د پنجشیر سیمه‌ییزو چارواکي ويلي؛ د دې ولایت د والي له‌خوا د ۴۵۱ میلیون افغانیو پر ارزښت د پنجشېر او تخار ترمنځ د سړک جوړولو چارې پیل شوې.

د چارواکو د څرګندونو له مخې؛ د پنجشېر- تخار سړک نه یوازې مرکزي ولایتونه له شمال ختیځو ولایتونو سره نښلوي، بلکې اوږده لار لنډوي، ټرانسپورټي لګښت راکموي او نوې ټرانزیټي لار به رامنځته کړي.

چارواکو ویلي؛ پر تخار او پنجشېر سربېره به بغلان، بدخشان، کندوز او نور شمال ختیځ ولایتونه د هېواد له مرکز کابل سره ونښلیږي.

د افغانستان اسلامي امارت د ټولګټو چارو وزارت ویلي؛ د بدخشان- پنجشېر سړک، چې ۲۹۰ کیلومټره اوږدوالی او ۱۰ مټره پلنوالی لري؛ بشپړېدو ته نږدې دی. دغه راز د نورستان- پنجشیر ۱۶ کیلومټره سړک د جوړولو کار بشپړ شوی او په راتلونکي کې د دې ولایت والي د دې سړک د پراخوالي ډاډ ورکړ دی.

د مخابراتو او معلوماتي ټکنالوژۍ وزارت وزیر حمدالله نعماني د افغان بیسیم مخابراتي شرکت له رییس علي الله سروري سره په لیدنه کې د مخابراتي پوښښ پر پراختیا، لرو پرتو سیمو ته د مخابراتي آسانتیاو برابرولو او د کیفیت پر ښه‌کېدا خبرې کړې دي.

د یاد وزارت ویاند عنایت الله الکوزي زیاته کړې؛ په دې ناسته کې د افغان بیسیم مخابراتي شرکت رییس علي الله سروري د خپل شرکت د لاسته راوړنو او فعالیتونو راپور د مخابراتو او معلوماتي ټکنالوژۍ له وزیر سره شریک کړ او وایي؛ اوس د غوره خدمتونو د وړاندې کولو لپاره په پلازمېنه کابل کې پر امتحاني ډول د ۷۴ انټنونو ظرفیت 5G  ته لوړ شوی، چې د اړوند بنسټونو له چمتو کولو او له امتحاني دورې وروسته به یې د هېواد په نورو برخو کې هم پلی کړي.

دغه راز د دې شرکت مسوولانو ویلي، چې د هېواد شمال او جنوب ختیځ ولایتونو ته د مخابراتو او معلوماتي ټکنالوژۍ پخواني وزیر صاحب د سفر پر مهال له منظور شویو انټنونو څخه د ۸ سایټونو چارې بشپړې شوي، یو سایټ د بشپړېدا په حال کې دی او د دوه سایټونو رغنیزې چارې روانې دي او ډېر ژر به یاد ۳ انټنونه هم ګټې اخیستنې ته وسپارل شي.

دغه راز د مخابراتي خدمتونو د تنظیم ادارې د ټي ډي اف ۸ نورو سایټونو منظوري هم وړاندې شوې، چې د اترا ادارې له لوري به یې پر ټاکلې نېټه چارې بشپړې شي.

د  علي الله سروري د څرګندونو له مخې؛ دې شرکت د ۲۰۲۶ز. کال له پیل راپدېخوا ۴۶ سایټونه د خپلې انکشافي بودجې له مخې جوړ او ګټې اخیستنې ته سپارلي او  ۱۸۶ نور یې تر کار لاندې دي.

نوموړي د مخابراتو او معلوماتي ټکنالوژۍ وزارت له وزیر او رهبرۍ څخه د مننې تر څنګ ویلي، چې دې وزارت د چارو په آسانتیا او مخابراتي خدمتونو وړاندې کولو کې یې تل همکاري او لاسنیوی کړی دی.

د یادونې ده، چې په دې ناسته کې د مخابراتو او معلوماتي ټکنالوجۍ وزارت وزیر حمدالله نعماني په اوسني عصر کې د اړیکو او ارتباطاتو تر ټولو مهمه او بنسټیزه برخه مخابرات یاد کړل او ټینګار کوي، چې د مخابراتي سکټور د ښه‌کېدا او ودې لپاره به له مخابراتي شرکتونو سره ګډې هلې ځلې روانې وساتي او هڅه کوي، چې په هېواد کې د پرمختللې ټکنالوژۍ پر کارولو هېوادواولو ته با کیفیته خدمات وړاندې شي.

