د ازبکستان د ولسمشر سلاکار مرستیال افغانستان ته په خپل سفر کې د افغانستان بهرنیو چارو وزارت د سټراټېژیکو مطالعاتو مرکز له رییس سره د ازبکستان – افغانستان د اړیکو په چوکاټ کې د ګډو اجنډاوو د پرمختګ لپاره د همکاریو پیاوړتیا پر لارو چارو خبرې کړې دي.

د ازبکستان د ولسمشر سلاکار مرستیال جاولون وخابوف په ایکس پاڼه کې لیکلي، چې هغه د افغانستان بهرنیو چارو وزارت د سټراټېژیکو مطالعاتو مرکز له رییس عبدالحی قانت سره په لیدنه کې د دواړو هېوادونو او د سیمې د روانو بدلونونو په اړه د عامه پوهاوي د لوړولو پر ځینو لارو چارو بحث وکړ او په دې اړه یې خپل اندونه وړاندې کړل.

د جاولون وخابوف د څرګندونو له مخې: دواړه لوري لېواله دي، چې خپلې اوږدمهالې سټراټېژیکې موخې په عملي او محسوسو نوښتونو بدلې کړي؛ داسې نوښتونه، چې وکولی شي د دواړو هېوادونو د ثبات پیاوړتیا، سیمه‌ییزو همکاریو پراختیا او ګډو ګټو ته وده ورکړي.

د ایران بهرنیو چارو وزارت مرستیال ویلي: که واشنګټن د بندیزونو د لرې کولو په اړه خبرو ته چمتو وي؛ نو ایران هم چمتو دی، چې له امریکا سره اټومي تړون ته د رسېدا لپاره جوړجاړی وښيي.

د ایران بهرنیو چارو وزارت مرستیال مجید تخت‌روانچی له بی‌بی‌سی سره په تهران کې د مرکې پر مهال ویلي، چې «توپ د امریکا په ډګر کې دی» او که امریکا رښتینې وي؛ نو د تړون لار به اواره شي.

دې ایراني چارواکی دا څرګندونې په داسې حال کې کړي، چې امریکايي چارواکو څو ځله ټینګار کړی؛ دا ایران دی، چې د خبرو بهیر یې ورو کړی دی.

له دې مخکې د امریکا بهرنیو چارو وزیر مارکو روبیو ویلي: ډونالډ ټرمپ غوره ګڼي، چې یوې هوکړې ته ورسېږي؛ خو دا کار له ایران سره «ډېر ستونزمن» دی.

تخت‌روانچي تائید کړې، چې د ایران او امریکا ترمنځ غیرمستقیمې خبرې د عمان پر منځګړیتوب روانې دي او ټاکل شوې، چې بل پړاو یې د سې‌شنبې پر ورځ په ژنیو کې ترسره شي.

هغه دغه خبرې «په ټولیز ډول مثبتې؛ خو د وروستۍ پرېکړې لپاره وختي» یادې کړې.

د نوموړي د څرګندونو له مخې: د ایران وړاندیزدادی، چې د ۶۰ سلنه بډایه شوي یورانیمو کمول، د تهران د جوړجاړي چمتووالی ښيي؛ خو ټینګار یې وکړ، چې د «صفر بډاینې» موضوع د ایران له نظره له اجنډا وتلې او سره کرښه ګڼل کېږي.

د ایران بهرنیو چارو وزارت مرستیال د دې هېواد د توغندويي پروګرام په اړه هر ډول خبرې رد کړي او څرګندوي؛ د ایران دفاعي وړتیا د خبرو موضوع نده.

هغه دا خبرداری هم ورکړی، چې پر ایران هر ډول پوځي اقدام کولی شي سیمه له پراخ بحران سره مخ کړي.

دا په داسې حال کې ده، چې ایران او امریکا دواړه د ډیپلوماټیک حللارې ملاتړ کوي؛ خو متقابل ګواښونه او بې‌باوري اوس هم د خبرو پر بهیر دروند سیوری غوړولی دی.

د بدخشان ولایت په شهربزرګ، یاوان، کوهستان، راغستان، خواهان او ارغنجخواه ولسوالیو کې د زرشویي کانونو د استخراج او په اړوند تخنیکي چارو کې له یو لک څخه زیاتو کسانو ته په مستقیم او غیرمستقیمه توګه د کار زمینه برابره شوې ده.

د کانونو او پټرولیم وزارت د خپرې شوې خبرپاڼې له مخې؛ د زرشویي کانونو فعالیت نه یوازې د خلکو لپاره د کار زمینه برابره کړې، بلکې د سیمې اقتصادي وضعیت یې هم د پام وړ ښه کړی دی.

په خبرپاڼه کې راغلي؛ د دې ولایت اوسېدونکي، چې پخوا له بېکارۍ او اقتصادي ستونزو سره مخ ول اوس د دغو پروژو له لارې د خپل ژوند ورځني عواید ترلاسه کوي.

د خبرپاڼې د څرګندونو له مخې؛ د بدخشان ولایت د کانونو د قراردادي شرکتونو د ټولنیزو خدمتونو څخه تر اوسه د ۱۷ پراختیايي پروژو چارې د ٢٢٣ میلیون افغانیو پر ارزښت پیل شوې، چې په کې د کوکچې سيند له پاسه پر ۵ بنسټیزو پلونو سربېره د سړکونو رغونه د اوبو رسولو شبکې، عامه خدمتونه او نورې پروژې پلې شوې دي.

ویل کیږي، چې د هېواد د کاني زېرمو قانوني استخراج، شفاف مدیریت د دوی  لومړیتوبونه دي.