Connect with us

سیمه ییز خبرونه

د ایران په بندر عباس کې د چاودنې له کبله ۱۸ کسان وژل شوي او سلګونه نور ټپیان دي

رویټرز راپور ورکړی، چې چاودنه د دې بندر د شهید راجایي په اړوند برخه کې رامنځته شوې ده.

خپور شوی

د

د ایران دولتي رسنیو راپور ورکړی، چې د شنبې پر ورځ( د غویی شپږمه) د ایران په ترټولو لوی بندر؛ بندر عباس کې د کیمیاوي موادو د چاودنې له کبله لږ تر لږه ۱۸ کسان وژل شوي او له ۷۰۰ ډېر ټپیان دي.

رویټرز راپور ورکړی، چې چاودنه د دې بندر د شهید راجایي په اړوند برخه کې رامنځته شوې ده.

د ایران د کړکیچ د مدیریت بنسټ ویاند حسین ظفري ویلي؛ چاودنه د شهید راجایي په کانټینرونو کې د کیمیاوي موادو د ناسمې زیرمې له کبله وه.

هغه د ایران ایلنا ILNA خبري سرچینې ته ویلي: “د چاودنې لامل په کانټینرونو کې کیمیاوي مواد ول.”

حسین ظفري ویلي: ” له دې مخکې د کړکیچ د مدیریت عمومي رییس د خپلو لیدنو پرمهال دې بندر ته خبرداری ورکړی و او د خطر احتمال یې پر ګوته کړی و.”

د ایران د حکومت ویاند ویلي، چې که څه هم د چاودنې احتمال کیمیاوي توکي ول؛ خو اوس هم دقیق لامل معلومول ممکن ندي.

ولسمشر مسعود پزشکیان د پښې د پلټنې امر وکړ او د کورنیو چارو وزیر یې سیمې ته واستاوه، چې ویلي یې دي د اور د وژلو او نورو سیمو ته د خپرېدو د مخنیوي لپاره هڅې روانې دي.

د ایران رسمي خبري چینلونو له چاودنې وروسته له بندر څخه هوا ته د پورته شوي تور او نارنجي لوګي انځورونه خپاره کړل او یوه اداري ودانۍ ښیي، چې دروازې ماتې دي او کاغذونه او پاتې شوني یې لیذل کیږي.

د ایراني رسنیو د څرګندونو له مخې؛ چاودنې څو کیلومټره لرې ترې د کړکیو ښیښې  ماتې او غ. یې په قشم ټاپو کې اوریدل شوی، چې ل بندر څخه ۲۶ کیلومټره لرې جنوب لوري ته اورېدل شوی دی.

د تسنیم نیمه رسمي خبري سرچینې د ټپي شویو کسانو انځورونه خپاره کړي، چې په سړک کې پراته دي او د درملنې هڅې کیږي.

چارواکو ویلي، چې له چاودنې وروسته په بندر کې فعالیتونه درول شوي دي.

په وروستیو کلونو کې د وژونکو پېښو لړۍ د ایران انرژۍ او صنعتي بېخبناوو( زیربنا ) ته زیان رسولی، چې ډېری یې د شنبې د ورځې چاودنې ته ورته پر غفلت او بې پروایۍ تورنې شوې دي.

ایران د ځینو نورو پیښو پړه پخپل اصلي دښمن اسرائیل اچولې، چې په وروستیو کلونو کې یې د ایران اټومي پروګرام پر نښه کولو بریدونه ترسره کړي او تېر کال یې د هېواد څارګرۍ الوتمې بمبارډ کړي دي.

د اسرائیلو د پوځ یا د لومړي وزیر بنیامین نتنیاهو له دفتر څخه پدې اړه د تبصرې غوښتنه شوې، چې آیا اسرائیل د شنبې پر ورځ په چاودنه کې ښکېل ول؛ سمدستي تبصره نده کړې.

ایراني چارواکو ویلي، چې د شنبې پر ورځ د چاودنې له کبله د تېلو تاسیسات یې اغېزمن شوي ندي.

ویل کیږي، چې دا چاودنه په داسې حال کې رامنځته شوې، چې ایران د عمان پرکوربتوب له امریکا سره د اټومي خبرو اترو درېیم پړاو پیل کړی؛ خو د دواړو پېښو ترمنځ د اړیکو کومه نښه نه لیدل کیږي.

