د افغانستان اسلامي امارت بهرنیو چارو وزارت ویلي، چې امیرخان متقي د چین له ځانګړي استازي یوی شیایونګ سره د دواړو هېوادونو ترمنځ د دوه اړخیزو اړیکو پر پراختیا، د سیمې پر وروستیو تحولاتو او د پاکستان له لوري د افغانستان پر ملي حاکمیت د پوځي تېري پر وروستي وضعیت خبرې کړې دي.

د افغانستان بهرنیو چارو وزارت د خپرې شوې خبرپاڼې له مخې؛ په دې خبرو کې امیرخان متقي د افغانستان او چین اړیکې مثبتې وبللې او هیله یې څرګنده کړه، چې دواړه هېوادونه به په بېلابېلو برخو کې خپلې اړیکې نورې هم پراخې او عملي کړي.

نوموړي همداراز ورسره د پاکستان له لوري د افغانستان پر ملي حاکمیت او ځمکني بشپړتیا د وروستیو بریدونو په اړه نه یوازې د افغانستان اسلامي امارت دریځ شریک کړ، بلکې ټینګار یې کړی، چې افغانستان د شخړو پر ځای د ستونزو سوله‌ییز حل ته لومړیتوب ورکوي او غواړي، چې د کړکېچ سطحه لوړه نشي؛ خو د هېواد او خلکو دفاع هم خپل حق بولي.

په خبرپاڼه کې راغلي؛ د چین ځانګړي استازي د پاکستان د وروستیو بریدونو له کبله د شهید شویو افغانانو له کورنیو سره د حکومت د خواشینۍ اوخواخوږۍ د څرګندولو تر څنګ ویلي، چې د افغانستان او پاکستان ترمنځ روانې ستونزې باید د خبرو او ډیپلوماسۍ له لارې حل شي، چې ورسره د سیمې د ثبات لپاره د کړکېچ کچه لوړه نشي.

هغه ټینګار کړی؛ چین په دې اړه له پاکستاني لوري سره هم په تماس کې دی او کوښښ کوي، چي د دواړو ګاونډ هېوادونو تر منځ تاوتریخوالی راکم او رغنده اړیکې رامنځته شي.

 د افغانستان د سولې په چارو کې د امریکا پخواني ځانګړي استازي زلمي خلیلزاد په ایکس پاڼه کې د ښځو د نړیوالې ورځې پر مناسبت د افغانستان له اسلامي امارت څخه وغوښتل؛ نجونو او ښځو ته اجازه ورکړئ، چې ښوونځیو او پوهنتونونو ته بېرته ولاړې شي.

دغه راز د ملګرو ملتونو د ښځو برخې هم په افغانستان کې هغه ننګونې روښانه کړي، چې ښځې او نجونې ورسره مخ دي.

دې بنسټ څرګنده کړې؛ هغه عام بنسټونه، چې یو وخت یې په افغانستان کې ښځې او نجونې سره یوځای کولې اوس تړل شوي دي.

دغه راز یې ټینګار کړی، چې دا ډول وضعیت باید عادي ونه ګڼل شي.

د ملګرو ملتونو د ښځو بنسټ دا هم ویلي: کله، چې نړیواله ټولنه له افغان ښځو سره ودریږي؛ معنالرونکی بدلون اوس هم شونی دی.

د یادونې ده، چې په افغانستان کې اوس هم له شپږم ټولګي څخه پورته د نجونو زده‌کړې او پوهنتونونو ته د ښځو لاسرسی محدود پاتې دی، چې د نړیوالو بنسټونو او بشري حقونو د بېلابېلو ډلو پراخه اندېښنه یې راپورته کړې ده.

اسلامي امارت ويلي، چې د ښځو ټول حقونه تضمین شوي او د ښوونځیو د بیا پرانیستلو لپاره هڅې روانې دي.