تازه خبرونه
د یوناما راپور مستند نهدی – بهرنیو چارو وزارت
د افغانستان د بهرنیو چارو وزارت له بشري حقونو د سرغړونو په اړه د یوناما د راپور په غبرګون کې ويلي چې د یوناما راپور مستند نهدی او په دې راپور کې کومه ادعا هم ثابته شوې نهده.
د بهرنیو چارو وزارت د ویاند د څرګندونو له مخې؛ د تېرو کلونو پر پرتله د بشري حقونو د سرغړونو او ناقانونه وژنو په پېښو کې کموالی راغلی او د بشري حقونو وضعیت د تېرو کلونو پر پرتله ښه شوی دی.
په افغانستان کې د پخواني رژیم له اړوند چارواکو او سرتېرو سره د واکمنو چارواکو لهخوا د بشري حقونو د ښکاره سرغړونو د سلګونه قضیو د راپور له خپرېدو یوه ورځ وروسته د بهرنیو چارو وزارت دغه راپور یو اړخیز وباله او رد یې کړ.
د بهرنیو چارو وزارت ویاند له الجزیرې سره په خبرو کې ویلي، چې د یوناما په راپور کې شوې ادعاوې مستندې نهدي او نه هم ثابتې شوې دي.
د بهرنیو چارو وزارت ویاند عبدالقهار بلخي ويلي، د اسلامي امارت له واکمنیدو سره د تېرو کلونو پر پرتله د بشري حقونو سرغړونې کمې شوې دي.
نوموړی وایي: دا یو مستند راپور نهدی، بلکې د یوناما راپور دی، چې له حکومت او مسوولو چارواکو سره یې همکاري نهده کړې او حکومت په دې اړه خپل نظرونه شریک کړي دي. په دغه راپور کې ادعاوې نهدي تائید شوي او نه هم ثابتې شوې دي. دا، چې دا پېښې څنګه او چېرته شوې دي؛ په اړه یې هیڅ جزئیات نشته.
د بهرنيو چارو وزارت وياند زیاته کړې، چې يوناما بايد د دغه راپور محتوا له خپرېدو مخکې له عدلي او قضايي ارګانونو سره شريکه کړې واى، چې په اړه يې څېړنې شوې وای او د کار په پاى کې د عدلي او قضايي ارګانونو موندنې هم په دې راپور کې ځای شوې وای.
د هغه د څرګندونو له مخې؛ د اسلامي امارت له واکمنېدو وروسته د بشري حقونو وضعیت ښه شوی او د بشري حقونو د سرغړونو پېښې کمې دي.
دی وایي: په راپور کې ډېر تناقض دی. که مونږ دا راپور له ۲۰۱۹ سره پرتله کړو د بشري حقونو د سرغړونو قضیې د پام وړ کمې شوي او دا څرګندوي، چې په افغانستان کې د امنیت او بشري حقونو د خوندیتوب په برخه کې پرمختګ شوی دی.
ملګري ملتونه له اسلامي امارت غواړي چې د بشري حقونو د سرغړونکو په اړه هر اړخیزه څېړنه وکړي او عاملین یې محاکمه کړي.
په افغانستان کې د ملګرو ملتونو د بشري حقونو مشره فیونا فریزر وایي: مونږ د افغانستان له واکمنو چارواکو څخه د بشري حقونو د رعایت او له مجازاتو څخه د معافیت د لرې کولو په اړه واضح او څرګندې ژمنې غواړو. دولت مسوولیت لري، چې له بشري حقونو څخه د سرغړونې مخه ونیسي، عاملین یې عدالت ته کینوي او د خلکو خوندیتوب تضمین کړي.
د ملګرو ملتونو د عمومي منشي ویاند ستیفن دوجاریک ویلي؛ د طالبانو د عمومي بښنې له اعلان سره سره د حکومت پخواني چارواکي او د افغان ملي دفاعي او امنیتي ځواکونو پخواني غړي وژل شوي. عمومي منشي پر واکمنو چارواکو غږ کوي، چې د غیر قانوني وژنو مخه ونیسي او له سرغړونکیو سره حساب کتاب وکړي.
یوناما وايي، چې نوی راپور یې له سلګونه هغو کسانو سره د مرکو له لارې جوړ کړی، چې له تېرو دوه کلونو راپدیخوا یې په کابل او نورو ولایتونو کې د خپلو کورنیو غړي له لاسه ورکړي دي.
تازه خبرونه
چين مولوي عبدالکبیر ته په ټرانس – هیماليا ناسته کې د ګډون بلنه ورکړه
په کابل کې د چین سفیر ژاو شینګ د چارشنبې پر ورځ ( د غویی شپږویشتمه ) د ریاست الوزراء له سیاسي مرستیال مولوي عبدالکبید سره په کتنه کې هغه ته بلنه ورکړه، چې په ټرانس – هیمالیا فورم په غونډه کې ګډون وکړي.