سیمه ییز خبرونه

د ایران پر پوځي تاسیساتو امریکا او پر خلیجي هېوادونو ایران بریدونه کړي

د امریکا یوه پوځي چارواکي رویټرز ته ویلي، چې امریکايي الوتکو د ایران د سپاه پاسداران ځواکونو (IRGC)  پر تاسیساتو برید کړی دی.

Published

on

 

امریکايي جنګي الوتکو د نومبر پر اووه‌لسمه د هرمز تنګي په قشم ټاپو کې د ایران پر پوځي تاسیساتو برید کړی؛ بحرین او کویټ له نویو هوايي بریدونو خبر ورکړی او په خلیجي سیمه کې د کړکېچ د زیاتېدا د مخنیوي لپاره ډیپلوماټیکې هڅې هم روانې دي.

د امریکا یوه پوځي چارواکي رویټرز ته ویلي، چې امریکايي الوتکو د ایران د سپاه پاسداران ځواکونو (IRGC)  پر تاسیساتو برید کړی دی.

د دې سرچینې د څرګندونو له مخې، دغه برید پر امریکايي پرسونل او پوځي شتمنیو د بریدونو په غبرګون کې شوی دی.

د ایران د هرمزګان ولایت د والي مرستیال احمد نفیسي پر قشم ټاپو د بریدونو پخلی کړی؛ خو ویلي یې دي، چې استوګنیزې سیمې، سوداګریز مرکزونه او مهمې بېخبناوې زیانمنې شوې نه‌دي. هغه د مرګ او ‌ژوبلې او پوځي تاسیساتو ته د اوښتو زیانونو په اړه معلومات نه‌دي ورکړي.

له دې مخکې د ایران سپاه پاسداران ځواکونو ادعا کړې وه، چې د بحرین د شیخ عیسی په هوايي اډه کې یې د بې‌پیلوټه الوتکو پر مرسته د امریکا پر یوه پوځي رادار برید کړی دی.

دې ځواک زیاته کړې، دا برید د امریکايي پوځي بې‌پیلوټه الوتکو له‌خوا د ایران له هوايي حریم څخه د پرله‌پسې سرغړونو په غبرګون کې شوی دی.

د امریکا مرکزي قومندانۍ دغه ادعا رد کړې او څرګندوي، چې په دې برید کې امریکايي تجهیزاتو ته زیان نه‌دی اړول شوی او نه هم کوم امریکايي سرتېری ټپي شوی دی.

بحرین، چې د امریکا د سمندري ځواکونو د پنځمې بېړۍ کوربه دی، د نومبر پر اته‌لسمه سهار وختي د نویو هوايي بریدونو له شنډولو خبر ورکړ او ایران یې پر دغه هېواد د بریدونو پر دوام تورن کړ.

د دې هېواد کورنیو چارو وزارت دوه بېړني خبرداري خپاره کړل او له اوسېدونکو یې وغوښتل، چې خوندي ځایونو ته پناه یوسي؛ خو وروسته یې اعلان وکړ، چې ګواښ پای ته رسېدلی دی.

د کویټ پوځ هم ویلي، چې د دغه هېواد هوايي دفاعي سیسټمونو د دښمنو بې‌پیلوټه الوتکو پر وړاندې اقدام کړی؛ خو د دغو الوتکو سرچینه یې نه‌ده پر ګوته کړې او د مرګ او ‌ژوبلې یا زیانونو په اړه یې هم معلومات نه‌دي ورکړي.

په هرمز تنګي کې د بېړیو پر وړاندې کړکېچ زیات شوی

د پوځي نښتو له تازه پېښو سره هم‌مهاله، د هرمز تنګي په اوږدو کې پر سوداګریزو بېړیو د بریدونو نور راپورونه هم خپاره شوي دي. هرمز تنګی د انرژۍ او نړیوالې سوداګرۍ یوه مهمه لار ده.

د ایران سپاه پاسداران ځواکونو ویلي، چې د عمان د غنم ټاپو ته څېرمه یوې تېل‌وړونکې بېړۍ هغه مهال اور واخیست، چې له یوه ماین سره ولګېده.

د ایران پاسداران ځواکونو د څرګندونو له مخې، دغه بېړۍ په داسې سمندري مسیر کې روانه وه، چې تهران یې اجازه نه‌وه ورکړې.

په خبرپاڼه کې د بېړۍ نوم او د عملې د غړیو په اړه معلومات  ورکړ شوي نه‌دي.

ایراني ځواکونو په تنګي کې د نورو بېړیو له اور اخیستو هم خبر ورکړی؛ خو رویټرز ویلي، چې دغه ادعاوې یې په خپلواکه توګه  تائید کړي نه‌دي.

