د کورنیو چارو وزارت د ټرافیک پولیسو عمومي ریاست ته د یو شمېر نویو او عصري موټرو د سپارلو اعلان وکړ.

د کورنیو چارو وزارت ویاند عبدالمتین قانع د ټرافیکو عمومي ریاست ته د ۲۸ نویو موټرو د سپارلو په مراسمو کې ویلي، چې وزارت د اسلامي امارت مشرتابه ته وړاندیز کړی، چې د پېښو د مخنیوي لپاره د افغانستان ټول ټرافیکي سیسټم ډیجیټل شي.

هغه زیاته کړې، چې له وروستیو اقداماتو سره، د ټرافیکي پېښو له کبله د مرګ او ژوبلې شمېر، چې پخوا هره ورځ له ۲۸ څخه تر ۳۰ پورې و؛ اوس په میاشت کې نږدې ۲۸ ته راټیټ شوی دی.

د نوموړي د څرګندونو له مخې؛ نوي موټر، چې ځانګړی رنګ، نښې او د ټرافیک پولیسو لپاره خپل اړوند تجهیزات لري؛ په ښارونو او لویو سړکونو کې به د ټرافیکي نظم د ډاډمنولو، د پېښو مخنیوي او خلکو ته د چټکو خدماتو په وړاندې کولو کې اغېزمن رول ولوبوي.

د کورنیو چارو وزارت ویاند عبدالمتین قانع وایي، چې د ټرافیکو ریاست ته د ۲۸ نویو موټرو سپارل د دې بهیر لومړی پړاو و او په راتلونکي کې به ۶۰ نور موټرهم دې ریاست ته وسپارل شي.

د مهاجرینو او راستنېدونکو چارو وزیر مولوي عبدالکبیر په افغانستان کې د ملګرو ملتونو د کډوالۍ د عالي کمیشنرۍ له استازي عرفات جمال سره راستنو شویو افغانانو ته د اړینو مرستو رسولو او په کاري ساحه کې د خنډونو لرې کولو په اړه بحث او خبرې کړې دي.

مهاجرینو او راستنېدونکو چارو وزارت د خپرې شوې خبر پاڼې له مخې؛ په دې لیدنه کې، چې تېره ورځ ترسره شوې عرفات جمال د کډوالو چارو وزارت له همکاریو څخه د مننې تر څنګ ویلي، چې کونړ ته د ورستنو شویو د اړتیا وړ سلګونه خیمې چمتو شوي او ژر به سیمې ته ولیږل شي.

عرفات جمال په نړیواله کچه د بشري مرستو کمېدا ته په نغوته(اشاره ) کې ویلي، چې هڅه کوي د افغان راستنو شویو د لاسنیوي لپاره اړینې مرستې راجلب او بدیلې لارې ولټوي.

د ملګرو ملتونو د کډوالۍ د عالي کمیشنرۍ استازي یادونه کړې، چې ځينې راستانه شوي افغانان مدني اسناد نلري او د اړینو اسنادو په وېش کې یې د ملګرو ملتونو پر همکارۍ ټېنګار وکړ او د څو اړینو مسلو په اړه یې خپل وړاندېزونه وړاندې کړل.

په خبرپاڼه کې راغلي؛ مولوي عبدالکبیر د کډوالو په برخه کې د ملګرو ملتونو له مرستو او همکاریو د څخه د مننې پر مهال ویلي؛ د ژمي له راتګ سره د اسلامي امارت له‌خوا راستنو شویو ته پر خوراکي توکو سربـــېره د نغدي مرستو لړۍ هم پیل شوې، چې نړیوال باید بشري مرستې پر سیاسي مسایلو پورې ونه‌تړي.

ویل کیږي، چې مولوي عبدالکبیر د کډوالو په چارو کې د ملګرو ملتونو ادارو ته د بېلابېلو همکاریو د دوام ډاډ ورکړ او شریکو شویو وړاندېزونو ته یې د رسېدنې ډاډ څرګند کړ.