د افغانستان کرکټ ملي لوبډلې د یکشنبې پر ورځ په شارجه کې د شلآاوریزو سیالیو د لړۍ په درېیمه او وروستۍ لوبه کې زیمبابوی ته د اووه ویکټو پر توپیر ماتې ورکړه او د درې واړو لوبو پر ګټلو یې د سیالیو لړۍ پخپل نوم کړه.

د افغانستان چپ‌لاسي توپ‌اچوونکي نور احمد د لوبې په دې پړاو کې د پام وړ لوبه وکړه او په ۳.۳‌آورونو کې یې د ۱۳ منډو پر جوړولو د زیمبابوې پنځه لوبغاړي وسوځول. د نوموړي په دې غوره توپ‌اچونه کې زیمبابوی لوبډله په ‌‌۱۴.۳آورونو کې د ۷۹ منډو پر جوړولو وسوځېده.

افغانستان د ۸۰ منډو هدف په ۸.۱آورونو کې د درې ویکټو پر زیان پوره کړ او د اووه ویکټو پر توپیر یې بریا خپله کړه.

دا د زیمبابوی پر وړاندې په ۲۴ شل‌آوریزو نړیوالو سیالیو کې د افغانستان دوه‌ویشتمه بریا وه. دغه راز، د پاتې توپونو له مخې دا د افغانستان دوه‌یمه ستره بریا هم وه.

د لوبې په پیل کې د افغانستان چټکو توپ‌اچوونکو په شارجه لوبغالي کې د نوي توپ لپاره د خوځښت زمینه برابره کړه او د زیمبابوی پر لوبغاړو یې فشار راوړ.

فضل‌الحق فاروقي د لوبې په لومړي آور کې اینوسنټ کایا وسوځاوه او عظمت‌الله عمرزي، چې د لړۍ د غوره لوبغاړي جایزه یې هم ترلاسه کړه؛ په دوه‌یم آور کې براین بنیټ له ډګره بهر کړ او زیمبابوی د دوه ویکټو پر زیان یوازې اته منډې جوړې کړې.

د افغانستان نوي لوبغاړي عبدالله تره‌خېل هم په خپله لومړۍ نړیواله لوبه کې د زیمبابوی لوبډلمشر سکندر رضا وسوځاوه او د سیالې لوبډلې ستونزې یې نورې هم زیاتې کړې.

راین برل د زیمبابوی لپاره تر یوه بریده مقاومت وکړ او پر ۲۹ توپونو یې ۳۰ منډې جوړې کړې، چې څو څلوریزې یې هم وهلې وې؛ خو د عبدالله احمدزي له‌خوا د هغه سوځېدا د زیمبابوی د بېرته سیالۍ ته د راګرځېدا هیلې کمزورې کړې.

نور احمد په یوولسم‌آور کې د زیمبابوې د توپ‌وهونکو پر وړاندې واکمن شو او پر څلور توپونو یې درې لوبغاړي وسوځول، چې له دې سره یې د سیالې لوبډلې د توپ‌وهنې وروستۍ برخه له منځه یووړه.

نوموړي لومړی وېسلي ماډیویري د سټمپ پر مټ وسوځاوه، ورپسې تفاډزوا ټسیګا د سلیپ په سیمه کې توپ‌نیونکي ونیو. له دې وروسته ټاډیواناشي ماروماني د عمرزي پر ښکلې ټوپ‌وهونکې توپ‌نیونې وسوځېد او نور احمد د هیټریک له ترلاسه کولو لږ پاتې شو.

نور احمد په راتلونکو دوه‌آورونو کې دوه نور لوبغاړي هم وسوځول او خپله غوره لوبه یې د ۱۳ منډو په بدل کې د پنځه ویکټو پر ترلاسه کولو پای ته ورسوله او زیمبابوی لوبډله پر ۷۹ منډو وسوځېده.

دا په شل‌آوریزو نړیوالو سیالیو کې د نور احمد تر ټولو غوره لوبه وه.

نوموړي خپل پخوانی ریکارډ، چې په ۲۰۲۲ز. کال کې یې هم د زیمبابوی پر وړاندې په هرارې کې پر ۱۰ منډو د څلور ویکټو پر ترلاسه کولو جوړ کړی و؛ مات کړ.

