د دوشنبې پر ورځ(د زمري شپږمه ) د اسلامي امارت د لوړ پوړو چارواکو په شتون کې له افغانستان څخه قطر ته د ۲۰۰۰ ماهرو او مسلکي کارګرانو د لېږلو پروګرام پرانیستل شو.

د اسلامي امارت اقتصادي مرستیال ملاعبدالغني برادر قطر ته د ۲۰۰۰ کارګرانو د لېږلو د پروګرام د پرانیستلو پر مهال ویلي، چې حکومت د فقر او بې کارۍ کمولو ته ژمن دی او په دې برخه کې یې ډېرې هڅې کړې دي.

د رییس الوزرا اقتصادي مرستیال وايي چې اسلامي امارت د بې وزلۍ او بې کارۍ د کمولو لپاره مختلف پروګرامونه ترسره کړي دي، چې یو یې بهر ته د کارګرانو لیږل دي.

عبدالغني برادر زیاته کړې؛ د کارګرانو له لېږلو سره به د افغانستان اړیکې له نورو هېوادونو سره هم پیاوړې شي.

دغه راز د کار او ټولنیزو چارو وزارت چارسمبالي وایي، چې د کارګرانو د لېږلو په اړه له نورو هېوادونو لکه ترکیې، متحده عربي اماراتو او سعودي عربستان سره خبرې روانې دي.

د کار او ټولنیزو چارو وزارت چارسمبالي عبدالمنان عمري هیله‌من دی، چې هېوادونو ته د ماهرو کارګرانو د لېږلو د بهیر پر پیل به د ناقانونه کډوالۍ مخه ونیول شي او وزارت د ترکیې، سعودي عربستان او متحده عربي اماراتو سره هم خبرې اترې کړې دي.

د بهرنیو چارو وزارت مرستیال محمد نعیم ويلي، چې دا نه یوازې یو ټولنیز پرمختګ دی، بلکې د سیاسي، اقتصادي او کلتوري اړیکو په پراختیا کې هم یو پرمختګ دی او د بهرنیو چارو وزارت خپل مسؤلیتونه ترسره کوي.

دا په داسې حال کې ده، چې ډېری افغانان په ډېرو هېوادونو کې ناقانونه کار کوي او دا لومړی ځل دی، چې په افغانستان کې په قانوني بڼه نورو هېوادونو ته د کارګرانو د لېږلو پرېکړه کړې ده.