د افغانستان د سولې لپاره د امریکا ځانګړي استازي زلمي خلیلزاد ویلي، له طالبانو سره یې په خبرو کې پر څلورو مسایلو رښتینی پرمختګ کړی او اوس یې پرعملي کړنلارو کار کیږي.

په ښکاره داسې بریښي، چې له طالبانو سره د امریکا خبرې حساس پړاو ته وردننه شوي دي.

د افغانستان سولې لپاره د امریکا ځانګړی استازی له طالب استازیو سره له اووم پړاو خبرو اترو وروسته څرګندوي، چې له طالبانو سره د څلورو مسایلو په تړاو خبرو کې رښتینی پرمختګ راغلی دی.

زلمی خلیلزاد د یثو خبریال د پوښتنې په ځواب کې وایي: غواړم تاسې ته ووایم، چې مونږ په ټولو څلورو برخو کې رښتني پرمختګ ته رسیدلي یو؛ مونږ خبرې اترې درلودې او هیله لرو، چې راتلوونکې خبرې هم نږدې راتلوونکې کې پیل شي او مونږ له هغو نظریاتو، چې د ترهګرۍ پر ضد په مبارزه کې مو تر اوسه تر لاسه کړي، راضي یو.

خلیلزاد له افغانستان څخه د نړیوالو ځواکونو د وتلو پلان د ترهګرۍ په ضد مبارزه کې د طالبانو له ژمنې سره تړلې بولي او وایي،‎؛ اوس واشنګتن او طالبان پر هغو برخو، چې هوکړه پرې شوې، په عملي کړنلارو کار کوي.

ښاغلی زلمی خلیلزاد زیاتوي:  مونږ پر هغو اجرائي کړنلارو د ډاډمنیا لپاره کار کوو، چې ژمنه یې کیږي؛ پلي کیږي. د امریکایي ځواکونو د وتلو مساله هم د طالبانو له ژمنې سره تړلې، چې مونږ ته به یې راکړي. مونږ همدا راز له افغان دولت سر په خبرو اترو کې یو او مونږ غواړو، چې په راتلوونکي کې هم له افغانستان سره اړیکې خوندي پاتې شي.

د سولې عالي شورا غړې لیلا جعفري وایي؛ دوی کیدی شي پر لومړنیو خبرو همغږۍ ته رسیدلي وي، خو د افغانستان د حکومت کار به له ځنډ او خنډ سره مخ وي.            

د دې تر څنګ خلیلزاد د سولې په خبرو کې د ښځو د رول په پراختیا ټینګار کوي او وایي، ښځې به د سولې په رسمي خبرو اترو کې یوه یا څو څوکۍ ولري.

خلیلزاد د سولې په خبرو کې د ښځو پر پراخ رول د ټینګار تر څنګ وایي، له طالبانو سره به یې د خبرو اترو بل پړاو په نږدې راتلوونکې کې پیل شي.

د دوحې د ناستې برخواله شاه گل رضایي وایي، چې مونږ باید له هر پرمختګه ملاتړ وکړو؛ خو مسایلو ته هم باید ډېر ډاډمن ونه اوسو.               

طالبان بیا  له افغانستان څخه د نړیوالو ځواکونو د وتلو او په ترهګرۍ ضد هڅو کې د تضمین ورکولو پرمختګ تائیدوي؛ خو اوربند او د رسمي خبرو اترو پیل د افغانانو کورني مسایل بولي.

په همدې حال کې ټاکل شوې، چې زلمی خلیلزاد به د چین له سفره وروسته له طالبانو سره د اووم پړاو خبرو اترو بهیر هم امریکایي چارواکو ته ورسوي او وروسنه به له دې ډلې سره د خبرو اترو اتم پړاو په نږدې راتلوونکې کې له سره پیل کړي؛ خو سرچینو ویلي، د دې خبرو اترو له پیل سره جوخت د افغانانو څلورم پړاو خپلمنځي خبرې د سیمې په یوه هېواد کې پیلیدونکې دي.