د ریاست‌الوزرا اقتصادي مرستیال ملا عبدالغني برادر په بلخ ولایت کې د لاجورد استوګنیز ښارګوټی (لاجورد کمپلکس) پروژې د عملي کار د پیل په مراسمو کې ویلي، چې افغانستان هم حق لري معیاري ښارونه، عصري بېخبناوې(زیربناوې) او پرمختللي استوګنیز ښارګوټي ولري.

ملا برادر په دې مراسمو کې زیاته کړې، چې د لاجورد پروژه یوازې د ودانیو ټولګه نه‌ده، بلکې د اقتصادي ودې، ښاري پراختیا، ملي پانګونې د جذب او د راتلونکو نسلونو لپاره د سباوون نښه هم ګڼل کېږي.

د ملا برادر د څرګندونو له مخې؛ په دې پروژه کې به شاوخوا ۱۴۴۸ عصري استوګنیز کورونه له معیاري نقشې او پرمختللیو آسانتیاوو سره جوړ شي، چې خلکو ته خوندي او هوسا ژوند برابر کړي.

د ریاست‌الوزرا اقتصادي مرستیال ټینګار کړی، چې په هېواد کې د سراسري امنیت له ټینګښت وروسته د کورنیو او بهرنیو پانګونو لپاره مناسب فرصتونه برابر شوي او له همدې کبله په بېلابېلو برخو کې سترې اقتصادي پروژې یو پر بل پسې پیلېږي او پرانیستل کېږي.

هغه زیاته کړې؛ لاجورد استوګنیز ښارګوټي ته ورته پروژې کولی شي د بلخ اقتصادي ځایګی د هېواد د یوه مهم تاریخي، فرهنګي، سوداګریز او صنعتي ولایت په توګه پیاوړی کړي او په شمالي زون کې اقتصادي خوځښت رامنځته کړي.

دغه راز ملا برادر ویلي؛ اسلامي امارت په ټول هېواد کې د بېخبنایي، صنعتي، کرنیزو او ښاري پروژو ملاتړ ته ژمن دی او د قوش‌تېپې، سړک جوړونې، برښنا تولید او صنعتي فابریکو ترڅنګ د ښاري پراختیا او ماسټرپلانونو پر پلي کولو هم کار روان ساتلی دی.

هغه د خصوصي سکټور رول د هېواد په اقتصادي وده کې اړین وباله او له سوداګرو او پانګه‌والو یې وغوښتل، چې په افغانستان کې له شته فرصتونو ګټه واخلي او په بېلابېلو برخو کې پانګونه وکړي.

نوموړي دا هم څرګنده کړه؛  بلخ ته د اسلامي امارت د لوړپوړي پلاوي د سفر موخه د ستونزو ارزونه، د پروژو چټکتیا، د بندري خدماتو ښه‌والی او د سوداګرۍ او پانګونې لپاره د ډېرو نورو آسانتیاوو برابرول دي.

په پای کې د ریاست‌الوزرا اقتصادي مرستیال د لاجورد استوګنیز ښارګوټي پروژې پیل د هېواد د آبادۍ پر لور یو مهم ګام وباله او هیله یې څرګنده کړه، چې دا پروژه به د خلکو د هوساینې او اقتصادي ودې لامل شي.

د بلخ ولایت امنیه قومندانۍ ویلي، چې درې کسان یې د ۵۴۰ کیلوګرامه چرسو د قاچاق پر تور نیولي دي.

یادې قومندانۍ په یوه خبرپاڼه کې زیاته کړې، چې دغو کسانو دا کچه نشه‌يي توکي د حیرتان بندر له لارې ازبکستان ته قاچاق کړي وه.

د بلخ امنیه قومندانۍ ویاند محمد عیسی وثیق ویلي، چې دغو کسانو دا نشه‌يي توکي په ماهرانه ډول د یوه کیندونکي ماشین په بدنه کې ځای پر ځای کړي وه او د حیرتان له لارې یې ازبکستان ته لېږدول.

د نوموړي د څرګندونو له مخې، نیول شویو کسانو پخپل جرم اعتراف کړی او له لومړنیو څېړنو وروسته به اړوند ادارو ته وسپارل شي.

