د افغانستان اسلامي امارت ویاند ذبیح‌الله مجاهد د چارشنبې پر ورځ (د مرغومي لسمه) په ایکس پاڼه کې لیکلي، چې په ۲۰۲۵ ز.کال کې د ډیپلوماسۍ او نړیوالو اړیکو په برخه کې د پام وړ پرمختګونه رامنځته شوي دي.

ذبیح‌الله مجاهد زیاته کړې: د روسیې له لوري د اسلامي امارت د رسمیت پېژندلو تر څنګ، د کابینې غړو، چې د ریاست‌الوزرا مرستیالان او وزیران په کې دي؛ ټولټال ۹۹ بهرني سفرونه ترسره کړي دي. دغه سفرونه د اقتصادي، سوداګریزو موخو او د ډیپلوماټیکو اړیکو د پیاوړتیا لپاره شوي دي.

ذبیح‌الله مجاهد زیاتوي؛ تېر کال د افغانستان اسلامي امارت دفاع وزارت د روزل شویو امنیتي ځواکونو شمېر ۱۸۱۰۸۴ ته لوړ کړ. همدارنګه تېر کال په امنیتي، جنایي، سرحدي، لوژسټیکي او نورو برخو کې ۱۰۰۳۰۰ پولیس افسران له روزنې فارغ شوي دي.

دغه راز تېرکال په افغانستان کې ۹ لوی بندونه یا بشپړ شوي او یا تر کار لاندې دي او ۳۴۱ واړه بندونه (چکډيمونه) جوړ شوي، چې اوبه به ورسره کنټرول شي.

نوموړی وایي: تېرکال په هېواد کې ۳۵۲۲۸ روږدي کسان تر درملنې لاندې نیول شوي او عادي ژوند ته را ګرځيدلي دي. همدا راز په لویو ښارونو کې ۱۰۶۶۴ سوالګر راټول، تثبیت او هر بېوسي او فقیر ته ۲۰۰۰ افغانۍ اعانه ټاکل شوې ده.

دغه راز مجاهد ویلي: تېرکال له بهرنیو هېوادونو څخه افغانستان ته دوه میلیون او اته سوه زره ۲۸۰۰۰۰۰ مهاجرین او افغان کډوال بېرته راستانه شوي، چې ډېری یې ځای پرځای شول، د راتګ بهیر یې ښه مدیریت شو، خدمات ورته وړاندې شول او اوس ښارګوټي ورته د توزیع په حال کې دي.

یادې لاسته راوړنې ښيي، چې اسلامي امارت له نړیوالې ټولنې سره همکارۍ پراخې کړي او د افغانستان دریځ یې په نړیواله کچه نور هم  پیاوړی کړی دی.

په ایران کې د پاکستان سفیر محمد مدثر ټیپو له تسنیم خبري سرچینې سره په مرکه کې ټینګار کړی، چې د اسلام‌آباد او کابل ترمنځ د اړیکو لارې تړل شوې ندي او د دواړو هېوادونو ترمنځ د وروستیو ننګونو د حل لپاره خبرې روانې دي.

نوموړي د سیمې اړتیاوو او اقتصادي او تاریخي فرصتونو ته په نغوته کې ویلي: « مونږ په سیمه کې د سولې، پرمختګ او امنیت د پیاوړتیا غواړو او هڅه کوو، چې د پاکستان او افغانستان خلک یو بل ته نږدې کړو.»

په ایران کې د پاکستان سفیر زیاته کړې؛ د اسلام‌آباد بنسټیزه اندېښنه ترهګري ده او پر ضد یې اغېزمنو کړنو ته اړتیا ده؛ ځکه، چې تېر کال پاکستان درانده ځاني زیانونه ګاللي دي.

د تیپو د څرګندونو له مخې؛ د پاکستان او افغانستان ترمنځ همکاري کولی شي په سیمه کې د تلپاتې سولې او پرمختګ لپاره زمینه برابره کړي.

دغه راز هغه ویلي، چې د پاکستان لومړي وزیر مرستیال او بهرنیو چارو وزیر کابل ته په سفر کې د افغانستان له چارواکو سره پراخې لیدنې کړي، چې دوه‌اړخیزې ستونزې حل او له منځه ولاړې شي.

