د افغانستان لپاره د روسیې د ولسمشر ځانګړي استازي ضمیر کابلوف ویلي، مسکو چمتو دی، چې د افغانستان او پاکستان ترمنځ د جګړې د پای ته رسولو لپاره د دواړو خواوو پر غوښتنه؛ مرسته وکړي.

کابلوف د افغانستان په اړه د« مسکو فارمټ» له غونډې وروسته خبریالانو ته ویلي، د کابل او اسلام‌‌آباد ترمنځ د اختلافونو له کبله د غونډې په پای کې هیڅ وروستی سند خپور نه‌شو.

هغه زیاته کړې، ټولو ګډونوالو له دواړو خواوو پرته له استثنا غوښتي، چې د یو بل پر وړاندې له پوځي اقدامه ډډه وکړي؛ ځکه، چې په داسې شخړو کې تر ټولو مخکې ملکي وګړي زیانمن کیږي.

دا په داسې حال کې ده، چې د بهرنیو چارو وزیر امیرخان متقي د روسیې بهرنیو چارو له وزیر سرګي لاوروف سره د لیدني پر مهال د دواړو هېوادونو پر دوه‌اړخیزو اړیکو، اقتصادي او سوداګریزو همکاریو او سیمه‌ییزو بدلونونو خبرې کړې دي.

د افغانستان بهرنیو چارو وزارت ويلي، د بهرنیو چارو وزیر امیرخان متقي د روسیې بهرنیو چارو له وزیر سرګي لاوروف سره لیدلي او د دواړو هېوادونو پر دوه‌اړخیزو اړیکو، اقتصادي او سوداګریزو همکاریو او سیمه‌ییزو بدلونونو خبرې کړې دي.

د دې وزارت د څرګندونو له مخې، امیرخان متقي د کابل او مسکو ترمنځ د سیاسي همغږۍ پر پیاوړتیا او په اقتصادي، سوداګریزو او ټرانزیټي برخو کې د همکاریو پر زیاتولو ټینګار کړی او څرګندوي، چې افغانستان له روسیې سره د اوږدمهالو همکاریو پراختیا ته ارزښت ورکوي.

لاوروف د دواړو هېوادونو ترمنځ د سیاسي سلا مشورو پر دوام ټینګار کړی او له افغانستان سره یې د اقتصادي او سوداګریزو اړیکو د پیاوړتیا لپاره د روسیې لېوالتیا څرګنده کړې ده.

دواړو لوریو د سیمه‌ییز ثبات، د نشه‌يي توکو پر وړاندې د مبارزې او د امنیت د ټینګښت په اړه هم خبرې کړې دي.

دغه راز کابلوف د افغانستان په اړه د« مسکو فارمټ» له غونډې وروسته خبریالانو ته ویلي، د کابل او اسلام‌‌آباد ترمنځ د اختلافونو له کبله د غونډې په پای کې هیڅ وروستی سند خپور نه‌شو.

هغه زیاته کړې، ټولو ګډونوالو له دواړو خواوو پرته له استثنا غوښتي، چې د یو بل پر وړاندې له پوځي اقدامه ډډه وکړي؛ ځکه، چې په داسې شخړو کې تر ټولو مخکې ملکي وګړي زیانمن کیږي.

د افغانستان بهرنیو چارو وزیر امیرخان متقي ویلي، چې د افغانستان او پاکستان ترمنځ شته ستونزې؛ که امنیتي، سیاسي او که اقتصادي وي، د خبرو او ډیپلوماسۍ له لارې د حل وړ دي.

متقي د دوشنبې پر ورځ د افغانستان په اړه د مسکو فارمټ په غونډه کې ویلي؛ افغانستان نه غواړي، چې له پاکستان سره اړیکې د یو بل پر وړاندې د تورونو لګولو او تبلیغاتو پر ډګر بدلې شي او ټینګار یې کړی: د کابل موخه د«ستونزې حل» دی، نه د هغې د دوام لپاره د نویو لارو موندل.

هغه زیاته کړې:« زمونږ اساسي دریځ دا دی، چې د افغانستان او پاکستان ترمنځ شته ستونزې، که امنیتي، سیاسي او که اقتصادي وي، د خبرو او ډیپلوماسۍ له لارې حل کېدی شي.»

دغه راز د بهرنیو چارو وزیر د افغانستان پر وړاندې د پاکستان د پوځي رژیم پر چلند نیوکه کړې او څرګندوي، اسلام‌آباد د سیاسي تفاهم پر ځای له افغانستان سره په خپلو اړیکو کې له «پوځي ژبې» کار اخلي.

متقي ویلي، پاکستان په وروستیو کلونو کې د افغانستان د حاکمیت پر وړاندې پوځي اقدامات کړي دي.

هغه زیاته کړې، چې د دغه هېواد د وروستیو بریدونو له کبله په کونړ، هلمند او پکتیکا ولایتونو کې ملکي وګړي شهیدان شوي دي.

امیرخان متقي ویلي؛ افغانستان د امنیت، له داعش سره د مبارزې، نشه‌يي توکو او قاچاق په برخو کې د سیمه‌ییزې همکارۍ د پراختیا غوښتونکی دی او چمتو دی، چې د سرحدي امنیت د پیاوړتیا او د منظمو جرمونو پر وړاندې د ګډو اقداماتو لپاره له سیمه‌ییزو هېوادونو سره همکاري وکړي.

متقي ټینګار کړی، چې اسلامي امارت خپله بهرنۍ تګلاره له بشپړې خپلواکۍ سره تنظیموي او «د فشار په پایله کې به له خپلو اساسي سیاستونو شاتګ ونه‌کړي».

هغه ویلي، افغانستان د هر ډول تېري پر وړاندې له ځان دفاع خپل «منلی حق» ګڼي.

متقي د خپلو خبرو په بله برخه کې له سیمه‌ییزو هېوادونو غوښتي، چې له افغانستان سره خپلې اقتصادي اړیکې او پانګونې پراخې کړي او څرګندوي؛ کابل غواړي افغانستان د سیمه‌ییزو سیالیو پر ډګر د بدلېدا پر ځای پر «سیمه‌ییزو همکاریو د نښلوونکې نقطې» بدل شي.