د فوټبال نړیوال فډراسیون(فیفا) د ۲۰۲۶ فوټبال نړیوال جام د تنظیم او ترسره کېدا په اړه بېلابېل اړخونه څرګند کړي او دغه سیالۍ یې د تاریخ تر ټولو ستره سپورټي پېښه بللې ده.

د ۴۸ لوبډلو نړیوال جام په کاناډا، مکسیکو او امریکا کې ۳۹ ورځې روان و. په دغو سیالیو کې ۱۰۴ لوبې د ۱۶ کوربه ښارونو په لوبغالو کې ترسره شوې.

د فیفا د څرګندونو له مخې، ۱۲۴۸ لوبغاړو په دې سیالیو کې ګډون کړی و او د لوبغالو ټولیز حضور له ۶.۸ میلیون اوښتی و.

فیفا ویلي، د دغو سیالیو ترسره کول بې‌ساری عملیاتي او لوژستیکي بهیر و. د شمالي امریکا پر کچه ۶۴۵ رسمي مرکزونه فعال ول او نږدې ۳۰۰ زره تصدیق شویو کسانو د سیالیو په بېلابېلو برخو کې دندې ترسره کولې.

له ۴۳ زره ډېر رضاکاران، ۷۳زره او ۷۰۰ امنیتي پرسونل او د ۱۰۴ هېوادونو ۲۵۰۰ د فیفا کارکوونکو د سیالیو د منظمو ترسره کېدو لپاره کار کړی دی.

د امنیتي چارو په برخه کې له یو میلیون څخه ډېر کاري پړاوونه ترسره شوي او د تصدیق سیسټمونو د سیالیو په بېلابېلو ځایونو کې له پېنځه میلیون ډېر ثبتونه او پلټنې ترسره کړې دي.

د درې هېوادونو ترمنځ د لوبډلو او چارواکو تګ راتګ هم ستره لوژسټیکي ننګونه وه. فیفا د سیالیو پر مهال د لوبډلو ۱۱زره او ۳۳۷ ځله تګ راتګ ثبت کړی دی.

همداراز د لوبغالو او چمتووالي ډګرونو لپاره شاوخوا ۳۰۰زره مټرمربع ځانګړی چمن کارول شوی دی.

د رسنیو فعالیتونه هم په پراخه کچه ترسره شوي دي.

د امریکا د ډالاس په ښار کې د خپرونو نړیوال مرکز د نړیوال ټلویزیوني پوښښ اصلي مرکز و. د تولید ډلو نږدې پېنځه زره کامرې کارولي او له ۲۴زره ډېر بېلابېل مطالب یې چمتو کړي، چې ټولې لوبې نړیوالو لیدونکو ته ورسوي.

فیفا د مینه‌والو د خدمتونو او د لوبغالو د فعالیتونو شمېر هم خپور کړې دي.

د سیالیو پر مهال په لوبغالو کې نږدې ۶۷۵زره هاټ‌ډاګونه، له ۴.۶ میلیون ډېر نرم څښاک او بوتلي اوبه پلورل شوې دي.

له لوبغالو بهر د فیفا د مینه‌والو جشنونو ته په شمالي امریکا کې له ۹ میلیون ډېر کسان ورغلي دي. همداراز د «له تګ مخکې پوه شئ» تر سرلیک لاندې د معلوماتي پروګرام له لارې تر ۲۳۰۰ ډېر واټساپ پیغامونه او ۷.۷ میلیون برېښنالیکونه مینه‌والو ته لېږل شوي دي.

فیفا ویلي، دغه شمېر د پراخ شوي نړیوال جام د تنظیم د کچې او پېچلتیا یوه انځور وړاندې کوي. د یاد بنسټ د څرګندونو له مخې، دا لومړني اړخونه دی او په راتلونکو میاشتو کې به نور معلومات او عملیاتي جزئیات هم خپاره شي.

د انګلستان فوټبال ملي لوبډلې فرانسې ته ۶ ـ ۴ ماتې ورکولو سره د ۲۰۲۶ز.کال د فوټبال نړیوال جام درېیم مقام خپل کړ.

انګلستان په لومړۍ نیمايي کې څلور ګولونه ووهل؛ ډکلان رایس، ازري کونسا او بوکایو ساکا د دې لوبډلې دوه ګول‌وهونکي وه.

ساکا وروسته د لوبې په اووه‌اتیاایمه دقیقه کې له پنالټۍ خپل درېیم ګول هم وواهه او هټ‌ټریک یې بشپړ کړ.

