Connect with us

سیمه ییز خبرونه

په سپين بولدک کې د باروړونکیو موټرو لپاره نارسمي لار پرانستل شوه

خپور شوی

د

(Last Updated On: غبرګولى ۱۰, ۱۴۰۲)

د افغانستان او پاکستان د هوکړې له مخې؛ د سپين بولدک ولسوالۍ د وېش په سيمه کې د ديورند پر فرضي کرښه د باروړونکیو موټرو د تګ راتګ لپاره يوه نارسمي لار پرانستل شوه.

د کندهار ولایت په سپين بولدک ولسوالۍ کې د هېواد پر کچه پر لوی سوداګريز بندر د ورځې سلګونه لوی باروړونکي موټر، چې د کرښې دواړو لوریو ته اوړي او رااوړي؛ ډېره ګڼه ګوڼه جوړه کړې وه او باروړونکي موټر ډېر ځنډېدل، چې د سوداګريزو توکو د خرابېدو او او ناوخته رسېدو سبب ګرځېدل، نو د همدې ستونزې د اوارۍ لپاره افغان او پاکستانيو سوداګرو له حکومتونو څخه د دې ستونزې د حل غوښتنه وکړه، چې په پای کې  پر فرضی کرښه يوه نارسمي لار پرانستل شوه او په سوداګريزو چارو کې یې آسانتياوې رامنځته کړې .

 سوداګر وايي، چې دې لارې دوی ته ډېرې اسانتیاوې برابرې کړې دي.

 د سوداګرو د څرګندونو له مخې؛ پر عمومي لار د ډېرې ګڼې ګوڼې له کبله لوی موټر پر ورځو ورځو  دریدلي وي، خو اوس دا ستونزه حل شوې ده. د لويو موټرو چلوونکي د حکومتونو دا نېک اقدام ستايي او په دې برخه کې د نور پر مختګ هيله من دي .

د سپين بولدک د سوداګرۍ خونې او پانګونې رييس حاجي محمد صديق وایي: له پاکستان سره پرسرحد مو دروازه فعاله او ودروله؛ پرهغه بلې ډېر رش وي، څلور یا پېنځه ساعته به زمونږ ترانزيت موټرو تېرول. د دغې ستونزې د حل لپاره د پاکستان او افغانستان سوداګر سره کېناستل نوې دروازه يې مونږ ته راخلاصه کړه.

پر دې لار د لويو باروړونکیو موټرو چلوونکي د حکومتونو دا کړنه ستايي او وايي، اوس يې تر ډېره د تګ او راتګ په وخت کې ستونزې حل شوي دي.

موټر چلوونکی عبدالجبار وایي: مخکې مونږ ته ډېر مشکلات ول. اوس ان شاالله نه رش شته نه‌شته؛ ښه په امنيت اوړو او ښه په امنیت رااوړو.

د سپين بولدک اوسيدونکي هم په سوداګريزو چارو کې د حکومتونو ترمنځ د نورو مثبتو پرمختګونو غوښتونکي دي او دا کړنه د سوداګريزو چارو د پراختيا لامل ګڼي .

دسپين بولدک اوسيدونکی کمال الدين ویلي: زما په اند که دلته د تجارنو لپاره ستونزې حل شي؛ دوی ته آسانتياوې رامنځ ته شي، دلته به پر زياته کچه خلک تجارت ته وهڅول شي. د سپين بولدک له لارې، چې کوم عايد ۶۰ فيصده یا ۷۰ فيصده و اوس به ۸۰ یا ۹۰ فيصدو ته پورته شي.

د يادونې ده، چې څه موده وړاندې د سويل لويديخې حوزې د سوداګرۍ خونو د مشرانو او د کندهار د اړوند دولتي مسوولينو تر منځ هم د دې حوزې د تازه او وچو ميوو د صادراتو له پيل مخکې د ستونزو پر اواري غونډه جوړه شوې وه، چې دولتي مسوولينو په دې برخه کې د هر راز همکارې ډاډد ورکړی و.

سیمه ییز خبرونه

یو هندي پیلوټ د جیټ الوتکې له نسکورېدو روغ ووت

Published

on

(Last Updated On: کب ۲۳, ۱۴۰۲)

د سې شنبې پر ورځ ( د کب دوه‌ویشتمه) د هند هوايي ځواک تجاس نومې جیټ الوتکه د راجستان ایالت د جیسلمیر اړوند سیمې ته نږدې د روزنیزې الوتنې پر مهال نسکوره شوه.

د هند هوايي ځواک د څرګندونو له مخې؛ د الوتکې پیلوټ له غورځېدو وروسته ژوندی پاتې شو.

تجاس یو سپک سوپرسونیک جنګي الوتکه ده، چې د هند لخوا جوړه شوې او د هند هوایي ځواک او سمندري ځواکونه یې کاروي.

دې جیټ الوتکې په لومړي ځل په ۲۰۰۱ ز. کال کې الوتنه وکړه او په ۲۰۱۶ کې په بشپړه توګه د ماموریت لپاره وکارول شوه.

دا لومړی ځل ندی، چې دا ډول الوتکه نسکوریږي؛ په ۲۰۱۵ کې، تجاس الوتکه د روزنیزې الوتنې پر مهال وغورځېده، چې دوه پیلوټانو په کې خپل خوږ ژوند له لاسه ورکړ.

د هند هوايي ځواک څرګنده کړې، چې د وروستۍ الوتکې د لوېدو د علت په اړه به هر اړخیزه څېړنه وکړي.

