د امام ابو حنیفه (رح ) د دوه‌یم ملي او نړیوال نندارتون د پرانستې مراسمو ته د اسلامي امارت مشرتابه مولوي هبة الله اخوند زاده په خپل پیغام کې څرګنده کړې؛ د خصوصي سکتور ټول سوداګر باید د هېواد د اقتصادي ځان‌بسیاینې لپاره ګډه پانګونه وکړي او خپل هېواد پخپله له اقتصادي بحران څخه راوباسو. بل چاته ونه ګورو؛ ځکه دا زمونږ هېواد دي پخپله يي باید ودان کړو.

د هېواد اقتصادي مرستیال ملا برادر زیاته کړې؛ د اسلامي امارت له راتګ وروسته دا تر ټولو لوی نندارتون دی، چې له ۶۰۰ څخه په ډېرو غرفو کې بېلا بېل صنعتي او کرنیز توکي نندارې ته وړاندې شوي

دي.

نوموړی وایي؛ په دغه نندارتون کې د شانګهای ټولنې هم د ګډون غوښتنه کړې ده، چې اسلامي امارت د یادې ټولنې له دې اقدامه هرکلی کوي.

ملا عبدالغني برادر اخوند ویلي، چې د اسلامي امارت له راتګ سره امنیت ټینګ شوی او په ټول هېواد کې پانګونې او د کانونو د راایستلو ته تر بل هر وخت ښه زمینه برابره شوې، چې له برکته یې افغانستان د بیارغېدو مرحلې ته داخل شوی دی.

د ریاست‌الوزراء اقتصادي مرستیال د مرکزي او سویلي آسیا هېوادونو ته ډاډ څرګند کړ، چې افغانستان د ترانزیت لپاره تر ټولو خوندي لار ده او په دغه برخه کې یې د نورو اسانتیاوو پر رامنځته کېدو سربېره د لویو لارو بیارغونه هم پيل کړې، چې ښه بېلګه یې په دې وروستیو کې د سالنګ او کابل-کندهار لویو لارو د بیارغونې چارو پرانیسته ده.

هغه په هېواد کې دننه د سوداګرۍ د پراخېدو او د سوداګرو ستونزو ته د رسېدو په اړه په ډاګه کړې، چې په تېر نږدې وخت کې یې د همدې موخې لپاره په روزګان او زابل ولایتونو کې د سوداګرۍ خونې پرانیستې دي او د افغانستان د سوداګرۍ او پانګونې خونې ته یې هدایت وکړ، چې په بغلان ولایت کې هم ژر تر ژره د سوداګرۍ خونه پرانیزي او لازم تشکیل ورته برابر کړي.

نوموړي ټولو افغان او بهرنیو پانګوالو ته بلنه ورکړه، چې راشي او په افغانستان کې پانګونه وکړي او  له ټولو هغو امتیازاتو برخمن شي، چې افغان پانګوالو ته ورکول کېږي.

د امام ابو حنیفه (رح) دوهم ملي او نړیوال نندارتون د اسلامي امارت پر ملاتړ د افغانستان د سوداګرۍ او پانګونې خونې له لوري افغان محصولاتو او تولیداتو ته د بازارموندنې، د ملي پانګوالو ملاتړ، د ملي او نړیوالو سوداګرو ترمنځ د اړیکو برابرولو او هېوادوالو ته د کورنیو تولیداتو او محصولاتو د ورپېژندلو په موخه جوړ شوی، چې په سلګونه غرفو کې بېلا بېل کرنیز، ساختماني، لاسي صنایع، طبي وسایل، درمل او نور ملي محصولات او تولیدات نندارې ته وړاندې شوي دي.

په دغه نندارتون کې پر کورنیو صنعتکارانو سربېره د ایران، ترکمنستان، ترکیې، پاکستان او یوشمېر نورو هېوادونو صنعتکارانو هم خپل تولیدات نندارې ته وړاندې کړي دي.

په افغانستان کې د اروپايي ټولنې غړې ويلي، اروپايي ټولنه په افغانستان کې خصوصي سکتور ته اهمیت ورکوي. په ځانګړي توګه هغو میرمنو ته، چې کورني اقتصادي مسوولیتونه پر غاړه لري.

په افغانستان کې د اروپايي ټولني استازې رافایلا لودیس ویلي: زما له نظره اقتصادي ستونزې اوس هم  شته؛ خو خوشحاله یم، چې په دې  نندارتون کې  میرمنې هم شته او میرمنې د یوه هېواد په  اقتصاد کې مثبت  رول ترسره کولی شي.

د سکتوري وزارتونو مسوولینو هم ويلي،  چې په هېواد کې د کورنیو تولیداتو او اقتصادي فعالیتونو او پانګونې  د پراختیا لپاره ترټولو ښه زمینه برابره شوې، چې باید په دې برخه کې خصوصي سکتور پانګونه زیاته کړي.

د صنعت او سوداګرۍ وزارت چارسمبالی نور الدین عزیزي وایي: زمونږ په هېواد کې اوس له بل هروخت څخه اقتصادي فعالیتونو ته ښه زمینه برابره شوې او باید، چې په دې سکتور کې ډېرې هڅې وشي او ډېر کار تر سره شي.

د کرنې او مالدارۍ وزارت چارسمبالي عطا الله عمري ویلي: مونږ د کرنې په برخه کې د پانګونې لپاره لوړ ظرفیت لرو او په دې برخه کې مو د پانګونې لپاره زمینه جوړه کړې ده.

د خصوصي سکتور غړي له اسلامی امارته غوښتنه کوي، چې په هېواد کې د کورنیو تولیداتو د پراختیا او د ترانزیت لپاره دې سکتور ته اسانتیاوې زیاتې کړي.

د سوداګرۍ اوپانګونې خونې مرستیال محمد یو نس مومند وایي: اسلامې امارت له اقتصادي سکتوره کلک ملاتړ کوي. نږ دې ټولو هېوادونو او اروپايي ټولني هیله څرګنده کړې، چې له افغانستان سره ښه اقتصادي تعاملات تر سره کړي.

د صنایعو خونې رییس شېر باز کمین زاده وایي: له اسلامي امارته زمونږ غوښتنه داده، چې له کورنیو تولیداتو استفاده وکړي، چې په هېواد کې کورنی محصولاتو لپاره بازار او مارکیت برابر شي.

د دې نړیوال نندارتون له ۶۰۰ غرفو څخه، چې ۱۲۰ یې  د متشبثو میرمنو دي او په پاتي نورو هغو کې د افغان سوداګرو په ګډون د ایران، ترکیې، ترکمنستان او پاکستان سوداګرو خپل تولیدي توکي نندارې ته ایښي دي.

د یادولو ده، چې د امام ابو حنیفه (رح) دوه‌یم ملي او نړیوال نندارتون د روان لمریز کال د سرطان میاشتې له ۲۵مې نېټې شروع او د همدې میاشتې تر ۳۱مې پورې به دوام ولري.