د پاکستان پخواني لومړي وزیر عمران خان، چې اوسمهال په زندان کې دی؛ زامنو یې د خپل پلار د روغتیا په اړه اندېښنه څرګنده کړې او خبرداری ورکوي، چې هغه د وروستي ځل لپاره درې اوونۍ مخکې ژوندی لیدل شوی دی.

د رویټرز د څرګندونو له مخې؛ د محکمې د اونیزو لیدنو له امر سره – سره د خان کورنۍ هغه ته مستقیم یا د تائید وړ لاسرسی نلري.

د هغه زوی قاسم خان ویلي: “نه پوهیږي، چې پلار مو روغ، ټپي یا ان ژوندی دی؛ دا د رواني ځورونې یوه بڼه ده.”

د خان کورنۍ پرله‌پسې د هغه شخصي روغتیا ته د لاسرسي غوښتنه کړې؛ خو د یو کال پر تېرېدو هم دې لاسرسي ته ونه‌رسېدل او د پاکستان کورنیو چارو وزارت دې غوښتنې ته له څه ویلو ډډه کړې. په داسې حال کې، چې د زندان یوه ناڅرګند چارواکي رویټرز ته ویلي، چې خان په ښه روغتیایي حالت کې دی او د بشپړ امنیت لرونکي زندان ته یې د لېږدولو هیڅ پلان نشته.

۷۳ کلن عمران خان د ۲۰۲۳ له اګست راپدېخوا د هغو تورونو له کبله، چې هغه يې سیاسي او غچ اخیستونکی بولي په زندان کې ساتل شوی دی. هغه لومړی په “توشه‌خانه” نومې قضیه کې؛ د لومړي وزارت پر مهال د ډالیو د غیرقانوني پلورلو پر تور ونیول شو. بیا د ډیپلوماټیک سند د افشا کولو له کبله پر ۱۰ کلن بند او د فساد په قضیه کې پر ۱۴ کلن بند محکوم شوی دی.

د پاکستان تحریک انصاف (PTI) ګوند وايي، چې دا دوسیې له سیاسي او ټاکنیز بهیر څخه د عمران خان د لرې کولو لپاره ډیزاین شوې دي.

د خان کورنۍ دا هم ویلي، چې د چارواکو له‌خوا بشپړه چوتیا او د اړیکو نشتوالي اندېښمن کړي او د خلکو له سترګو څخه د هغه د لرې ساتلو لپاره یې د قصدي هڅو احساس رامنځته کړی دی.

قاسم خان زیاته کړې: “دا انزوا قصدي ده. دوی ترې وېره لري. هغه په ​​پاکستان کې ترټولو ګران مشر دی او دوی پوهیږي، چې نشي کولی هغه پر ​​ډیموکراټیک بڼه مات کړي.”

د خان کورنۍ له کورنیو او نړیوالو بشري حقونو ادارو سره اړیکه نیولې او هغه یې د لاسرسي او د محکمې د حکم سمدستي پلي کولو غوښتنه کړې ده.

قاسم خان ویلي:”دا یوازې یوه سیاسي شخړه نده؛ دا د بشري حقونو ناورین هم دی. باید له ټولو خواوو فشار رامنځته شي. هغه مونږ ته انرژي راکوي؛ اړتیا ده پوه شو، چې هغه خوندي او په امن کې دی.”

د پولیسو د لومړنیو څرګندونو له مخې؛ د دوشنبې پر ورځ( د لیندۍ درېیمه) په پېښور کې د پاکستان امنیتي ځواکونو پر مرکزي دفتر د خونړي وسلوال او ځانمرګي برید له کبله لږ تر لږه ۳ فډرالي پولیس وژل شوي او څلور نور ټپیان دي.

په پېښور ښار کې د پولیسو قومندان میا سعید رسنیو ته څرګنده کړې، چې د وژل شویو کسانو څخه درې یې د دروازې اړوند ساتونکي وه، چې یوه ځانمرګی بریدګر پرې خپل چاودېدونکي توکي وچول او دوه نور بریدګر د امنیتي ځواکونو له‌خوا ووژل شول.

د سیمې اړوند اوسېدونکو په ټولنیزو رسنیو کې له دوه چاودنو راپور ورکړی او څرګندوي، چې دوی د ډزو غږونه هم واورېدل.

پاکستانيو چارواکو تائید کړې، چې چاودنې د دوه ځانمرګو بریدګرو له‌خوا ترسره شوې؛ لومړی یو د امنیتي ځواکونو د مرکز پر دروازه برید وکړ او بل یې ودانۍ ته ننوت.

په پېښور کې د امنیتي ځواکونو مرکزي دفتر ته تلونکې لارې تړل شوي او امنیتي ځواکونو سیمه کلابنده کړې او وضعیت یې تر کنټرول لاندې راوستی دی.

ویل کیږي، چې دې برید د سیمې د اوسېدونکو ترمنځ د اندېښنو او وېرې څپې راپورته کړې دي.

د تهران او واشنګټن ترمنځ تاوتریخوالی په داسې حال کې یو ځل بیا راپورته شوی، چې د ایران بهرنیو چارو وزارت ويلي؛ د امریکا اوسنی چلند ښیي، چې واشنګټن “عادلانه او برابرو خبرو ” ته لازم چمتو نلري.

دا څرګندونې له هغې وروسته راپورته شوې، چې د امریکا ولسمشر ډونالډ ټرمپ تېره اوونۍ د نویو خبرو اترو د امکان په اړه یوه نغوته وکړه؛ خو ایراني چارواکي ټینګار کوي، چې د واشنګټن وروستۍ تګلاره د رغنده ډیپلوماسۍ پر ضد ده.

د اټومي خبرو د بیا پیلولو هڅې له هغې وروسته ودرول شوې، چې اسرائیلو د روان کال په جون کې د ایران دننه پر اټومي اهدافو برید وکړاو بیا ورسره د امریکا بریدونه هم مل شول.

امریکا، اروپايان او اسرائیل پر تهران تور لګوي، چې د وسلو د تولید وړتیا ترلاسه کولو لپاره یې خپل اټومي پروګرام پټ کړی؛ خو ایران تل ټینګار کړی، چې د دوی اټومي پروګرام یوازې د سوله‌ییزو موخو لپاره دی.

له ۱۲ ورځنۍ جګړې مخکې تهران او واشنګټن پېنځه پړاوه غیر مستقیمې خبرې اترې کړې وې؛ خو د ایران د یورانیمو د غني کولو په څېر اختلافونه، چې امریکا یې درول غوښتل، خبرې ودرولې.

د ایران بهرنیو چارو وزیر عباس عراقچي د ” تر برید لاندې نړیوال قانون ” تر سرلیک لاندې په یوه کنفرانس کې وویل: “امریکا د خبرو په میز کې هغه څه نشي ترلاسه کولی، چې په جګړه کې یې ندي ترلاسه کړي.”

هغه زیاته کړې: “ایران تل د ډیپلوماسۍ لپاره چمتو دی؛ خو د هغو خبرو اترو لپاره نه، چې د بل تر اغېز لاندې وي.”

دغه راز په دې کنفرانس کې د بهرنیو چارو وزارت مرستیال سید خطیب زاده واشنګټن تورن کړ، چې “د خبرو بهیر پر ننداریز کولو” هغه اهداف ترلاسه کول غواړي، چې امریکا یې د جګړې پرمهال لټه کوله.

د ایراني چارواکو د څرګندونو له مخې؛ د خبرو اترو میز ته راستنېدا به یوازې هغه وخت شونې وي، چې امریکا “رښتینی، له درناوي ډک او برابر ” چلند غوره کړي.