د اسلامي امارت بهرنیو چارو وزیر امیرخان متقي د روسیې د ولسمشر له ځانګړي استازي ضمیر کابلوف سره په لیدنه کې د سیاسي او اقتصادي اړیکو پر پراختیا او پیاوړتیا هر اړخیز بحث کړې دی.

د بهرنیو چارو وزارت په خپره شوې خبرپاڼه کې راغلي، چې امیر متقي د افغانستان او روسیې ترمنځ د اړیکو له پراختیا هرکلی کړی او د اقتصادي همکاریو د پیاوړتیا، د ګډ اقتصادي کمیسیون د فعالېدا او د سیاسي مشورو لپاره د منظم چوکاټ پر جوړېدا ټینګار کړی دی.

دواړو لوریو د سیمې پر وضعیت، ثبات او امنیت ټینګار کړی او له ګاونډ هېوادونو سره یې د اړیکو د پیاوړتیا په اړه اندونه تبادله کړل او د ګډو هڅو پر اړتیا یې ټینګار وکړ، چې د رغنده تعامل او سیمه‌ییز ثبات لپاره زمینه برابره شي.

په دې غونډه کې ضمیر کابلوف د افغانستان او روسیې ترمنځ د اړیکو مثبت بهیر ستایلی او څرګندوي؛ هېواد یې چمتو دی، چې له افغانستان سره اقتصادي همکاري، په ځانګړي توګه د سوداګرۍ، انرژۍ او ټرانزیټ په برخو کې عملي ګامونه واخلي.

ویل کیږي، چې روسیه غواړي د ګډو اقتصادي پروژو، پانګونې او بنستیزو همکاریو له لارې د دواړو هېوادونو اړیکې نورې هم پیاوړې او د سیمه‌ییز ثبات ترڅنګ اقتصادي نښلېدا پراخه کړي.

په افغانستان کې د ملګرو ملتونو مرستندویه پلاوي (یوناما) ویلي، چې د تېرې ورځې له غرمې وروسته د پاکستاني پوځیانو د بریدونو له کبله د کونړ ولایت مرکز اسعدآباد په ځینو سیمو کې لسګونه ملکي وګړو ته مرګ او ژوبله رامنځته شوې ده.

یوناما خبریالانو ته لیکي؛ دا پېښه پر یوه پوهنتون برید هم رانغاړي، چې په کې ملکي وګړو ته د پام وړ مرګ او ‌ژوبله اوښتې ده.

دې بنسټ ټینګار کړی، چې د نړیوالو بشردوستانه قوانینو له مخې؛ ملکي وګړي او عامه ځایونه، په ځانګړي توګه ښوونیز مرکزونه باید په هر حالت کې له بریدونو وساتل شي.

یوناما د قربانیانو له کورنیو سره خواخوږي څرګنده کړې او د دې پېښې ټپیانو ته یې د ژر روغتیا هیله کړې ده.

ملګرو ملتونو ویلي، چې د دې ټولنې عمومي منشي انټونیو ګوترش، د فرانسې برونو ژرژ لمرکي د افغانستان لپاره د خپل ځانګړي استازي د مرستیال په توګه ټاکلی دی.

د یادې خبرپاڼې له مخې؛ ژرژ لمرکي به د افغانستان لپاره د ملګرو ملتونو د مرستندویه پلاوي(یوناما) په چوکاټ کې دنده ترسره کوي او هم‌مهاله به د میښت همغږي کوونکي او د بشري چارو د همغږي کوونکي مسوولیت هم پر غاړه ولري.

هغه به د انډریکا راټواټه ځای‌ناستی وي، چې له دې مخکې یې په دې دنده کار کاوه.

د ملګرو ملتونو د څرګندونو له مخې؛ برونو ژرژ لمرکي له دې مخکې له ۲۰۲۲ ز.کال راپدېخوا په کانګو ډیموکراټیک جمهوریت کې د ملګرو ملتونو د ثبات ماموریت د ځانګړي استازي د مرستیال په توګه کار کړی او هم‌مهاله یې د میشت او بشري چارو د همغږي کوونکي دنده ترسره کړې ده.

هغه همدارنګه په هایټي کې د ملګرو ملتونو د یوځای شوي دفتر د ځانګړي استازي د مرستیال په توګه دنده ترسره کړې او د پراختیا، بشري مرستو، بیا رغونې او د سولې جوړونې په برخو کې پراخه تجربه لري.

د معلوماتو له مخې؛ لمرکي د ملګرو ملتونو د پراختیايي پروګرام په بېلابېلو برخو کې هم کار کړی او په بېلابېلو هېوادونو لکه سومالیا، هایټي، فلسطیني سیمو او کمبودیا کې یې ډګرني ماموریتونه ترسره کړي دي.

هغه د فرانسې د تودو سیمو د کرنې په برخه کې د انجنیرۍ سند لري او پر فرانسوي ژبې سربېره پر انګلیسي ژبه هم بشپړ تسلط لري.

دا ټاکنه په داسې حال کې رامنځته شوې، چې افغانستان اوس هم له جدي بشري او اقتصادي ننګونو سره مخ دی او د نړیوالو مرستو د اغېزمنې همغږۍ رول ورځ تر بلې ارزښتمن کیږي.