په دې کتنه کې لومړی د چین سفیر له اسلامي امارت سره د خپل هېواد پر همکاریو ټینګار څرګند کړ او څرګندوي، چې د دواړو لوریو همکاري او متقابلې اړیکې د ستونزو په حل کې مرسته کولی شي.
ژاو شينګ ویلي؛ د چين ولسي جمهوريت په نړيوالو غونډو او په ځانګړي توګه د امنيت شورا په غونډو کې د اسلامي امارت د دريځ ملاتړ کوي او له اسلامي امارت سره خپلو همکاريو ته ژمن دی.
د افغانستان اسلامي امارت سیاسي مرستیال مولوي عبدالکبیر له افغانستان سره په بېلابېلو برخو کې د چین د خلکو جمهوریت له همکاریو مننه کړې او وایي، چې اسلامي امارت د یوه مسوول حکومت په توګه امنیت او ثبات ته ژمن دی او هڅه کوي، چې د سیمهییزو مسایلو، ثبات او پرمختګ په برخه کې فعال رول ولوبوي.
نوموړي د افغانستان په اړه په نړیوالو غونډو کې د چین همکاري او د اسلامي امارت له دریځ څخه د بیجینګ ملاتړ د افغانستان د خلکو په ګټه وباله او څرګندوي، چې د چین همکاري کولی شي په هېواد کې مثبت بدلونونه او اقتصادي وده رامنځته کړي.
تازه خبرونه
د تورخم لار لنډمهاله تړل کیږي
د تورخم کمیشنر عبدالجبار حکمت ويلي؛ د تورخم لار به د پاکستان له لوري د ۳ ورځو لپاره د ناروغانو او مسافرو د تګ راتګ پر مخ تړلې وي.
عبدالجبار حکمت ویلي، چې دغه لار به د جمعې له ورځې ( د غویی اتویشتمه) څخه تر یکشنبې ( د غویی دېرشمه ) پورې د ناروغانو او مسافرو پر مخ تړلې وي.
هغه زياته کړې، چې دغه سوداګريزه لار به ٢٤ ساعته پرانيستې وي او د باروړونکیو موټرو تګ راتګ او د سوداګريزو توکو لېږد رالېږد به روان وي.
حکمت زياته کړې، چې د ناروغانو او مسافرو پر مخ د دې لارې د بندېدو لامل له پخوانۍ ودانۍ څخه نوې ودانۍ ته د پاکستان د سرحدي دفترونو لېږدول دي.
تازه خبرونه
د سولې په چارو کې د ملګرو ملتونو د عمومي منشي مرستیال کابل ته راغلی
د سولې په چارو کې د ملګرو ملتونو د عمومي منشي مرستیال ژان پیر لاکروا به د دوه ورځني سفر په بهیر کې له جګړې څخه د پاتې چاودیدونکیو توکو د خطرونو په اړه د پوهاوي پر لوړولو راوڅرخیږي.
د سولې په چارو کې د ملګرو ملتونو د عمومي منشي مرستیال ژان پیر لاکروا له یوه پلاوي سره کابل ته راغلی دی.
د ملګرو ملتونو د ویاند مرستیال فرحان له دې مخکې په یوه خبري غونډه کې ویلي وه، چې ین پییر لاکروا به افغانستان ته په خپل سفر کې د چاودېدونکیو توکو د اغېزو په اړه د اسلامي امارت له چارواکو سره خبرې وکړي.
په دغه سفر کې له نوموړي سره د ملګرو ملتونو د ماین پاکۍ د څانګې مشره هم مل ده.
هغه زیاته کړې، چې لاکروا به د مې تر اووهلسمې پورې په کابل کې وي او په دې سفر کې به د ملګرو ملتونو د ماین پاکۍ د څانګې مشره ایلین کوهن هم ورسره مل وي.
د ملګرو ملتونو دغه چارواکي ویلي، چې د افغانستان خلک د ماینونو له خطر سره مخ دي او د ۲۰۲۳ کال له جنورۍ څخه د ۲۰۲۴ کال تر مارچ پورې په افغانستان کې د ۸۲۱ چاودېدونکیو توکو د وژل شویو ۸۱ سلنه ماشومان ول.
تر اوسه اسلامي امارت په دې اړه جزئیات ندي ورکړي.
د سولې په چارو کې د ملګرو ملتونو د عمومي منشي مرستیال په داسې حال کې افغانستان ته سفر کوي، چې ټاکل شوې د روان کال په جون میاشت کې د افغانستان په اړه په دوحه کې درېیمه غونډه جوړه شي.
دا په داسې حال کې ده، چې د ملګرو ملتونو د څرګندونو پر بنسټ، له دې مخکې د سولې په چارو کې د ملګرو ملتونو د عمومي منشي مرستیال قطر ته د سفر پر مهال د دغه هېواد له چارواکو سره د سولې د ټینګښت او د ستونزو په اړه خبرې کړې وې.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
تازه خبرونه3 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري4 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
تازه خبرونه2 days ago
په ننګرهار کې د ناکامورا کانال پروژه بشپړه شوه