ایران د دوشنبې پر ورځ د علي خامنه‌یي ځایناستی د هغه زوی سخت دریځی مجتبا خامنه‌یي د مذهي رهبر په توګه ونوماوه.

رویټرز راپور ورکړی، چې مجتبا یو داسې عالم دی، چې د ایران په امنیتي ځواکونو کې نه یوازې پراخ نفوذ لري، بلکې له پلاره ورپاتې د سوداګریزو برخو رهبري هم کوي.

نوموړی د یکشنبې پر ورځ د خبرګانو مجلس له‌خوا، چې د ۸۸ غړيو پر لرلو د علي خامنه‌یي د ځایناستي د غوره کولو دنده لري؛ مخکښ وګڼل شو.

د خبرګانو مجلس د تهران د وخت له نیمې شپې وروسته په یوه خبرپاڼه کې څرګنده کړې: “د یوې پرېکنده رایې له مخې آیت الله سید مجتبا حسیني خامنه‌یي د ایران درېیم رهبر شو.”

دا مقام مجتبا ته په حکومتي چارو کې بشپړواک ورکوي.

ټرمپ د ایران د نوي مذهبي رهبر مجتبا د ټاکنې په غبرګون کې ویلي: “وګورو، چې څه پېښیږي.

ټرمپ د نوي مذهبي رهبر له نومولو وروسته له اسرائیل ټایمز سره په یوه مرکه کې له هر اړخیز ځواب ویلو څخه ډډه کړې؛ خو یوازې یې وویل: ” وګورو، چې څه پېښیږي.”

د ورځپاڼې د څرګندونو له مخې؛ ټرمپ په دې مرکه کې ویلي، چې د جګړې پای ته رسول د اسرائیلو له لومړي وزیر بنیامین نتنیاهو سره ګډه پرېکړه غواړي.

د مجتبا پلار ستر مذهبي رهبر علي خامنه‌یي له یوې اوونۍ څخه ډېر وخت کیږي، چې د ایران پر وړاندې د امریکا او اسرائیل په پیل شویو لومړیو بریدونو کې وژل شوی دی.

د ایران دولتي رسنیو ویلي، چې د ایران د وسلوالو ځواکونو مشرتابه مجتبا خامنه‌یي ته د وفادارۍ ژمنه کړې او د سپاه پاسدارانو په یوه خبرپاڼه کې راغلي؛ دوی چمتو دي، چې له نوي مذهبي رهبر ملاتړ روان وساتي.

د ایران امنیت شورا رییس علي لاریجاني د یکشنبې پر ورځ د ایران په دولتي ټلویزیون کې له اعلان وروسته ویلي، چې د خبرګانو مجلس د نوي ستر مذهبي رهبر د ټاکلو لپاره غونډه وکړه؛ سره له دې، چې ورسره ګواښونه هم مل ول.

لاریجاني ویلي؛ مجتبا خامنه‌یي کولی شي په اوسنیو حساسو شرایطو کې د هېواد رهبري وکړي او پر نوي رهبر یې د راټولېدو غوښتنه وکړه.

ایران د امریکا او اسرائیلو پر وړاندې په ټوله سیمه کې غچ اخیستونکي بریدونه پیل کړي دي.

د امریکا بهرنیو چارو وزارت د یکشنبې پر ورځ ویلي؛ دوی د امریکا نااړینو دولتي کارمندانو او د هغو د کورنۍ غړو ته امر کړی، چې د خطرونو له کبله له سعودي عربستان څخه ووځي.

د سعودي دفاع وزارت د امریکا پر سفارت د ایران له برید وروسته د یکشنبې پر ورځ ویلي؛ دوی یوه ډرون الوتکه ویشتلې، چې هڅه یې کوله ډیپلوماټیکه سیمه پر نښه کړي.

د ایران پر وړاندې د امریکا او اسرائیل د کمپاین پر نهمه ورځ د جګړې شدت زیات او د تهران پر فضا تور لوګی پورته شو. د ایران اوسېدونکو ویلي، چې د تېلو پر زیرمو د بریدونو له کبله د شپې آسمان پر نارنجي شعلو ړنا و.

د ایران د بهرنیو چارو وزارت ویاند اسماعیل بقایي هم ویلي، چې دا برید پراخه و.

ویل کیږي، چې د ایران د نوي مذهبي مشر له معرفي کولو وروسته د تېلو بیه هم لوړه شوې ده.

د ایران د خبرګانو مجلس غړی محمد مهدي میرباقري ويلي، چې د ایران د راتلونکي مذهبي رهبر په اړه د “اکثریت” نظر چمتو شوی دی.

هغه په ​​یوه ویډیو کې څرګنده کړې، چې “ځینې خنډونه” اوس هم حل ته اړتیا لري.