ویل کیږي، چې په ټولو قانوني برخو کې به د یاد وزارت او مخابراتي شرکتونو ګډه همکاري روانه وساتل شي.

د افغانستان اسلامي امارت د ریاست الوزراء د دفتر عمومي رییس ملا عبدالواسع تېره ورځ د افغانستان لپاره د بریټانیا له ځانګړي استازي ریچارډ لینډزي سره د بشري مرستو د آسانه لېږد د خنډونو پر لرې کولو بحث او خبرې کړې.

په دې کتنه کې، چې په ارګ کې ترسره شوې ریچارډ لینډزي افغانستان ته په‌خپل سفر د خوښي څرګندولو ترڅنګ پر افغانستان د پاکستاني پوځي رژیم په وروستیو توغندیزو بریدونو کې پر اوښتو ځاني تلفاتو د تسلیت وړاندې کولو تر څنګ ویلي؛ تاوتریخوالی باید ختم شي او پر باور جوړولو باید زیات کار وشي.

د افغانستان لپاره د بریټانیا ځانګړي استازي د اسلامي امارت له سوله ییز دریځ مننه کړې اوڅرګندوي؛ پاکستاني لوري ته یې دا پیغام رسولی، چې د باور جوړولو هڅه وکړي او دواړه لوري باید د صمیمیت فضا د رامنځته کولو لپاره مثبت ګامونه واخلي.

هغه زیاته کړې؛ جنګ دواړو خواو ته ستونزې او ناامیدي رامنځته کوي، د تاوتریخوالي د پای ته رسولو لپاره باید زړورتیا او سیاسي اراده وښودل شي.

نوموړي ټینګار کړی، چې د پاکستان له لارې دې افغانستان ته د بشردوستانه مرستو لېږد ته اجازه ورکړل شي.

د ریاست الوزراء مقام د دفتر عمومي رییس د افغانستان لپاره د بریټانیا ځانګړي استازي د تسلیت او د ستونزو د حل په موخه د نوموړي له هڅو د مننې ترڅنګ د کونړ ولایت په مرکز اسعدآباد کې پر پوهنتون او د استوګنې پر کورونو د پاکستاني پوځیانو وروستي بریدونه وغندل.

ملا عبدالواسع ویلي؛ د ملکي خلکو په ځانګړي توګه د مېرمنو، کوچنیانو او استوګنې کورونو پر نښه کول هیڅ راز توجیه نه‌لري. مونږ نه تجاوز کړی او نه هم د تاوتریخوالي پلویان یوو؛ خو د افغانستان له حریم، ځمکني بشپړتیا او افغانانو څخه دفاع زمونږ مسلم حق دی.

نوموړي د افغانستان لپاره د بربریټانیا ځانګړي استازي او ټولو هغو دوستو هېوادونو او ارګانونو څخه، چې د دواړو هېوادونو ترمنځ د شخړې ختمولو هڅې کوي د حقایقو د درک غوښتنه وکړه او وایي؛ مقصر لوری باید ملامت شي.

هغه ټینګار کړی، چې اسلامي امارت تل له پاکستان سره د تاوتریخوالي پای ته رسول او د دوستانه اړیکو پیاوړي کول غوښتي؛ خو مونږ هیچاته اجازه نه‌ورکوو، چې د افغانستان خاوره د نورو پر ضد وکاروي.

ملا عبدالواسع په تېرو څلور لسیزو کې له افغان مهاجرینو د پاکستان کوربتوب ته په نغوته(اشاره) کې ویلي؛ افغان مهاجرینو د هجرت پر مهال د پاکستان اصول او قوانین مراعت کړي، پاکستانی لوری دې هم د مهاجرینو حقونو ته پابند واوسي او افغانانو ته دې ضرر نه‌رسوي.

نوموړی وایي: سوداګریزي او ټرانزیټي اړیکې او د بشردوستانه مرستو لېږد باید د سیاسي مسایلو تر اغېز لاندې را نه‌وستل شي. مونږ د بشري مرستو د لېږد په برخه کې خنډونه نه‌دي رامنځته کړي؛ که پاکستان د شخړو ختمولو لپاره یو ګام اخلي، اسلامي امارت به دوه ګامه واخلي.