هند د جاپان په آسیايي لوبو کې د شل‌آوریز کرکټ د پایلوبې پر مهال پاکستان ته پر ۱۹ منډو ماتې ورکړه او د دې لوبو د کرکټ د سرو زرو مډال یې خپل کړ.

هند په ۲۰‌آورونو کې د شپږ لوبغاړو پر سوځېدا ۲۱۱ منډې جوړې کړې. ابېشېک شرما پر ۲۸ توپونو ۶۱ منډې وکړې، چې اووه شپږیزې او درې څلوریزې یې ووهلې.

ټیلک ورما پر ۲۲ توپونو ۵۱ ناسوځېدلې منډې او شیوَم ډوبي پر ۱۵ توپونو ۲۷ منډې وکړې.

پاکستان د منډو پوره کولو په لومړیو کې له ستونزو سره مخ شو او د درې لوبغاړو پر سوځېدا یې ۳۹ منډې لرلې؛ خو حسن نواز پر ۵۱ توپونو ۹۶ منډې وکړې.

پاکستان په ۲۰‌آورونو کې د شپږ لوبغاړو پر سوځېدا ۱۹۲ منډې جوړې کړې او هند د ۱۹ منډو پر توپیر بریا خپله کړه.

دا پر پاکستان د هند پرله‌پسې اوومه شل‌آوریزه بریا ده. هند تر دې دمه د دواړو لوبډلو له ۱۸ شل‌آوریزو سیالیو ۱۴ ګټلي دي.

هند په ۲۰۲۲ز.کال کې د چین د آسیايي لوبو د کرکټ له بېرته شاملېدا وروسته هم د سرو زرو مډال ګټلی و او دا یې په نرینه‌وو شل‌آوریز کرکټ کې پرله‌پسې دوه‌یم د سرو زرو مډال دی.

د ۲۰۲۶ز،کال آسیايي لوبې نن یکشنبه د تلې دولسمه / د اوکټوبر څلورمه د جاپان په آیچي-ناګویا کې پای ته رسېږي. ټاکل شوې، چې د آسیايي لوبو راتلونکې سیالۍ پر ۲۰۳۰ز.کال په قطر کې ترسره شي.

د افغانستان فوټبال مینه‌وال کولی شي نن( چارشنبه د وږي څلورمه / د اګست شپږویشتمه) د کابل پر وخت د شپې ۱۱:۱۵ له آریانا ټلویزیون څخه د ټوټنهام هاټسپر او چارلټن اټلټیک لوبه پر ژوندۍ بڼه وګوري.

دواړه لندنۍ لوبډلې د ای‌اف‌ال جام په دوه‌یم پړاو لوبه کې سره مخامخ کېږي؛ ټوټنهام هڅه کوي بل پړاو ته لار ومومي، خو چارلټن غواړي د انګلستان د غوره لیګ پر سیالې لوبډلې بریا خپله کړي.

ټوټنهام د کاغذ پر مخ د دې لوبې غوره لوبډله بلل کېږي او په غوره لیګ کې د دې لوبډلې تجربه ښايي د سیالۍ په ګټلو کې ورسره مرسته وکړي؛ خو د جام سیالۍ د ناڅاپي پایلو لپاره هم مشهورې دي او چارلټن له هر رامنځته شوي فرصت څخه د ګټې اخیستو هڅه وکړي.

دا لوبه ټوټنهام ته د دې پړاو په پیل کې د ډېرې همغږۍ او بریاوو د لړۍ د رامنځته کولو بل فرصت برابروي. په داسې حال کې، چې چارلټن به له دې لوبې د انګلستان له یوه ستر کلب سره د خپلې وړتیا د ازمېښت لپاره کار واخلي.

ای‌اف‌ال جام د انګلستان فوټبال په بېلابېلو کچو کې د لوبډلو لپاره د اتلولۍ د ګټلو له مهمو لارو څخه دی او لوبډلې هڅه کوي له هر پړاو څخه تېرې شي او د ویمبلي لوبغالي تر پایلوبې ځان ورسوي.

