تازه خبرونه
د غیرقانوني بهرنیانو د ایستلو لپاره دوه پړاوونه په پام کې نیول شوي – د پاکستان کورنیو چارو وزیر
د یکشنبې پر ورځ د کډوالو د ایستلو د وروستۍ نېټې د نږدې کېدو په درشل کې د پاکستان د کورنیو چارو وزیر سرفراز بګتي څرګنده کړې، چې له پاکستان څخه د غیر قانوني مهاجرو ایستل په دوه پړاوونو کې ترسره کیږي.
له جيو نيوز سره په مرکه کې بګتي ویلي؛ په لومړي پړاو کې د هغو غير قانوني بهرنيانو شړل شامل دي، چې اسناد نهلري او ځانونه يې د پاکستانيو اتباعو په توګه پر جعلي اسنادو معرفي کړي دي.
په بل پړاو کې به هغه کسان شامل وي، چې د نوملیکنې (POR) کارت او افغان تابعیت یې د ملګرو ملتونو د مهاجرت ادارې سره راجستر شوی وي.
د روانې میاشتې په پیل کې پاکستان ټولو غیرقانوني مهاجرینو ته په ځانګړي توګه یو اعشاریه دري اویا میلیون افغان وګړیو ته له پاکستان څخه د وتلو امر وکړ.
هغه زیاته کړې، ټول [غیرقانوني بهرنیان] باید بېرته ولاړ شي.
بګتي دا هم ویلي، چې د پنجشنبې او جمعې تر منځ له ۱۵ زره څخه تر ۲۰ زره پورې غیر قانوني بهرنیان پخپله خوښه له پاکستان څخه وتلي دي.
په پاکستان کې د بهرنیانو د ټولشمېر په اړه هغه ټینګار وکړ، چې په پاکستان کې د غیرقانوني بهرنیانو او او هغو افرادو په ګډون، چې د کډوالۍ سند لري؛ له ۳ میلیون ډېر کسان اوسیږي.
هغه وایي؛ جغرافيایي نقشه [د غیرقانوني بهرنیانو د موندلو لپاره] بشپړه شوې ده. حکومت به بهرنیان په هر ځای کې، چې وي پر نښه کړي.
سرفراز بګتي ټینګار کړی، چې دا پرېکړه یوازې افغانانو ته ځانګړې شوې نهده.
هغه ويلي: هو! عمليات روان دي. مونږ د نیولو ځایونه جوړ کړي؛ دغو مرکزونو ته ناقانونه بهرنیان لېږدوو او تر څارنې لاندې نیسو.
هغه زیاته کړې: چارواکو ته سپارښتنه شوې، چې د ښځو، ماشومانو او لویانو سره په ډېر درناوي چلند وکړي.
دا په داسې حال کې ده، چې د سپین بولدک له لارې هېواد ته راشړل شويو افغان کډوالو ویلي؛ د پاکستان حکومت او پولیسو د دوی ټولې شتمنۍ ترې اخیستي او په ډېر بد وضيعت يې ايستلي دي.
تازه خبرونه
ملګرو ملتونو د دې ټولنې په عمومي ناسته کې د افغانستان د رایې حق وځنډاوه
ملګرو ملتونو د دې ټولنې په عمومي ناسته کې د افغانستان او پېنځه نورو هېوادونو د رايې ورکولو حق لنډمهالی ځنډولی دی.
دې ټولنې په اوبپاڼه کې لیکلي، چې افغانستان دې ټولنې ته د کلني غړیتوب حقالعضویت له پامه غورځولی دی.
دا خبر په ملګرو ملتونو کې د افغانستان دایمي استازولۍ هم تائید کړی دی.
دې ټولنې دا هم ویلي، چې د دې ټولنې د منشور د ۱۹ مادې له مخې: هر هغه غړي هېواد، چې د دوه کلونو یا له دې د ډېر وخت لپاره د غړیتوب حقالعضویت سپارلی نهوي؛ د دې ټولنې په عمومي ناسته کې د رایې ورکولو له حق څخه بې برخې پاتې کیږي.
د ملګرو ملتونو د څرګندونو له مخې؛ افغانستان د ۲۰۲۲ او ۲۰۲۳ کلونو لپاره د غړیتوب حقالعویت ندی ورکړې له همدې کبله د دې ټولنې پوروړی دی.
د ملګرو ملتونو د غړیتوب کلنی حق العضویت دوه میلیون ډالره دی.
د راپورونو له مخې؛ له دې مخکې په ملګرو ملتونو کې د غړیتوب کلنی حقالعضویت د افغانستان بهرنیو چارو وزارت پرې کاوه.