نوموړي ټینګار کړی، چې د افغانستان له خاورې مو اندېښنه مشروع او پر ځای ده.

دا په داسې حال کې ده، چې د افغانستان اسلامي امارت تل د پاکستان تورونه رد کړي او ټینګار یې کړی، چې د افغانستان خاوره به د هیڅ هېواد پر ضد ونه کارول شي او نور هېوادونه هم اړ دي، چې خپل امنیت پخپله ونیسي.

د ملګرو ملتونو د بشري چارو د همغږۍ دفتر(اوچا) ویلي، چې په ۲۰۲۶ کال کې به د افغانستان نږدې نیمايي نفوس یا شاوخوا ۲۱.۹ میلیون کسان بشري مرستو ته اړتیا ولري.

اوچا د سې‌شنبې پر ورځ پخپل خپور شوي راپور کې زیاته کړې، چې دا اټکلي شمېر د ټول نفوس شاوخوا ۴۵ سلنه جوړوي.

بشري ادارې پلان لري، چې په راتلونکي کال کې ۱۷.۵ میلیون کسانو ته مرسته ورسوي او د دې لپاره د مالي اړتیا کچه شاوخوا ۱.۷۱ میلیارډ ډالر اټکل شوې ده.

اوچا د افغانستان په ایکس پاڼه کې لیکلي؛ که څه هم د تېرو کلونو پر پرتله ټولیزې بشري اړتیاوې لږ څه راکمې شوي، خو وضعیت اوس هم ډېر جدي دی.

دې ادارې اوږدمهاله جګړه، اقتصادي کمزوري، بنسټیزو خدماتو ته محدود لاسرسی او د حقونو کمزوري کېدا هغه مهم عوامل یاد کړي، چې د خلکو د زغملو توان یې زیانمن کړی دی.

اوچا ویلي؛ د خوراکي توکو د ناامنۍ زیاتېدا، له پولې هاخوا د خلکو د پراخې بېرته ستنېدا، د اقلیم له کبله رامنځته شویو وچکالیو، پرله‌پسې طبیعي پېښو او له عامه ژوند څخه د ښځو او نجونو سیسټماټیک ایستلو دا بحران نور هم ژور کړی دی.

دې ادارې له نړیوالې ټولنې غوښتي؛ د بشري مرستو ملاتړ دې پیاوړی کړي، چې د وضعیت د خرابېدا مخه ونیول شي او د هېواد پر کچه زیانمن خلک وژغورل شي.

دا خبرداری په داسې حال کې راپورته کېږي، چې امریکا د سې‌شنبې پر ورځ د ملګرو ملتونو د بشري پروګرامونو لپاره د ۲ میلیارډ ډالرو ژمنه اعلان کړی؛ خو څرګندوي، چې راتلونکې مرستې به مشروطې وي او یوازې ۱۷ هېوادونو ته به، چې هایتي، سوریه او سوډان په کې شامل دي څانګړې شي. افغانستان او یمن له دې نوملړه ایستل شوي دي.

امریکايي چارواکو ویلي؛ واشنګټن داسې شواهد لري، چې په افغانستان کې د ملګرو ملتونو ځینې مرستې د اسلامي امارت لاس ته لوېدلي او ټینګار یې کړی، چې د امریکا د مالیه ورکوونکو پیسې به افغانستان او یمن ته د رسېدو اجازه ورنکړي.

بشري مرستندویه بنسټونه خبرداری ورکوي، چې د تمویل دا محدودیتونه ښايي د نړیوالو مرستو کمښت نور هم ژور کړي؛ هغه کمښت، چې له وړاندې یې په افغانستان کې د میندو او ماشومانو د روغتیایي کلینیکونو د تړل کېدا او په نورو ځایونو کې د بې‌ځایه شویو خلکو لپاره د خوراکي مرستو د کمېدا لامل شوې دي.

ملګرو ملتونو خبرداری ورکړی، چې د ماشومانو د مړینې نړیواله کچه ښايي د کلونو له کمښت وروسته یو ځل بیا لوړه شي.