د افغانستان د سوک‌وهنې لوبڅار خیبر سلطاني د سوک‌وهنې په نهمه نړیواله ننداره کې د لوبڅارنې لپاره چین ته تللی دی.

د افغانستان د بدني روزنې او سپورټ عمومي ریاست ويلي، سلطاني د سوک‌وهنې د نړیوال فډراسیون پر همغږۍ او د هېواد د المپیک او سپورټ له مسوولانو سره په ګډه سین‌کیانګ ته استول شوی دی.

دغه سیالۍ په چین کې د سپټمبر له یوویشتمې څخه تر دېرشمې ترسره شوي دي.

د سیالیو له پیل مخکې د افغانستان د سوک‌وهنې ملي لوبډله، چې له دې مخکې چین ته رسېدلې وه؛ د سیالیو لپاره د چمتووالي لپاره یې دوه ورځنۍ روزنیزې هڅې کړی دی.

د افغانستان په پلاوي کې اووه لوبغاړي؛ دوه روزونکي او د لوبډلې یو مسوول ونډه لري او په دې نړیوالو سیالیو کې د افغانستان استازیتوب کوي.

د خیبر سلطاني ټاکل کېدا د دې لامل شوه، چې یو افغان مسوول هم د دغو سیالیو د نړیوالو لوبڅارانو په ډله کې راشي.

د افغانستان کرکټ لوبډله به په جاپان کې د ۲۰۲۶ آسیايي لوبو په ګروپي پړاو کې له جاپان او نیپال سره لوبې وکړي.

افغانستان له جاپان او نیپال سره په الف ګروپ کې دی. افغان لوبډله به په نیسین ښار کې د ګروپي پړاو خپله لومړۍ لوبه د سپټمبر پر څلیریشتمه له جاپان سره وکړي او دوه‌یمه لوبه به د سپټمبر پر پېنځه‌ویشتمه له نیپال سره هم په همدې ښار کې ترسره کړي.

په ګروپي پړاو کې نورې درې لوبډلې هانګ کانګ، چین، مالیزیا او عمان دي، چې په بي ګروپ کې راغلي دي.

دغه راز هند، پاکستان، بنګله‌دېش او سریلانکا د اتو غوره لوبډلو پړاو ته په مستقیم ډول لار پیدا کړې ده.

د آسیايي لوبو لپاره د افغانستان په ۱۵ کسیزه لوبډله کې دروېش رسولي لوبډلمشر او محمد اسحاق ویکټ‌ساتونکي ټاکل شوي دي.

د لوبډلې په نوملړ کې محمد اکرم، حسن عیسی‌خېل، خالد تڼیوال، عمران میر، فیصل خان شینوزاده، نجیب الله ځدراڼ، فرمان الله ساپی، عصمت عالم، کریم جنت، ننګیال خروټی، عرب ګل مومند، فریدون داوودزي او عبدالله احمدزي راغلي دي.

افغان لوبډله د یکشنبې پر ورځ له کابله د جاپان پلازمېنې ټوکیو ته روانه شوې ده.