افغان فوټبال مینه‌وال کولی شي نن شپه د کابل پر وخت له ۱۱:۱۵ څخه د آریانا ټلویزیون له لارې د ټوټنهام هاټسپر او چارلټن اتلټیک لوبه پر ژوندۍ بڼه وګوري.

د فوټبال نړیوال فډراسیون(فیفا) د ۲۰۲۶ فوټبال نړیوال جام د تنظیم او ترسره کېدا په اړه بېلابېل اړخونه څرګند کړي او دغه سیالۍ یې د تاریخ تر ټولو ستره سپورټي پېښه بللې ده.

د ۴۸ لوبډلو نړیوال جام په کاناډا، مکسیکو او امریکا کې ۳۹ ورځې روان و. په دغو سیالیو کې ۱۰۴ لوبې د ۱۶ کوربه ښارونو په لوبغالو کې ترسره شوې.

د فیفا د څرګندونو له مخې، ۱۲۴۸ لوبغاړو په دې سیالیو کې ګډون کړی و او د لوبغالو ټولیز حضور له ۶.۸ میلیون اوښتی و.

فیفا ویلي، د دغو سیالیو ترسره کول بې‌ساری عملیاتي او لوژستیکي بهیر و. د شمالي امریکا پر کچه ۶۴۵ رسمي مرکزونه فعال ول او نږدې ۳۰۰ زره تصدیق شویو کسانو د سیالیو په بېلابېلو برخو کې دندې ترسره کولې.

له ۴۳ زره ډېر رضاکاران، ۷۳زره او ۷۰۰ امنیتي پرسونل او د ۱۰۴ هېوادونو ۲۵۰۰ د فیفا کارکوونکو د سیالیو د منظمو ترسره کېدو لپاره کار کړی دی.

د امنیتي چارو په برخه کې له یو میلیون څخه ډېر کاري پړاوونه ترسره شوي او د تصدیق سیسټمونو د سیالیو په بېلابېلو ځایونو کې له پېنځه میلیون ډېر ثبتونه او پلټنې ترسره کړې دي.

د درې هېوادونو ترمنځ د لوبډلو او چارواکو تګ راتګ هم ستره لوژسټیکي ننګونه وه. فیفا د سیالیو پر مهال د لوبډلو ۱۱زره او ۳۳۷ ځله تګ راتګ ثبت کړی دی.

همداراز د لوبغالو او چمتووالي ډګرونو لپاره شاوخوا ۳۰۰زره مټرمربع ځانګړی چمن کارول شوی دی.

د رسنیو فعالیتونه هم په پراخه کچه ترسره شوي دي.

د امریکا د ډالاس په ښار کې د خپرونو نړیوال مرکز د نړیوال ټلویزیوني پوښښ اصلي مرکز و. د تولید ډلو نږدې پېنځه زره کامرې کارولي او له ۲۴زره ډېر بېلابېل مطالب یې چمتو کړي، چې ټولې لوبې نړیوالو لیدونکو ته ورسوي.

فیفا د مینه‌والو د خدمتونو او د لوبغالو د فعالیتونو شمېر هم خپور کړې دي.

د سیالیو پر مهال په لوبغالو کې نږدې ۶۷۵زره هاټ‌ډاګونه، له ۴.۶ میلیون ډېر نرم څښاک او بوتلي اوبه پلورل شوې دي.

له لوبغالو بهر د فیفا د مینه‌والو جشنونو ته په شمالي امریکا کې له ۹ میلیون ډېر کسان ورغلي دي. همداراز د «له تګ مخکې پوه شئ» تر سرلیک لاندې د معلوماتي پروګرام له لارې تر ۲۳۰۰ ډېر واټساپ پیغامونه او ۷.۷ میلیون برېښنالیکونه مینه‌والو ته لېږل شوي دي.

فیفا ویلي، دغه شمېر د پراخ شوي نړیوال جام د تنظیم د کچې او پېچلتیا یوه انځور وړاندې کوي. د یاد بنسټ د څرګندونو له مخې، دا لومړني اړخونه دی او په راتلونکو میاشتو کې به نور معلومات او عملیاتي جزئیات هم خپاره شي.