په کندهار او هلمند ولایتونو کې د وروستیو ورښتونو او سېلابونو له کبله خلکو ته درانده مالي زیانونه اوښتي دي.

د کندهار له پېښو سره د مبارزې او چمتووالي ریاست ویلي؛ په دې ولایت کې شاوخوا ۲۵۰ کورونه نسبي یا بشپړ ویجاړ شوي او نږدې ۲۰۰ کورنۍ اړ شوي، چې خپلې مېنې پرېږدي.

دغه راز د کندهار په ارغنداب ولسوالۍ کې ۱۵، دامان ولسوالۍ کې ۱۵۰ او ژېړۍ ولسوالۍ کې ۱۷۰ کورنۍ زیانمنې شوې دي.

همداراز، یوازې د تېرې شپې (چارشنبې) د اورښتونو او سېلابونو له کبله د ولایت په مرکز او یو شمېر ولسوالیو کې لسګونو کورنیو ته مالي زیانونه اوښتي دي.

په هلمند ولایت کې هم د سختو سېلابونو له کبله پراخ زیانونه اوښتي دي.

د هلمند د امنیې قومندانۍ د څرګندونو له مخې؛ د دغه ولایت په ګرمسیر ولسوالۍ کې شاوخوا ۳۰۰ کورونه ویجاړ شوي دي.

د اړوند چارواکو د څرګندونو له مخې؛ زیانمنو کورنیو ته د مرستو رسولو هڅې روانې دي؛ خو په کندهار او روزګان ولایتونو کې وروستیو اورښتونو کرنیزو چارو ته هیلې زیاتې کړې دي.

د کندهار کرنې ریاست وایي، په تېرو دوه ورځو کې شاوخوا ۲۴ ملي مټره باران شوی او د روان کال ټول اورښت ۱۷۹ ملي مټرو ته رسېدلی؛ خو اوس هم د وچکالۍ د بشپړ مهار لپاره نورو اورښتونو ته اړتیا ده.

په همدې حال کې د روزګان د اوبو او انرژۍ ریاست مسوولین وايي؛ په دې ولایت کې وروستي اورښتونه ۲۳.۱۸ ملي مټره ثبت شوي، چې د سږني کال ټوله کچه ۱۷۲.۱۶ ملي مټرو ته رسېدلې ده.

ویل کیږي، چې د یوه سمسور کال لپاره له ۲۵۰ تر ۳۰۰ ملي مټرو باران ته اړتیا ده.

د ځمکو د غصب مخنیوي کمیسیون تېر کال په درې ولایتونو کې له ۲۷ میلیون او ۵۷۰ زره جریب څخه ډېر څړځایونه تثبیت او خوندي کړي دي.

د عدلیې وزارت د رسنیزې خبرپاڼې له مخې؛ دا عامه څړځایونه په فاریاب، بادغیس او بدخشان ولایتونو کې دي او د ځمکو د غصب مخنیوي او بېرته راګرځولو کمیسیون د ټاکل شوې کمیټې له‌خوا ارزول شوي او د یاد کمیسیون د پرېکړې پر بنسټ خوندي او ثبت شوي، چې ۹ میلیون او ۳۲۱ زره جریب یې په فاریاب، له ۴ میلیون او ۱۶۷ زره څخه ډېر په باغیس او له ۱۴ میلیون جریب څخه ډېره په بدخشان ولایتونو کې خوندي او بثت شوي دي. دا څړځایونه د دغو ولایتونو په مرکز او ټولو ولسوالیو کې دي.

د عدلیې وزارت ټینګار کړی، چې د ځمکو د غصب د مخنیوي کمیسیون لخوا ټاکل شوې کمیټه د هېواد په نورو ولایتونو کې هم د څړځایونو ارزونه کوي، چې له بشپړېدا وروسته به ټول څړځایونه د ځمکې په بانک کې ثبت او خوندي شي.