Continue Reading

سیمه ییز خبرونه

د پاکستان د مالیې پخوانی وزیر اسحاق ډار د بهرنیو چارو وزیر شو

Published

on

(Last Updated On: کب ۲۲, ۱۴۰۲)

د پاکستان مالیې پخوانی وزیر اسحاق ډار د دوشنبې پر ورځ په داسې حال کې د بهرنیو چارو د وزیر په توګه وګمارل شو، چې مخ پر زیاتېدونکي اقتصادي او امنیتي ننګونې به د پاکستان د بهرنۍ پالیسۍ لومړیتوب وي.

۷۳ کلن ډار یو محاسب او تجربه لرونکی سیاستوال او د پاکستان مسلم لیګ نواز غړی دی.

نوموړی د دغه ګوند د مشر نواز شریف نږدې خپل او د هغه یو له نږدې سلاکارانو څخه هم دی او څلور ځله یې د مالیې د وزیر په توګه کار کړی دی.

اسحاق ډار رویټرز ته ویلي: اقتصادي ډیپلوماسۍ په رښتیا هم د وخت اړتیا ده؛ خو د ډار سیاسي متحدینو تل د هغه د مالي واک په بهیر کې د اقتصاد پر اداره کولو نیوکې کړي دي.  

د نوموړي د ۱۶ میاشتني کار په بهیر کې ۳۸ سلنه انفلاسیون و او د سود کچه ۲۲ سلنې ته لوړه شوې وه، چې پړه یې تر ډېره د نړیوال وجهي صندوق د پالیسو پر اړتیاوو اچول کیږي.

ډار له خپلو کړنو دفاع کړې او څرګندوي، چې هغه باید د پیسو د نړیوال صندوق پروګرام ته د لاسرسي له لارې د حکومت د پورونو د نه ورکولو لپاره سخت ګامونه پورته کړي؛ ځکه، چې عمران خان د دندې له پرېښودو څو ورځې مخکې له منځه یوړل، خو دا تور عمران خان ردوي.

Continue Reading

سیمه ییز خبرونه

اصف علي زرداري بیا د پاکستان ولسمشر شو

Published

on

(Last Updated On: کب ۲۰, ۱۴۰۲)

د پاکستان پخوانی ولسمشر اصف علي زرداري د شنبې پر ورځ د پارلمان او ایالتونو په رای اچونه کې د واکمن ائتلاف پر ملاتړ بیا‌ځلې ټاکنې وګټلې.

په پاکستان کې د ولسمشر رول تر ډېره حده تشریفاتي دی؛ خو زرداري د پخلاینې د مشر په توګه پېژندل کیږي او کولی شي د حکومت له ائتلافي ملګرو سره اجماع ته ورسیږي او د مات شوي اقتصاد د ثبات په لار کې د نړیوال وجهي صندوق د هوکړې په ترلاسه کولو کې مرسته وکړي.

زرداري به د ولسمشرۍ ترڅنګ د هېواد د وسله‌والو ځواکونو عالی قومندان هم وي، چې د حکومتونو په جوړولو یا ماتولو کې پراخ رول لوبوي.

د قضائیه قوې رییس عامر فاروق نوموړی پر ژوندۍ بڼه په ټلویزیوني خپرونه کې ګټونکی اعلان کړ.

د پارلمان د یوې اعلامیې له مخې؛ زرداري ۴۱۱ رایې ترلاسه کړي او ملتپاله مشر محمود خان اڅکزي ته یې، چې ۱۸۱ رایې اخیستې وې؛ مات ورکړه.

ولسمشر د ولسي جرګې او مشرانو جرګې او څلورو ایالتي اسمبلیو د رایو له لارې ټاکل کېږي.

اصف علي زرداري د پخوانۍ لومړۍ وزيرې بې‌نظير بوټو مړه دی، چې د ۲۰۰۷ کال په ډسمبر کې د خپلې میرمنې له وژل کېدو وروسته سياسي دریځ ترلاسه کړ او د پيپلز ګوند واک يې د خپلې خوښې له مخې څرګند کړ. بې‌نظیر بوټو په یو ځانګرګي برید کې وژل شوې ده.

زرداري په ۲۰۰۸ کې ولسمشر شو او تر ۲۰۱۳ پورې یې دنده ترسره کړه. دا هغه پېر و، چې امریکایي ځانګړو ځواکونو د ده تر چتر لاندې په ۲۰۱۱ کې اسامه بن لادن وموند او وواژه.

د زرداري ستره لاسته راوړنه د خپلې لومړۍ دورې په اوږدو کې د واک د غیرمرکزي کولو او د پخوانیو پوځي مشرانو له‌خوا د ولسمشریزو واکونو د مخنیوي لپاره د نوي قانوني او سیاسي چوکاټ د تصویب لپاره نادره سیاسي اجماع رامنځته کول ول.

د رویټرز د څرګندونو له مخې؛ د ۱۹۹۰ لسیزې له پیل څخه تر ۲۰۰۴ پورې هغه د فساد په تورونو کې ۱۱ کاله زندان تېر کړ، چې هیڅکله پرې ثابت نه‌شول، خو هغه او د هغه ګوند یې د پوځ پر ملاتړ سیاسي قرباني بولي. دا هغه تور دی، چې پوځ یې ردوي.

Continue Reading

Trending

Copyright © 2022 Ariana News. All rights reserved!