د افغانستان اسلامي امارت اقتصاد وزیر دین‌محمد حنیف په افغانستان کې د ملګرو ملتونو پراختیايي پروګرام له استازي تورهان صالح سره په لیدنه کې د پراختیايي همکاریو پر پراختیا، د خصوصي سکټور پر ملاتړ او د پراختیايي پروژو پر پلي کېدا خبرې کړې دي.

د اقتصاد وزارت ویلي، دین‌محمد حنیف په دې لیدنه کې د هېواد اقتصادي وضعیت ته د نغوتې تر څنګ د اقتصادي ودې، کورنیو تولیداتو زیاتوالي، د نشه‌يي توکو د کښت پر وړاندې مبارزې او د اوبو سرچینو د مدیریت یادونه کړې او څرګندوي، چې بندیزونو، د افغانستان د اسعارو د زېرمو کنګل کېدا، د ملګرو ملتونو له‌خوا د اسلامي امارت ‌پر‌رسمیت‌نه‌پېژندلو او د نړیوالې ټولنې د پراختیايي مرستو درېدا د هېواد پر اقتصادي پرمختګ منفي اغېز کړی دی.

نوموړي د اقلیمي بدلونونو او د کډوالو پراخه راستنېدنه هم پر خلکو د اقتصادي او ټولنیزو فشارونو د زیاتېدا لاملونه بللي او ټینګار کوي، چې راستنېدونکو ته د سرپناه برابرول، د سړکونو، ښوونځیو، کلینیکونو او د اوبو رسولو شبکو جوړول لومړیتوبونه دي.

هغه زیاته کړې، چې د بنسټیزو او تولیدي پروژو پلي کول د کارموندنې، د کورنیو عوایدو زیاتوالي، د بېوزلۍ کمولو او پرله‌پسې اقتصادي ودې زمینه برابرولی شي.

دغه راز تورهان صالح د تېرو پنځه کلونو په بهیر کې د افغانستان له اقتصادي لاسته‌راوړنو ستاینه کړې او له افغانستان سره یې د ملګرو ملتونو د پراختیايي پروګرام د همکاریو د دوام ډاډ ورکړی دی.

د دغه پروګرام استازي د نشه‌يي توکو د کښت پر وړاندې د مبارزې، د اوبو د کوچنیو بندونو جوړولو، د روزنیزو پروګرامونو د پیل، د پراختیايي پروژو د پلي کولو او د کوچنیو کاروبارونو او خصوصي سکټور د ملاتړ په برخو کې هم د همکارۍ چمتووالی ښودلی دی.

د لیدنې په پای کې دواړو لوریو د اقتصادي وړتیاوو د پیاوړتیا، د کاري فرصتونو د رامنځته کولو او په افغانستان کې د پرله‌پسې پرمختګ د ملاتړ لپاره د همغږۍ او همکاریو پر پراختیا ټینګار کړی دی.

د افغانستان کورنیو چارو وزارت له ملګرو ملتونو او نړیوالې ټولنې غوښتي، چې په پاکستان کې د نشه‌يي توکو د کر، تولید او قاچاق غندنه وکړي؛ ځکه، چې په بلوچستان کې کرل شوي او پروسس شوي نشه‌يي توکي د افغانستان په ګډون نورو هېوادونو ته قاچاق کېږي.

د کورنیو چارو وزارت ویاند عبدالمتین قانع، د سې‌شنبې پر ورځ آریانا نیوز ته ویلي، چې د پاکستان د بلوچستان ایالت زرګونه هکټاره ځمکه د نشه‌يي بوټو د کر لپاره کارول کېږي.

هغه ویلي، چې په پاکستان کې تولید شوي نشه‌يي توکي ټیټ کیفیت لري او د انسانانو روغتیا ته جدي ګواښونه پېښوي.

قانع له نړیوالو بنسټونو غوښتي، چې د نشه‌يي توکو د کر، تولید او قاچاق د مخنیوي لپاره اقدام وکړي.

#آریانانیوز #افغانستان #پاکستان #بلوچستان #نشه‌يي‌توکي #کوکنار #قاچاق

د بلومبرګ خبري شبکې د راپور له مخې؛ د امریکا حکومت په پام کې لري؛ یو شمېر نیول شوي افغان کډوال پاکستان ته ولېږدوي. په دوی کې د هغو افغانانو خپلوان هم شته، چې له امریکايي ځواکونو سره یې همکاري کړې ده.

بلومبرګ د دوشنبې پر ورځ د یوه امریکايي حکومتي چارواکي، د کډوالۍ د وکیلانو او د پناه غوښتونکو د ملاتړو بنسټونو د څرګندونو له مخې راپور ورکړی، چې یو شمېر نیول شویو افغانانو ته ویل شوي؛ ښايي په راتلونکو اوونیو کې پاکستان ته ولېږدول شي.

د راپور له مخې؛ امریکايي چارواکو د دې پلان په اړه رسمي څه نه‌دي ویلي او دا هم روښانه نه‌ده، چې په احتمالي الوتنه کې به څو افغانان وي.

افغان‌ایوک نومی بنسټ، چې له امریکايي ځواکونو سره د همکارۍ کوونکو افغانانو ملاتړ کوي، وايي؛ داسې معلومات یې ترلاسه کړي، چې ښيي د نیول شویو افغانانو د لېږد لپاره د امریکا په لویزیانا ایالت کې د یوې ځانګړې الوتنې تابیا نیول شوې ده.

د دې بنسټ د څرګندونو له مخې: ځینو نیول شویو افغانانو ته ویل شوي، چې پاکستان ته به ولېږدول شي؛ خو ځینو نورو ته بیا ویل شوي، چې افغانستان ته به ولېږدول شي.

افغان‌ایوک د خپلو سرچینو د څرګندونو له مخې زیاته کړې، چې ښايي پاکستان افغانستان ته د دغو کسانو د لېږد لپاره یو منځګړې لاره وکارول شي.

دا په داسې حال کې ده، چې امریکا له دې مخکې هم یو شمېر کډوال، د افغانستان د ۱۲ وګړو پر ګډون؛ د مرکزي افریقا جمهوریت ته لېږدولي دي. په دغو کسانو کې یو ځولن افغان هم و، چې وروڼو یې له امریکايي ځواکونو سره همکاري کړې وه.