افغان لوبڅار فاروق‌خان احمدزی د افغانستان او هند ترمنځ د درې شل‌‌آوریزو لوبو د لړۍ په لومړۍ لوبه کې د لومړي ځل لپاره پر نړیواله کچه لوبڅاري وکړه او له دې سره هغه اووم افغان لوبڅار شو، چې په نړیوالو کرکټ لوبو کې لوبڅاري کوي.

احمدزی، چې د افغانستان کرکټ بورډ له مخکښو کورنیو لوبڅارانو څخه دی؛ د سپټمبر پرڅوارلسمه په نوي ډیلي کې د دغو سیالیو د لړۍ په لومړۍ لوبه کې د لوبڅار دنده ترسره کړه.

نوموړی په دې وروستیو کې له یوې ټاکنې وروسته د افغانستان کرکټ بورډ د غوره لوبڅارانو په نوملړ کې شامل شوی و.

فاروق‌خان احمدزی له هغو افغان لوبڅارانو سره یوځای شو، چې په نړیوالو کرکټ لوبو کې یې د لوبڅار دنده ترسره کړې ده؛ په دې ډله کې احمدشاه درانی، احمدشاه پکتین او عزت‌الله ساپی هم شامل دي، چې اوس د کرکټ نړیوالې شورا(ICC) د نړیوالو لوبڅارانو په نوملړ کې دي.

احمدشاه پکتین په دې ډله کې تر ټولو ډېره تجربه لري او په ټسټ، یو ورځنیو او شل‌آوریزو لوبو کې یې لوبڅاري کړې ده.

احمدزی نړیوالې کچې ته له رسېدا مخکې د افغانستان په کورنیو لوبو کې د پام وړ تجربه ترلاسه کړې او په ۳۸ فرسټ کلاس، ۵۹ لیسټ ای او ۷۴ شل‌‌آوریزو لوبو کې یې لوبڅاري کړې ده.

د نوموړي لومړنۍ نړیواله لوبڅاري په یوه مهمه لوبه کې ترسره شوه؛ هغه مهال، چې افغانستان د شل‌آوریزو لوبو د لړۍ په لومړۍ لوبه کې له هند سره مخامخ شو.

د افغانستان کرکټ بورډ احمدزي ته د دې لاسته راوړنې مبارکي ویلې او د نړیوالې لوبڅارۍ په مسلکي بهیر کې یې ورته د ډېرو نورو بریاوو هیله کړې ده.

د یکشنبې پر ورځ د نوي ډیلي په ارون جیټلي لوبغالي کې د هند کرکټ ملي لوبډلې د شل‌آوریزو سیالیو د لړۍ د لومړۍ لوبې پر مهال افغانستان ته د اووه ویکټو پر توپیر ماتې ورکړه.

افغانستان لومړی توپ‌وهنه وکړه او لوبه یې هیله‌ورکوونکې پیل کړه؛ خو د لوبډلې د منډو په منځنۍ برخه کې ناڅاپه پرله‌پسې ویکټې ولوېدې، چې له کبله یې د لوبې لوری د هند پر ګټه واوښت.

افغانستان د یوې ویکټې په بدل کې ۳۸ منډې کړې وې؛ خو په لنډه موده کې یې د پېنځه نورو منډو په بدل کې څلور ویکټې له لاسه ورکړې او ۴۳/۵ ته ولوېد. دې سقوط افغانستان له ستونزمن حالت سره مخ کړ او د سیالۍ وړ هدف ټاکلو چانس یې محدود کړ.

په دې لړۍ کې د افغانستان لوبډلمشر ابراهیم ځدراڼ د ویکټو ترمنځ د منډې وهلو پر مهال د یوې تېروتنې له کبله وسوځېد.

له پېنځه ویکټو وروسته عظمت‌الله عمرزي او محمد نبي هڅه وکړه، چې د افغانستان پاڼۍ بېرته منظمه کړي. عمرزي په حساب شوې او اغېزمنې توپ‌وهنې سره پر ۴۴ توپونو ۶۴ منډې وکړې. نبي هم ۳۳ منډې وکړې او د دواړو لوبغاړو ملګرتیا افغانستان وتواناوه، چې د ۲۰آورونو په پای کې د اته ویکټو په بدل کې ۱۵۶ منډې وکړي.