دغه راز د بریټانیا د سمندري سوداګرۍ د عملیاتو ادارې (UKMTO) ویلي، چې د عمان د خصب بندر شمالي لوري ته د تر برید لاندې د نیول شوې تېل‌وړونکې بېړۍ عمله نه موندل کیږي.

د راپورونو له مخې، پر دې بېړۍ د نومبر پر شپاړلسمه لومړی برید شوی و، چې له هغې وروسته پرې دوه‌یم برید هم شوی او بیا یې اور اخیستی دی.

د ډیپلوماټیکو هڅو دوام

د پوځي فعالیتونو له بیا زیاتېدا سره- سره د کړکېچ د راکمولو لپاره ډیپلوماټیکې هڅې هم روانې دي او قطر او عمان د واشنګټن او تهران ترمنځ د کړکېچ کمولو لپاره خپلې اړیکې روانې ساتي.

د قطر بهرنیو چارو وزارت ویاند ماجد الانصاري د نومبر پر اووه‌لسمه ویلي، چې د دواړو لوریو ترمنځ د اختلافونو د راکمولو لپاره د منځګړیتوب هڅې روانې دي.

هغه خبرداری ورکړی، چې د کړکېچ زیاتېدا به سمندري تګ راتګ، نړیوال اقتصاد او د هوکړې د ترلاسه کولو فرصتونه له ګواښ سره مخ کړي او له ټولو لوریو یې د زغم غوښتنه کړې ده.

د ایران بهرنیو چارو وزیر عباس عراقچي هم عمان ته تللی او هلته یې له سلطان هیثم بن طارق او د بهرنیو چارو له وزیر بدر البوسعیدي سره لیدلي دي.

د عمان بهرنیو چارو وزارت ویلي، چې په دغو خبرو کې د کړکېچ د کمولو او د بحران د سوله‌ییز حل لپاره د زمینې برابرولو پر هڅو بحث شوی دی.

په انقره کې د ترکیې بهرنیو چارو وزیر هاکان فیدان د هرمز تنګي د بیا پرانیستل کېدا او د امریکا او ایران ترمنځ د خبرو د ژر او مثبتې پای ته رسېدا غوښتنه کړې ده.

فیدان له تهران څخه غوښتي، چې د اختلاف د حل لپاره خپله لېوالتیا څرګنده کړي او ټینګار یې کړی، چې د سمندري تګ راتګ خونديتوب بېرته ټینګول او د ګاونډ هېوادونو امنیتي اندېښنو ته رسېدنه مهمه ده.

دغه جګړه د فبرورۍ پر اته‌ویشتمه د امریکا او اسرائیلو له‌خوا پر ایران د بریدونو له پیل سره رامنځته شوې ده. واشنګټن د ایران پر بندرونو بندیز لګولی دی. په داسې حال کې، چې تهران اوس هم د هرمز تنګي له لارې بحري تګ راتګ محدودوي.

دا په داسې حال کې ده، چې د بحري تګ راتګ د لاسرسي او د امریکا د بندیزونو پر سر اختلافونه اوس هم د جګړې د پای ته رسولو لپاره د ډیپلوماټیکو هڅو پر وړاندې لوی خنډونه دي.

Continue Reading

سیمه ییز خبرونه

سعودي ائتلاف د توغول شويو بالسټیک توغنديو او بې‌پیلوټه الوتکو مخه ونیوله

حوثیانو، چې د یمن ګڼ مېشتې سیمې تر خپل واک لاندې لري؛ په وروستیو ورځو کې د سعودي پر پلازمېنه خپل بریدونه زیات کړي دي.

Published

on

 

د سعودي عربستان پر مشرۍ ائتلاف، چې په یمن کې د ایران پلوه حوثيانو پر وړاندې جګړه کوي؛ وايي، چې د یکشنبې پر ورځ یې د سعودي پلازمېنې ریاض پر لور د توغول شويو دوه بالسټیک توغنديو او د دې هېواد په ختیځه نفت‌لرونکې سیمه کې د درې بې‌پیلوټه الوتکو مخنیوی کړی دی.

حوثیانو، چې د یمن ګڼ مېشتې سیمې تر خپل واک لاندې لري؛ په وروستیو ورځو کې د سعودي پر پلازمېنه خپل بریدونه زیات کړي دي.

د رویټرز د راپور له مخې، تېره اوونۍ پر ریاض د حوثیانو په یوه برید کې د سعودي د تېلو دولتي شرکت آرامکو یوه اداري ودانۍ زیانمنه شوې وه.

