د ملګرو ملتونو امنیت شورا د چارشنبې پر ورځ هغه برید وغانده، چې د افغانستان په پلازمېنه کابل کې پر یوه رسټورانټ شوی، چې له کبله یې د یوه چینایي په ګدون اووه کسانو خپل ژوند له لاسه ورکړ او څو نور ټپیان شول.

د امنیت شورا په خبرپاڼه کې دا برید «یو ناوړه ترهګریز عمل» ګڼل شوی، چې د دوشنبې پر ورځ د مرغومي پر نهه‌ویشتمه د کابل د مرکزي سوداګریزې سیمې شهرنو په یوه رسټورانټ کې ترسره شوی دی.

د دې برید پړه داعش خراسان ډلې منلی، چې له کبله یې شپږ افغان وګړي او یو چینایي ووژل شول او یو شمېر نور کسان د یوه ماشوم په ګډون ټپیان دي.

امنیت شورا د افغانستان او چین له خلکو او حکومتونو سره خپله ژوره خواخوږي څرګنده کړې؛ د قربانیانو له کورنیو سره یې خواشیني شریکه کړه او ټپیانو ته یې د چټک او بشپړې رغېدا هیله وکړه.

امنیت شورا خپل پخوانی دریځ  بیا تکرار کړ او څرګندوي، چې ترهګري په خپلو ټولو بڼو کې اوس هم د افغانستان او نړۍ سولې او امنیت ته ګواښ دی.

دې شورا ټینګار کړی، چې د ترهګریزو کړنو ټول مسوولان؛ عاملین، تنظیموونکي، تمویلوونکي او ملاتړ کوونکي باید له پېژندلو وروسته د عدالت منګولو ته وسپارل شي.

د دې شورا په خبرپانه کې له ټولو هېوادونو وغوښتل شول، چې د نړیوالو قوانینو او د ملګرو ملتونو د امنیت شورا له پرېکړه‌لیکونو سره سم د ترهګرۍ پر وړاندې له اړوند چارواکو سره همکاري وکړي.

د شورا غړو یو ځل بیا ټینګار وکړ، چې د ترهګرۍ ټول اعمال جنایي او د توجیې وړ ندي. که هر ډول انګېزه یا شرایط ولري. دې شورا د ملګرو ملتونو د منشور، نړیوالو قوانینو، د کډوالو نړیوال قانون او نړیوال بشردوستانه قانون پر بنسټ د نړیوالې سولې او امنیت د ګواښونو د مخنیوي پر اهمیت ټینګار وکړ.

د افغان چارواکو د څرګندونو له مخې؛ دا چاودنه د کابل په یوه چینایي رسټورانټ کې شوې ده. د پولیسو ویاند خالد ځدراڼ ویلي، چې دا چاودنه پر ځايي وخت شاوخوا د مازدیګر پر درې بجو رامنځته شوې او د پېښې د لاملونو په اړه څېړنې اوس هم روانې دي.

د افغانستان برښنا شرکت خبر ورکړی، چې چینایي پانګه‌وال په کابل او یو شمېر ولایتونو کې له ډبرو سکرو څخه د شاوخوا ۴۰۰ میګاواټ برښنا د تولید په برخه کې پانګونه کوي.

د افغانستان برښنا شرکت د خپرې شوې خبرپاڼې له مخې؛ تېره ورځ د دې شرکت عمومي اجرائیوي رییس عبدالحق همکار د چین د پانګونې کنسرسیوم د شرکت[افغان یوچانګ (AYCC)] له مسوول لوا زونګ‌چوون سره په لیدنه کې له ډبرو سکرو څخه د برښنا د تولید پر پروژو د پانګونې په اړه بحث اوخبرې کړې دي.

الحاج ملا عبدالحق همکار د یاد چینایي شرکت مسوولانو ته د ښه راغلاست ترڅنګ ډاډ ورکړ، چې دا مهال د برښنا د تولید په برخه کې د پانګونې لپاره ټول شرایط برابر شوي او پانګه‌وال کولی شي پر ډاډه زړه د برښنا د تولید او د اړوند بنسټونو د جوړولو په برخو کې پانګونه وکړي.

د چین د کنسرسیوم افغان یوچانګ (AYCC) شرکت مسوول لوا زونګ‌چوون په دې اړه خپل چمتووالی څرګندوي او وایي، چې په کابل ښار کې د ۶۰ میګاواټه برښنا د تولید پر پروژې سربېره به د تخار ولایت د ۳۲۰ میګاواټه برښنا د تولید پر پروژه هم پانګونه وکړي.

هغه زیاته کړې، چې په لومړي پړاو کې به د پلازمېنې کابل د ۶۰ میګاواټه برښنا د تولید پر پروژې پانګونه او عملي کار پیل شي.

دغه راز عبدالحق همکار ویلي، چې د برښنا د تولید د کورنیو سرچینو د پراختیا پروژې به د پخوا پر پرتله پرمختګ ولري او دا مهال هم پر یو شمېر پروژو کار چټک روان دی، چې له بشپړېدا سره به یې د هېواد برښنایي اړتیا تر ډېره پوره او په هېواد کې به د صنعت او سوداګرۍ د ودې لپاره زمینه برابره شي.

دا په داسې حال کې ده، چې د افغانستان برښنا شرکت عمومي رییس عبدالحق همکار له یو شمېر شیوخو او ملي پانګوالو سره په لیدنه کې پر نویو برښنایي پروژو د پانګونې آسانتیاوو د رامنځته کېدا ډاډ څرګند کړی دی.   

د اسلامي امارت د عدلیې وزیر عبدالحکیم شرعي د وزارت د رهبرۍ شورا په غونډه کې ټینګار کړی، چې زمونږ هر کارکوونکی او مسوول دې خلکو ته د خدمت او د نظام د پیاوړتیا پر نیت کار وکړي؛ « د بیت‌المال ساتنه دې وکړي او اسلامي نظام د تجارت نه، بلکې د خدمت وسیله وبولي.»

د سې‌شنبې پر ورځ( د مرغومي دېرشمه ) د عدلیې وزیر عبدالحکیم شرعي پر مشرۍ په دې وزارت کې د اداري او مسلکي مرستیالانو، مرکزي رییسانو، آمرینو او د وزارت نورو کارکوونکو په ګډون یوه ناسته ترسره شوې ده.

په دې ناسته کې د عدلیې وزیر ویلي؛ په نظام کې د مسوولانو تر ټولو اړینه ځانګړتیا تقوا لرل دي؛ ځکه متقي شخص قانع وي او د الله تعالی د رضا لپاره خدمت کوي؛ نه د مادياتو او مادي امتیازاتو لپاره.

هغه دا هم څرګنده کړې؛ اسلامي نظام باید د هر کارکوونکي او مسوول لپاره د خدمت ذریعه وي او د یوې سوداګرۍ په څېر باید ونه‌ګڼل شي.

نوموړي زیاته کړې: د عدلیې وزارت ټول کارکوونکي دې د صداقت، دیانتدارۍ او امانتدارۍ له مخې کار کوي؛ د بیت‌المال ساتندوی دې وي، د نظام د پیاوړتیا لپاره ورته کار اړین دی او د نظام د حیثیت ساتنه یې باید لومړیتوب وي.

ویل کیږي، چې په عدلیې وزارت او د ځمکو له غصب څخه د مخنیوي په کميسیون کې یې د مسوولیت د پرمخ وړلو موخه یوازې د نظام پیاوړتیا او د شریعت تطبیق دی؛ ځکه، چې د دې لپاره مو کلونه قربانۍ ورکړي دي.