سویلي افریقا  د چارشنبې پر ورځ( د سلواغې دوه‌ویشتمه / د فبرورۍ یوولسمه) په احمدآباد نریندرا مودي لوبغالي کې د شل آوریز نړیوال جام د تاریخي سیالۍ پر مهال افغانستان ته له دوه‌یم سوپر آور وروسته د ۵ منډو پر توپیر ماتې ورکړه.

دواړو لوبډلو په ټاکل شویو آورونو کې ۱۸۷ منډې جوړې کړې، چې له کبله یې لوبه سوپر آور ته ولاړه. په لومړي سوپر آور کې افغانستان ۱۷ منډې وکړې او لوبه مساوي پای ته ورسېده.

سویلي افریقا هم په وروستي حساس آور کې دې هدف ته ورسېده او لوبه دوه‌یم تاریخي سوپر آور ته وغځېده.

په پرېکړه‌کوونکي سوپر آور کې سویلي افریقا پر سړه سینه د لوبې بریا خپله کړه او د دې سیالیو یوه نه‌هېریدونکې پایله رامنځته شوه.

دې لوبې تر سخت فشار لاندې د سویلي افریقا د توپ‌اچونې ژورتیا او په وروستیو آورونو کې د هغوی د پر زړه‌پورې توپ‌اچونې ښکارندویي وکړه. په داسې حال کې، چې د افغانستان نه ستړې کېدونکې مبارزې د ۲۰۲۴ ز.کال پایلوبې ته رسېدلې لوبډله تر وروستي بریده ورسوله او د غم او زغم یوه زړه‌راکښونکې بېلګه یې وړاندې کړه.

د افغانستان کرکټ ملي لوبډلې د ۲۰ آوریز نړیوال جام په خپله لومړۍ لوبه کې له نیوزیلینډ څخه د پېنځه ویکټو بر توپیر ماتې وخوړه.

په هغه لوبه کې، چې نن (یکشنبه د سلواغې نولسمه) د هند په چنای شار کې ترسره شوه؛ افغانستان پچه وګټله او لومړی یې د توپ‌وهنې پرېکړه وکړه او د شپږو ویکټو پر له لاسه ورکولو یې ۱۸۲ منډې جوړې کړې.

ګلبدین نایب په ۳۵ توپونو ۶۳ منډې وکړې.

نیوزیلینډ په ۱۷.۵ آورونو کې د ۵ ویکټو پر له لاسه ورکولو اړوند هدف پوره کړ.

افغانستان به د چارشنبې پر ورځ په خپله راتلونکې لوبه کې له سویلي افریقا سره مخ شي.

د  ۲۰۲۶ میلانو– کورټینا ژمنی المپیک، چې له ډېرې مودې راپدېخوا یې پرتمه وو؛ دا دی پیل شوې او د ژمنیو سپورټونو نړیواله لېوالتیا نندارچیانو ته وړاندې کوي. آریانا راډیو ټلویزیون په افغانستان کې ټولې دغه سیالۍ پر ځانګړې بڼه خپروي.

دا لوبې به د پنجشنبې پر ورځ( د سلواغې شپاړلسمه / د فبرورۍ پېنځمه) د کابل پر وخت د شپې پر ۱۱:۰۰ د سنوبورډینګ د یوې زړه‌راکښونکې سیالۍ پر خپروي پیل شي. د سیالیو له پیل مخکې ځانګړې خپرونه به د شپې پر ۱۰:۳۰ وړاندې شي.

دا رسنیز پوښښ د سپورټ مینه‌والو لپاره یو مهم پړاو بلل کېږي؛ ځکه، چې د نړۍ له سترو سپورتي پېښو څخه یوې ته نږدې او بېپرې لاسرسی ډاډمنوي.

له چټکو سنوبورډینګ سیالیو نیولې تر لېوالتیا، هڅو او کلک هوډ پورې، چې غوره لوبغاړي یې په ګنګل او واورو کې نندارې ته وړاندې او په څو اوونیو کې د شور او الهام له لارې د نړیوال یووالي ژمنه کوي.

آریانا ټلویزیون ویلي؛ د دې سیالیو د انحصاري خپرونې موخه دا ده، چې نړیوال سپورټ افغان لیدونکو ته نور هم نږدې کړي او د لوبو له لومړیو شېبو څخه د سپورټي برترۍ او د المپیک روحیه ونمانځي.

په افغانستان کې د ژمنیو سپورټونو له مینه‌وال غوښتنه کیږي، چې د پنجشنبې پر شپه ټلویزیون ته کښېني؛ نه یوازې د ژمنیوالمپیک د لوبو د پیل لیدونکي شي، بلکې د سیالیو د لومړنیو مډالونو د ګټلو شاهدان هم وي.