د سعودي عربستان ختیځه سیمه، چې د دغه هېواد د اقتصاد مهمه سرچینه ده؛ په تېرو څو اوونیو کې د حوثیانو د څو بریدونو موخه ګرځېدلې ده.

په دې سیمه کې د سعودي عربستان د تېلو او ګازو ډېری زېرمې پرتې دي او د آرامکو شرکت مرکزي دفتر هم په کې دی.

دغه دفتر هم د اوکټوبر د میاشتې په یوه برید کې سخت زیانمن شوی و.

دا په داسې حال کې ده، چې حوثیانو پر سعودي هوايي ډګرونو، بندرونو او د تېلو پر تاسیساتو بریدونه زیات کړي او سعودي عربستان هم په ځواب کې د یمن د حوثیانو پر مورچلو هوايي بریدونه ډېر کړي دي.

Continue Reading

سیمه ییز خبرونه

د سعودي عربستان په مکه کې د دوه توغندیو د شنډولو پاتې شوني لوېدلي

د سعودي دولتي ټلویزیون راپور ورکړی، چې د توغندیو پاتې شوني په« سبوحه» نومي کلي کې، چې د مسجدالحرام شمال ختیځ لوري ته شاوخوا ۳۵ کیلومټره واټن لري او د« وادي المغمس» په سیمه کې، چې د دې جومات ختیځ ته شاوخوا ۲۱ کیلومټره لرې پرته ده؛ لوېدلي دي.

Published

on

 

د سعودي عربستان چارواکو ویلي؛ د چارشنبې پر ورځ د دغه هېواد د مکې په اړوند سیمه کې د هوايي دفاعي سیسټمونو له‌خوا د شنډ شويودوه بالسټیک توغندیو پاتې شونيراغورځېدلي دي.

د سعودي دولتي ټلویزیون راپور ورکړی، چې د توغندیو پاتې شوني په« سبوحه» نومي کلي کې، چې د مسجدالحرام شمال ختیځ لوري ته شاوخوا ۳۵ کیلومټره واټن لري او د« وادي المغمس» په سیمه کې، چې د دې جومات ختیځ ته شاوخوا ۲۱ کیلومټره لرې پرته ده؛ لوېدلي دي.

د سعودي عربستان د ملکي دفاع ادارې په خبرپاڼه کې راغلي، توغندي د دې سیمې پر لوري توغول شوي وه؛ خو د دې هېواد هوايي دفاعي ځواکونو شنډ او له منځه وړي دي.

حوثیانو څو ځله د سعودي عربستان هغه تورونه رد کړي، چې ګواکې د مسلمانانو دوه سپېڅلي ښارونه مکه او مدینه یې پر نښه کړي دي. هغوی وايي، پوځي عملیات یې د سعودي عربستان په نورو سیمو کې پر پوځي تاسیساتو او سټراټیژیکو موخو متمرکز دي.

د سعودي عربستان ملکي دفاع ادارې د پنجشنبې په لومړیو ساعتونو کې څرګنده کړې:« پر ملکي سیمو دښمنانه بریدونه له نړیوالو بشري قوانینو ښکاره سرغړونه ده او د حوثي ملېشو هغه خطرناکه دښمنانه تګلاره څرګندوي، چې دوی یې تعقیبوي.»

حوثیانو په ۲۰۱۴ز.کال کې د یمن پلازمېنه صنعا ونیوله، چې له کبله یې سعودي عربستان په راتلونکي کال کې د یمن د نړیوالې ټولنې له‌خوا په رسمیت پېژندل شوي حکومت پر ملاتړ پوځي مداخله وکړه.

په ۲۰۲۲ز.کال کې د ملګرو ملتونو پر منځګړیتوب د اوربند هوکړې تر ډېره جګړې ودرولې؛ خو د روان میلادي کال په لومړیو کې کړکېچونه بېرته پیل شول. حوثیانو د توغندیو او بې‌پیلوټه الوتکو پر مټ د سعودي عربستان پر خاوره بریدونه وکړل او ریاض هم په یمن کې هوايي بریدونه پیل کړل.

د جګړو زیاتېدا د باب‌المندب سټراټیژیکه اوبلاره هم له ګواښ سره مخ کړې ده. دا اوبلاره د بېړیو د تګ راتګ یوه مهمه لاره ده، چې سره بحیره د عدن له خلیج سره نښلوي.

Continue Reading
Advertisement

Trending

Copyright © 2026 Ariana News. All rights reserved!