د فرانسې لپاره کیلیان امباپه په دوه‌یمه نیمايي کې دوه ګولونه ووهل او په دې نړیوال جام کې یې د خپلو ګولونو شمېر ۱۰ ته ورساوه. برادلي بارکولا هم د فرانسې لپاره یو ګول وکړ.

عثمان ډیمبلي د اضافي وخت په شپږمه دقیقه کې د فرانسې څلورم ګول وواهه؛ خو له هغه وروسته جوډ بلېنګهم د انګلستان شپږم ګول د فرانسې دروازې ته واستاوه.

امباپه د آرجنټاین له ستوري لیونېل میسي څخه په دوه ګولونو ډېر د روان نړیوال جام د غوره ګول‌وهونکو په سر کې ځای لري.

نوموړی همداراز له میسي څخه په یو ګول ډېر د نړیوال جام د تاریخ د غوره ګول‌وهونکو په جدول کې هم مخکښ دی. په داسې حال کې، چې میسي د یکشنبې د ورځې په پایلوبه کې د اسپانیې پر وړاندې د لوبېدا لپاره چمتووالی نیسي.

د ارجنټاین فوټبال ملي لوبډلې د لوبې په وروستیو شېبو کې د دوه ګولونو پر وهلو انګلستان ته ۲ ـ ۱ ماتې ورکړه او د فوټبال نړیوال جام پایلوبې ته یې لار وموندله.

انګلستان د دوه‌یمې نیمایي په پیل کې د انټوني ګورډون پر ګول مخکې شو او داسې ښکارېده، چې له ۱۹۶۶ کال وروسته به د لومړي ځل لپاره د نړیوال جام پایلوبې ته لار ومومي؛ خو د اوسني اتل ارجنټاین لوبډلې په وروستیو دقیقو کې د لوبې حالت بدل کړ.

انزو فرنانډز په پېنځه‌اتیاومه دقیقه کې مساوي ګول وواهه او بدیل لوبغاړي لائوټارو مارټینز د اضافي وخت په دوه‌یمه دقیقه کې د لیونل مسي پر پاس د سر پر ضربه د بریا ګول وواهه.

ارجنټاین به د یکشنبې پر ورځ د نړیوال جام په پایلوبه کې د اروپا اتلې اسپانیا پر وړاندې لوبه وکړي. دغه لوبه به د نیوجرسي په «میټ‌لایف» لوبغالي کې ترسره شي. انګلستان به بیا د درېیم مقام د ګټلو لپاره د شنبې پر ورځ له فرانسې سره مخ شي.

د لوبې لومړۍ نیمایي په نږدې سیالۍ کې تېره شوه او دواړو لوبډلو ډېر خطرناک فرصتونه جوړ نه‌کړل؛ خو د دوه‌یمې نیمایي له پیل ۱۰ دقیقې وروسته انګلستان د هري کین په جوړ شوي برید کې د مورګن راجرز د پاس له لارې د انټوني ګورډون پر ګول مخکې شو.

له ګول وروسته ارجنټاین پرله‌پسې بریدونه وکړل؛ خو د انګلستان ګول ساتونکي جورډن پیکفورډ څو ځله ښه دفاع وکړه. نیکو ګونزالس یو ښه فرصت له لاسه ورکړ او د الکسیس مک‌الیسټر توپ د ګول له ستنې سره ولګېد.

بالاخره ارجنټاین په پېنخه‌ایاومه دقیقه کې د مسي د پاس پر مرسته د انزو فرنانډز له ډاډمنې هڅې سره مساوي ګول وواهه. وروسته هم ارجنټاین بریدونو ته دوام ورکړ او مک‌الیسټر یو ځل بیا توپ د ګول له ستنې سره ولګاوه.

وروسته مسي بېرته راغلی توپ ترلاسه کړ او په دقیق پاس یې لائوتارو مارټینز ته موقع برابره کړه، چې نوموړي د اضافي وخت په دوه‌یمه دقیقه کې د سر پر ضربه د بریا ګول وواهه.

ارجنټاین اوس د خپلې اتلولۍ د دفاع لپاره پایلوبې ته چمتو کېږي. په داسې حال کې، چې انګلستان یو ځل بیا د یوې سترې سیالۍ په وروستیو پړاوونو کې د مخکېوالي له لاسه ورکولو له کبله له پایلوبې پاتې شو.