افغانستان د هدف د ترلاسه کولو په هڅه کې محمد اکرم ژر له لاسه ورکړ، چې ۱۲ چټکې منډې یې کړې وې؛ خو دې چارې د کوربه لوبډلې پر چټکې لوبې اغېز ونه‌کړ.

صدیق‌الله اتل پر چټکه توپ‌وهنه څو څلوریزې ووهلې او افغانستان یې د هدف ترلاسه کولو ته نږدې کړ.

عظمت‌الله عمرزي او لوبډلمشر ابراهیم ځدراڼ هم خپلې بریدیزه توپ‌وهنې روانه وساتله.

ځدراڼ د ایرنسټ ماسکوکو په یوه آور کې څلور څلوریزې ووهلې او ورپسې عمرزي پر پیاوړې شپږیزې د افغانستان بریا بشپړه کړه.

افغانستان د درې ویکټو پر زیان په ۸.۱‌آورونو کې ۸۰ منډې جوړې کړې او زیمبابوی ته یې د اووه ویکټو پر توپیر ماتې ورکړه او افغانستان د شلآاوریزو نړیوالو سیالیو درې‌لوبیزه لړۍ ۳ پر ۰ وګټله.

د دغې لړۍ بریا یو ځل بیا په شل‌آوریزو سیالیو کې د افغانستان د ملي لوبډلې پیاوړې لوبه وښوده او د راتلونکو نړیوالو سیالیو لپاره یې د لوبډلې ښه چمتووالی څرګند کړ.

د افغانستان کرکټ ملي لوبډلې د یکشنبې پر ورځ د هانګ‌کانګ د نړیوالو شپږآاوریزو سیالیو په پایلوبه کې استرالیا ته د څلور ویکټو پر توپیرماتې ورکړه او د ۲۰۲۶ز.کال اتلولي یې خپله کړه.

استرالیا د پچې له ګټلو وروسته لومړی توپ‌وهنه وکړه او په شپږآورونو کې یې ۱۱۵ منډې جوړې کړې. مکس براینټ د استرالیا پر ګټه ۴۴ منډې وکړې.

افغانستان ټاکلی هدف په ۵.۱‌آورونو کې پوره کړ او لوبه یې له پنځه پاتې توپونو سره وګټله.

عمران میر پر ۱۴ توپونو ۵۳ منډې وکړې، چې اووه شپږیزې یې هم ووهلې.

فرمان‌الله هم ۲۶ منډې جوړې کړې.

په دغو سیالیو کې ۱۲ لوبډلو ګډون کړی و.

افغانستان له سویلي افریقا، عمان او سکاټلینډ څخه له بریا وروسته پایلوبې ته لار موندلې وه او په پایلوبه کې یې استرالیا ته پر ماتې ورکولو د اتلولۍ جام وګاټه.

د افغانستان له ۱۵ کلنو ټیټ عمره فوټبال ملي لوبډلې د سیالیو د کوربه آذربایجان پر وړاندې د پنالټیو په وهلو بریا خپله کړه او د فیفا د اړوند لومړي نړیوال جام او فوټبال نندارې د سیالیو له پای ته رسېدا سره یې په ۱۸۹ ګډونوالو هېوادونو کې دري‌اتیایم مقام خپل کړ.

افغان لوبډلې د جمعې پر ورځ د دري‌اتیایم مقام خپلولو لپاره د باکو ښار په لوبغالي کې له آذربایجان سره ۳-۳ مساوي لوبه وکړه؛ خو د پنالټیو پر وهلو یې د ۳ پر ۲ پایلې پر ترلاسه کولو بریا خپله کړه او سیالۍ یې بریالۍ پای ته ورسولې.

افغان لوبډلې په دغو سیالیو کې د سیرالیون، جیبوټي، سوډان، نامیبیا، هند او آذربایجان پر وړاندې شپږ بریاوې ترلاسه کړې؛ خو د ترکیې، روسیې، تایلینډ او هنګري پر وړاندې یې څلور لوبې وبایللې.

د فیفا له ۱۵ کلنو ټیټ عمره فوټبال لوبډلې لومړی نړیوال جام او فوټبال ننداره په ۲۰۲۶ز.کال کې د ۱۸۹ هېوادونو پر ګډون ترسره شوه.د اسپانیا لوبډلې په پایلوبه کې د چک جمهوریت لوبډلې ته ۳ پر ۰ ماتې ورکړه او د دغو سیالیو اتلولي یې خپله کړه.