
سپینې ماڼۍ د جمعې پر ورځ څرګنده کړې وه، چې سالیوان به سعودي عربستان او اسرائیلو ته سفر وکړي ، چې د غزې په ګډون د دوه اړخیزو او سیمهییزو مسلو او په سیمه کې د تلپاتې سولې او امنیت د ترلاسه کولو پر هڅو خبرې وکړي.
نړۍ
اروپايي ټولنې روسي رسنۍ هم د بندیزونو په نوملړ کې ورزیاتې کړې
د اروپایي ټولنې هېوادونو د چارشنبې پر ورځ هوکړه وکړه، چې د روسیې څلور دولتي رسنۍ پر تبلیغاتي هڅو تورنې کړي او د دې ټولنې د بندیزونو لاندې ادارو په نوملړ کې یې شاملې کړي؛ ځکه، چې کرملین په مسکو کې لویدیځ خبریالان ګواښلي دي.
د اروپایي ټولنې د ارزښتونو او روڼتیا کمیشنر ورا جوروا په ایکس پاڼه کې څرګنده کړې: د کریملین اړوند څلور تبلیغاتي شبکې هره یوه د اروپا غږ، ریانووستی، ایزویستیجا او روسیسکایا ګزیته د بندیزونو په نوملړ کې اضافه شوې دي.
په نوملړ کې راغلې خپرونو او ورځپاڼې آنلاین رسنۍ دي.
روسیې له دې مخکې اروپايي ټولنې ته د دغې هڅې په اړه خبرداری ورکړی و.
د روسیې بهرنیو چارو وزارت ویاندې ماریا زاخارووا ویلي، کرملین به په مسکو کې له لویدیځو خبریالانو خپل غچ واخلي.
زاخارووا ویلي: که دا اقدامات د روسیې د رسنیو او روسي ژورنالیستانو په وړاندې ترسره شي؛ نو سره له دې، چې لویدیځ خبریالان یې نه غواړي بیا به هم زمونږ د غچ اخیستونکيو هڅو احساس وکړي.
هغې زیاته کړې: مونږ به لویدیځ ته چټک او دردوونکی ځواب ورکړو.
د رویټرز د راپور له مخې؛ اروپايي ټولنې سمدستي پر هغو هڅو څه ندي ویلي، چې په رسنیو کې پلي کیږي؛ خو رسنیو په اروپایي ټولنه کې خپل رسنیزحقونه له لاسه ورکړي دي.
-
سوداگري5 days ago
د صنایعو او سوداګرۍ وزارت چارسمبالي د تاتارستان له ولسمر سره وکتل
-
تازه خبرونه5 days ago
د تورخم لار لنډمهاله تړل کیږي
-
لوبی3 days ago
راشد خان د افغان بیسیم مخابراتي شرکت رسمي سوداګریز سفیر شو
-
تازه خبرونه5 days ago
جاپان د افغانستان له سیلاب ځپلیو سره د بېړنیو مرستو ژمنه وکړه
-
نړۍ5 days ago
اروپايي ټولنې روسي رسنۍ هم د بندیزونو په نوملړ کې ورزیاتې کړې
-
لوبی5 days ago
سرخ پوشان خوافي او سرسبز یاشلر لوبډلې د پرونیو سیالیو ګټونکې شوې
-
تازه خبرونه1 day ago
په افغانستان کې د وروستیو سیلابونو له کبله ۵۴۰ کسان مړه شوي – م.م
-
نړۍ2 days ago
د سعودي او امریکا چارواکو په غزه کې پر جګړه او دوه اړخیزې هوکړې خبرې وکړې