د حیرتان بندر د افغانستان له مهمو سوداګریزو دروازو او له منځنۍ آسیا سره د تګ راتګ له اصلي لارو ګڼل کېږي.

د هند کرکټ بورډ د سې‌شنبې پر ورځ د افغانستان پر وړاندې د راتلونکو سیالیو لپاره د خپل هېواد د ټسټ او یوورځنیو لوبډلو د لوبغاړو نوملړ اعلان کړ، چې ټاکل شوې دغه سیالۍ د ۲۰۲۶ ز.کال په جون کې ترسره شي.

د هند کرکټ بورډ د اعلان له مخې؛ شبمن ګېل د ټسټ لوبډلې د لوبډلمشر په توګه ټاکل شوی او کې‌ال راهول به یې مرستیال وي. دغه راز په یوورځنۍ لوبډله کې هم شبمن ګېل د لوبډلمشرۍ مسوولیت پر غاړه لري او شریاس آیر د لوبډلمشر مرستیال ټاکل شوی دی.

د لوبغاړو د نوملړ له اعلان مخکې د جسپریټ بومرا، ریشب پنټ او د ۲۰۲۶ ز.کال د هند په غوره لیګ کې د ځوانو لوبغاړو له ځلېدو وروسته د هغوی پر شاملېدو پراخ بحثونه روان ول.

راپورونه ښيي، چې د لوبغاړو د غوراوي کمیټې مشر اجیټ اګارکر او د هند کرکټ بورډ منشي ډیوا‌جیټ سایکیا دغه سیالۍ د راتلونکو مهمو سیالیو؛ په ځانګړي توګه د ۲۰۲۷ ز.کال یوورځني نړیوال جام لپاره د هند د چمتووالي برخه ګڼي.

سره له دې، چې د افغانستان پر وړاندې ټسټ لوبه د ټسټ نړیوالې اتلولۍ امتیازونه نه‌لري؛ خو هند پرېکړه کړې، چې له پیاوړې لوبډلې سره میدان ته ودانګي او لوبغاړي یې د ټسټ سیالیو له سخت پړاو وړاندې ډېر نور چمتووالی ترلاسه کړي.

په یوورځنیو سیالیو کې هم د هند کرکټ مسوولان هڅه کوي، چې د روهیټ شرما او ویراټ کوهلي په څېر تجربه‌لرونکو لوبغاړو ترڅنګ نوې څېرې هم د راتلونکي لپاره چمتو کړي.

د افغانستان پر وړاندې د هند ټسټ لوبډلې په نوملړ کې د شبمن ګېل، یاشاسوي جیسوال، کې‌ال راهول، سای سوډرشن، ریشب پنټ، ډیوډت پډیکال، نیټیش کمار رېډي، واشنګټن سنډر، کولډیپ یاډاو، محمد سراج، پراسیډ کرشنا، ماناو سوټار، هرپریټ برار او دروو جورل نومونه راغلي دي.

دغه راز د هند د یوورځنۍ لوبډلې په نوملړ کې د شبمن ګېل، شریاس ایر، روهیټ شرما، ویراټ کوهلي، کې‌ال راهول، ایشان کیشان، هارډیک پانډیا، نیټیش کمار رېډي، واشنګټن سنډر، هرش ډوبي، کولډیپ یاډاو، ارشډیپ سنګهـ، پراسیډ کرشنا، پرنس یاډاو او ګورنور برار نومونه راغلي دي.

د اعلان شوي مهالوېش له مخې، د افغانستان او هند ترمنځ ټسټ لوبه به د جون له شپږمې څخه تر لسمې پورې د مولان‌پور ښار په نړیوال لوبغالي کې ترسره شي.

همداراز لومړۍ یوورځنۍ لوبه به د جون پر څوارلسمه په دارمشالا، دوه‌یمه لوبه به د جون پر اووه‌لسمه په لکنهو او درېیمه لوبه به د جون پر شلمه په چنای ښار کې ترسره شي.

د هند کرکټ مسوولانو ویلي، چې دغه سیالۍ د راتلونکو مهمو رقابتونو لپاره د لوبډلې د چمتووالي او په ټسټ او یوورځنیو دواړو برخو کې د لوبډلو بیارغونه رانغاړي.