د هند په توپ‌اچوونکو کې ارشډیپ سینګ  تر ټولو ښه وځلېد او د ۱۹ منډو په بدل کې یې درې ویکټې واخیستې. جسپریټ بومرا هم د چپ زنګون د ټپ له کبله په وروستیو لوبو کې له نشتون وروسته بېرته د هند په لوبډله کې شامل شوی و.

د افغانستان ۱۵۶ منډې د هند د پیاوړې توپ‌وهنې پر وړاندې بشپړې نه‌وې. کوربه لوبډلې د هدف پوره کولو ته پر چټکۍ دوام ورکړ او ابیشک شرما په دې برخه کې مهم رول ولوباوه. هغه یوازې له ۳۲ توپونو ۸۲ منډې وکړې.

د شرما د چټکو منډو له کبله د هند پر وړاندې د پاتې منډو فشار پر چټکۍ کم شو. سره له دې، چې سنجو سامسون د ۱۰ منډو له کولو وروسته وسوځېد؛ هند د لوبې واک له لاسه ورنه‌کړ.

ایشان کیشن هم له ۳۳ توپونو ۴۲ منډې وکړې او له دې سره یې د هند مرسته وکړه، چې ټاکل شوی هدف له جدي فشار پرته پوره کړي. هند په ۱۳.۴آورونو کې هدف پوره کړ او د اووه ویکټو پر توپیر یې لوبه وګټله.

افغانستان اوس فرصت لري، چې د سې‌شنبې پر ورځ د شل‌آوریزو سیالیو د لړۍ په دوه‌یمه لوبه کې د لومړۍ لوبې ماته جبران کړي.

دا لوبه به د آریانا ټلویزیون له لارې پر ژوندۍ بڼه خپریږي.

د افغانستان کرکټ ملي لوبډلې لوبډلمشر ابراهیم ځدراڼ ويلي، لوبغاړي یې له هند سره راتلونکو لوبو ته چمتو دي او په بېلابېلو نړیوالو سیالیو کې د هغوی تجربه به د شل‌آوریزو لوبو پیاوړې برخه وي.

ابراهیم ځدراڼ له هند سره د شل‌آوریزو لوبو له پیل مخکې خبري غونډې ته ویلي، چې د لوبډلې ډېری لوبغاړي په وروستیو میاشتو کې له بېلابېلو سیالیو برخمن ول او له ښه لوبیز چمتووالی او تجربه لري.

نوموړي زیاته کړې، شل‌‌آوریزه بڼه د افغانستان د لوبغاړو لپاره له غوره بڼو څخه ده؛ ځکه هغوی په بېلابېلو نړیوالو سیالیو کې لوبېدلي او له بېلابېلو مهمو سیالیو څخه یې د تجربې ترلاسه کولو ډېر فرصتونه لرلي دي.

د افغانستان لوبډلمشر ویلي:« زمونږ لوبغاړي چمتو دي او په دې بڼه کې ښه وړتیا لري. هغوی په لیګونو او نړیوالو سیالیو کې د لوبېدا ډېره تجربه لري او ډاډه یم، چې د خپل هېواد لپاره به ښې لوبې وکړي.»

ځدراڼ زیاته کړې،  افغانستان تر اوسه په شل‌آاوریزو سیالیو کې هند ته ماتې نه‌ده ورکړې؛ خو لوبډله یې هڅه کوي، چې دا ځل فشار راکم او پر خپلو وړتیاوو داوڅرخیږي او خپله غوره لوبه نندارې ته وړاندې کړي.

نوموړي ویلي؛ د افغانستان موخه دا ده، چې لوبې د ځان لپاره ستونزمنې نه‌کړي او د تېرو پایلو پر ځای پر خپلو شته وړتیاوو ټینګار وکړي.

د افغانستان کرکټ ملي لوبډلې لوبډلمشر له هند میشتو افغان مینه‌والو هم غوښتي، چې د ملي لوبډلې د ملاتړ لپاره د سیالیو نندارې ته ورشي.

هغه ویلي، د مینه‌والو حضور او هڅونه لوبغاړو ته ډېره انرژي ورکوي او ملي لوبډله به په دې سیالیو کې د خپلو هېوادوالو له ملاتړ څخه ډېره خوشحاله شي.

افغانستان هیله لري، چې په نړیوالو لیګونو کې د خپلو لوبغاړو پر تجربه او د مینه‌والو پر پراخ ملاتړ پر تکیه کولو د هند پر وړاندې پیاوړې لوبه وکړي او په دې بڼه کې د لومړي ځل لپاره دې لوبډلې ته ماتې ورکړي.