د روغتیا نړۍوالې ټولنې د ختیځې مډیټرانې سیمې مشرې حنان بلخي افغانستان ته د پولیو د له منځه وړلو د څار پلاوي له څلورم سفر وروسته ټینګار کړی، چې ټولو ماشومانو ته د ژوند ژغورونکو واکسینونو رسول او د هېواد د روغتیايي نظام پیاوړتیا باید لومړیتوب وي.

حنان بلخي په ایکس‌پاڼه کې لیکلي، چې د سفر پر مهال یې له افغان چارواکو، د روغتیايي سکټور له کارکوونکو، نړۍوالو همکارانو او د ملګرو ملتونو له اړوند ادارو سره لیدلي دي.

د نوموړۍ د څرګندونو له مخې؛ د واکسیناسیون د پوښښ پراخول، د لومړنیو روغتیايي خدمتونو پیاوړتیا او د روغتیايي نظام غښتلتیا باید په هم‌مهاله توګه پر مخ ولاړ شي، چې افغانستان د پولیو د له منځه وړنې او د راتلونکو نسلونو د روغتیا ساتنې په برخه کې نور پرمختګ وکړي.

حنان بلخي سره له دې، چې شته ننګونې یې یادې کړې؛ د روغتیايي سکټور د چارواکو او همکارانو له ژمنتیا ستاینه یې وکړه او له پولیو ناروغۍ څخه د پاک افغانستان د رامنځته کولو لپاره یې د همکاریو پر دوام ټینګار وکړ.

د کډوالو په چارو کې د ملګرو ملتونو عالي کمیشنر برهم صالح  ویلي، چې د ۲۰۲۳ز.کال راپدېخوا له شپږ میلیون ډېر افغانان خپل هېواد ته راستانه شوي؛ خو د هغوی راستنېدنه یوازې په بشري مرستو نه حلېږي، بلکې پراخ او پرله‌پسې ملاتړ ته اړتیا لري.

برهم صالح، چې د افغانستان پر سفر بوخت دی؛ په ایکس‌پاڼه کې لیکلي، چې ده او الکسانډر ډي کرو له راستنېدونکو، کوربه ټولنو، ښځو او نجونو سره ولیدل او د افغانستان د خلکو ستونزې او زغم ګوري.

هغه ویلي، چې د افغانستان د راتلونکي بیارغونه ثبات، د ټولو وګړو ګډون او د هېواد د ټولو ظرفیتونو کارونې ته اړتیا لري.

د نوموړي د څرګندونو له مخې، ښځو او نجونو ته د فرصتونو برابرول نه یوازې د هغو بنسټیز حق دی، بلکې د ثبات، هوساینې، د بېوزلۍ د کمښت او د افراطیت د مخنیوي لپاره هم مهم رول لري.

د کډوالو عالي کمیشنر له نړۍوالې ټولنې وغوښتل؛ د بشري مرستو ترڅنګ د راستنېدونکو د ملاتړ، د کار او عاید د فرصتونو، بنسټیزو خدمتونو او پرله‌پسې پراختیا په برخو کې هم پانګونه وکړي، چې راستنېدونکي وکولی شي خپل ژوند بېرته ورغوي او د افغانستان په راتلونکي ثبات کې ونډه واخلي.

ټایمز آف انډیا ورځپاڼې راپور ورکړی، چې په نوي ډیلي کې د جنوبي آسیا پوهنتون د افغانستان له لوري د مالي ونډې د نه‌ورکړې له کبله افغان زده‌کړیالانو(محصلانو) ته د بورسونو ورکړه درولې ده.

د راپور له مخې، د جنوبي آسیا پوهنتون رییس کې‌کې اګروال ویلي؛ دا پرېکړه د بوټان له اعتراض وروسته شوې ده.

د نوموړي د څرګندونو له مخې: بوټان هېواد ټینګار کړی، چې په داسې حال کې افغان زده‌کړیالانو ته د بورسونو روان ساتل، چې افغانستان خپله مالي ونډه نه‌ده ورکړې؛ د هغو غړو هېوادونو پر وړاندې عادلانه نه‌ده، چې په منظم ډول خپله مالي ونډه ورکوي.

د هغو مالي اسنادو له مخې، چې ټایمز آف انډیا ترلاسه کړي؛ افغانستان له ۲۰۲۱ زېږدیز کال راپدېخوا دې پوهنتون ته هیڅ مالي مرسته نه‌ده ورکړې او د دې هېواد وروستۍ ثبت شوې ورکړه په ۲۰۲۰ زېږدیز کال کې ۳۰۷ زره ډالره وه.

د یاد پوهنتون رییس زیاته کړې، د اسلامي امارت له واکمنېدا راوروسته په دې تړاو هیڅ رسمي اړیکه نیول شوې نه‌ده.

هغه ویلي، چې هند د افغانستان اوسنی حکومت پر رسمیت نه‌پېژني؛ نو، ځکه د دې موضوع د حل لپاره د رسمي اړیکو رامنځته کول هم ناشوني وه.

سره له دې، چې بورسونه درول شوي دي؛ خو یاد پوهنتون ویلي، که د افغان چارواکو هوکړه ترلاسه شي، چمتو دی افغان زده‌کړیالان په تېره ښځینه زدهکړ‌یالانو ته انلاین زده‌کړې برابرې کړي.

د جنوبي آسیا پوهنتون رییس کې‌کې اګروال زیاته کړې، که د افغانستان مالي ونډه د کوم غړي هېواد یا بلې ادارې له لوري ورکړ شي؛ نو افغان زدهکړ‌یالانو ته د بورسیو د بېرته پیل امکان هم شته.

د راپور له مخې، د ۲۰۲۶ زېږدیز کال د نوې دورې د جذب لپاره ۲۵ افغانانو د لیسانس او ۶۶ نورو د ماسټرۍ او ډوکتورا پروګرامونو ته غوښتنلیکونه سپارلي وه؛ خو په پای کې هیڅ افغان زده‌کړیال په دې پوهنتون کې نوملیکنه ونه‌کړه.