د ملګرو ملتونو په اوبپاڼه کې د ورکړ شویو معلوماتو له مخې؛ افغانستان، اکواډور، کومورس، وینزویلا، سومالیا او ساو تومه هغه هېوادونه دي، چې له دوه کلونو پر تېرېدو یې هم د غړیتوب حقالعضویت ندی ورکړی.
دا په داسې حال کې ده، چې ملګرو ملتونو ټولنې په تېرو دوه کلونو کې د افغانستان د دایمي استازي په توګه د افغانستان د لنډمهالي حکومت یا اسلامي امارت د نومول شوي استازي سهیل شاهین له منلو ډډه کړې ده.
تازه خبرونه
د افغانستان سیلاب ځپلیو ته مو د مرستو چمتووالی نیولی – ټوماس ویسټ
د افغانستان لپاره د امريکا ځانګړي استازي ټوماس ويسټ د افغانستان په بغلان، بدخشان، سمنګان، تخار، غور، هرات او نورو ولایتونو کې د وروستيو سيلابونو پر اوښتو زيانونو خپله خواشيني څرګنده کړې ده.
ټوماس ویسټ د دوشنبې پر ورځ ( د غویی څلیریشتمه ) په خپله ایکس پاڼه کې لیکلي، چې د امریکا متحدین په افغانستان کې د سېلاب ځپلیو لپاره د خوراکي توکو او اوبو په ګډون بېړنۍ مرستې رسوي.
دغه راز د افغانستان لپاره په قطر کې د امریکا سفارت چارسمبالې کرن ډیکر هم ویلي: امریکا سیلاب ځپلیو ته د بېړنیو مرستو د جلبولو، د خپلو همکارانو له لارې د خوراکي توکو او طبي تجهیزاتو د برابرولو لپاره له نورو سره یوځای کیږي.
د هېواد په يو شمېر ولايتونو په تېره بيا په بغلان کې د مرګوني سېلابونو راوتو ځايي اوسېدونکیو ته ځاني او مالي زيانونه اړولي دي.
د وروستیو څرګندونو له مخې؛ د بغلان په دوه ولسوالیو کې له ۳۰۰ ډېر کسان مړه شوي دي.
تازه خبرونه
ملا برادر د بغلان ولایت له سیلاب ځپلیو سیمو لیدنه وکړه
د ریاست الوزراء اقتصادي مرستيال ملا عبدالغني برادر د دوشنبې پر ورځ ( د غویی څلیریشتمه) د دغه ولايت د مرکز په ګډون له سېلاب ځپلیو سيمو ليدنه وکړه.
ملا برادر د زیانمنو سیمو له لیدنې وروسته د دې ولایت په مرکز کې له مسوولینو او کاري کمیټو له استازو سره په ناسته کې لازمې سپارښتنې وکړې.
نوموړي زیاته کړې: په هغو ولسوالیو کې، چې مونږ له نږدې ولیدلې اوښتي زیانونه ډېر دي؛ نو له همدې کبله اړینه ده، چې دغه بنسټونه د بې ځایه شویو خلکو لپاره د خوراکي توکو، درملو او سرپناه په برابرولو کې خپلې هڅې ګړندۍ کړي او سیلاب ځپلیو سیمو ته د مرستو رسولو بهیر نور هم چټک کړي.
په تېرو څو ورځو کې د افغانستان شمالي او لویديځ ولايتونه د ويجاړونکيو او مرګونو سېلابونو شاهدان دي.
د یو لړ څرګندونو له مخې؛ یوازې په بغلان کې له ۳۰۰ ډېر کسان مړه شوي دي. په تخار کې هم له ۲۰ ډېرو کسانو خپل خوږ ژوند له لاسه ورکړی دی.
تر اوسه د مالي زیانونو پوره کچه په ډاګه شوې نده؛ خو ویل کېږي، چې د سیلابونو له کبله سلګونه کورونه ویجاړ شوي او کرنیزو ځمکو ته پوره زیانونه رسېدلي دي.
-
تازه خبرونه2 days ago
الله ګل مجاهد د قتل پر تور ونیول شو
-
تازه خبرونه2 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
سوداگري2 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه2 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه1 day ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه1 day ago
د حج او اوقافو وزارت چارسمبالي د ترکیې له ولسمشر سره وکتل
-
تحول5 days ago
تحول: له نړۍ سره د افغانستان د ډیپلوماټیکو اړیکو د ښه کېدو هڅې
-
نړۍ1 day ago
په برازیل کې د سیلابونو له کبله د مړو شویو شمېر ۱۴۳ کسانو ته پورته شو