د کورنیو چارو وزارت په کابل او ولایتونو کې د ترافیکو په ادارو کې د ښي لاسو بې اسنادو او یوې  کلي موټرو د ثبت بهیر پیل کړ.

د ترافيکو د عمومي رياست چارواکو ويلي، د شنبې پر ورځ یې ښي لاسو موټرو ته په مرکز او ولایتونو کې د اسنادو وېش پیل کړ او تر راتلونکیو درې میاشتو به روان وي او بیا به دې موټرو ته لنډمهالي نمبر پلیتونه ورکړشي.

د ترافيکو د عمومي رياست چارواکي وايي؛ دا قانوني اسناد او نبمر پلیتونه د پيسو په بدل کې ورکوي.

د کورنیو چارو وزارت مرستیال محمد نبي عمري ويلي؛ د شنبې پر ورځ یې د اسنادو ورکول پيل کړي او تر درې میاشتو به روان وي.

د ترافیکو  پولیسو عمومي رییس حسیب الله مختار وايي؛ د اسنادو او نمبر پلیتونو د وېش په بدل کې له چټکو او بار وړونکیو موټرو پیسې اخلي.

حسیب الله مختار زیاته کړې؛ هغه موټر، چې مادل یې له دوه زره ټيټ وي استهلاک شوي شمېرل کیږي او د ۲۰۰۰ څخه تر ۲۰۱۰ مادل پورې پر هر سلندر  ۵۳۰۰ افغانۍ او د ۲۰۱۱ څخه تر ۲۰۲۲ پورې پر هر سلندر ۷۰۰ افغانۍ اخیستل کیږي.

دغه راز باروړنکې لارۍ هم له ۲۰۰۰ څخه تر ۲۰۱۰ پورې پر هر سلندر ۶۹۰۰ افغانۍ  او له ۲۰۱۱ څخه تر ۲۰۲۲ پورې پر هر سلندر ۸۹۰۰ افغانۍ د ترافیکو ریاست لخوا اخیستل کیږي.

حسیب الله مختار وایي: په نږدې راتلونکي کې به د دغه رياست دفترونه او څانګې پر برښنايي سیستم سمبال او د تکسي خدمتونه به معیاري پیل شي.

په افغانستان کې د ښې لاس زرګونه موټر ګرځي؛ خو دا، چې لاس یې د افغانستان د ترافیکي سیستم خلاف دی، ارزانه دي، چې تر دې مهاله یې د اسنادو ستونزه بنسټيزه نده حل شوې.