ایراني رسنیو راپور ورکړی؛ د خبرګانو مجلس په دې اړه یو کوچنی اختلاف لري، چې آیا د دوی وروستۍ پرېکړه باید له حضوري ناستې وروسته وشي یا پرته له داسې رسمي مراسمو رامنځته شي.

دغه راز د خبرګانو مجلس بل غړي محسن حیدري آل کثیر په یوه ویډیو کې ویلي؛ په اوسنيو شرایطو کې د وروستۍ رایې لپاره د غونډې مخامخ یا حضوري ناسته ممکنه نده.

نوموړي زیاته کړې: دا غوراوی د علي خامنه‌یي د  سپارښتنې له مخې د ایران رهبر باید داسې څوک وي، چې دښمن ترې کرکه ولري؛ نه دا، چې ستایل شوی وي.

حیدري آل کثیر د غوره شوي ځایناستي په اړه وایي: «حتا لوی شیطان (امریکا) د هغه نوم یاد کړی دی.»

دا په داسې حال کې ده، چې څو ورځې مخکې د امریکا ولسمشر ډونالډ ټرمپ ویلي وه: د خامنه‌یي زوی مجتبی ورته د «نه منلو » غوراوی دی.

سعودي عربستان ایران ته خبرداری ورکړی، چې پدې هېواد دې له بریدونو ډده وکړي او که خپل بریدونه روان وساتي؛ ریاض ښايي متقابل ځواب ورکړي.

څلور باخبره سرچینو رویټرز خبري سرچینې ته څرګنده کړې، چې سعودي عربستان د ایران او امریکا ترمنځ د تاوتریخوالي د حل لپاره له ډیپلوماټیکو لارو ملاتړ کوي.

دا پیغام د شنبې پر ورځ د ایران د ولسمشر مسعود پزشکیان له وینا مخکې لېږل شوی و.

هغه په خپله وینا کې د خلیج له ګاونډ هېوادونو څخه د ایران د بریدونو له کبله بښنه وغوښته. داسې ښکاري، چې دا کار د سیمې د قهر د کمولو لپاره شوی؛ ځکه ایران پر ځینو غیرنظامي هدفونو بریدونه کړي وه.

له دې دوه ورځې مخکې، د سعودي عربستان بهرنیو چارو وزیر په ټیلیفوني اړیکه کې د ایران د بهرنیو چارو له وزیر سره د ریاض دریځ شریک کړی و.

د سرچینو د څرګندونو له مخې؛ سعودي عربستان ویلي: له هر ډول منځګړیتوب ملاتړ کوي، چې تاوتریخوالی کم او د خبرو له لارې حل پیدا شي.

همدارنګه ټینګار شوی؛ سعودي عربستان او د خلیج نورو هېوادونو اجازه نده ورکړې، چې د دوی له هوايي حریم یا خاورې څخه امریکا پر ایران بریدونه وکړي.

دغه راز د سعودي بهرنیو چارو وزیر خبرداری ورکړی، چې که د ایران بریدونه پر سعودي یا د انرژۍ پر تاسیساتو دوام وکړي؛ ریاض ښايي اړ شي، چې امریکایي ځواکونو ته د سعودي له پوځي اډو څخه د استفادې اجازه ورکړي او د بریدونو پر وړاندې غبرګون وښيي.

د سرچینو د څرګندونو له مخې: له هغه وخت راپدېخوا، چې د امریکا او اسرائیلو پوځي عملیات د فبرورۍ پر اته‌ویشتمه پر ایران پیل شوي؛ سعودي عربستان د خپل سفیر له لارې له تهران سره منظم تماسونه ساتلي دي.

په تېرې اوونۍ کې متحده عربي امارات، کویټ، قطر، بحرین او عربستان د ایران د پراخو بې‌پیلوټه الوتکو او راکټي بریدونو هدف ګرځېدلي وه.

د جګړې پر لومړۍ ورځ د امریکا او اسرائیلو په بریدونو کې د ایران ستر مذهبي مشر علي خامنه‌یي ووژل شو او له هغې وروسته ایران پراسرائیل او هغو هېوادونو بریدونه وکړل، چې د امریکا پوځي اډې په کې دي.

مسعود پزشکیان ویلي: د ایران لنډمهالې رهبرۍ شورا پرېکړه کړې، چې پر ګاونډ هېوادونو بریدونه ودروي؛ خو که له هغو هېوادونو څخه پر ایران برید وشي بیا به، نو ځواب ورکړ شي.

دا په داسې حال کې ده، چې د ایران ځینو پوځي قومندانانو ټینګار کړی؛ د امریکا او اسرائیلو پوځي اډې په سیمه کې اوس هم د ایران د بریدونو اصلي هدفونه دي.