اسرائیل د دوشنبې پر ورځ( د کب یوولسمه) په تهران او په لبنان کې د حزب الله پر مرکزونو له هغې وروسته تازه هوایي بریدونه وکړل، چې حزب‌الله وویل: د ایران د ستر رهبر علي خامنه‌یي د وژنې په غچ کې یې پر اسرائیلو راکټونه او څارګرې وتوغول.

د اسرائیل پوځ ویلي، چې دوی له لبنان څخه توغول شوی یو توغندی شنډ کړی او نور یې په ډاګونو کې  کې غورځیدلي دي.

د بیروت پر جنوبي څنډو هم هوایي بریدونه شوي، چې په کې د حزب‌الله لوړ پوړي قومندانان میشت دي او لسګونه چاودنو ملکي وګړي تېښتې ته اړ کړي دي.

تاوتریخوالی روان ساتل شوی؛ ځکه، چې له تېرې شنبې راپدېخوا په منځني ختیځ کې وضعیت خورا کړکېچن دی؛ د ایراني اهدافو پر وړاندې د امریکا او اسرائیلو له ګډو بریدونو وروسته د تېلو بیې هم لوړې شوې دي.

د ایران ولسمشر مسعود پزشکیان اعلان کړی؛ مشرتابه شورا، چې زه، د قضایي قوې رییس او د شورای نګهبان یې غړي دي پر لنډمهاله توګه د ستر رهبر دنده پر غاړه اخیستې ده.

د امریکا ولسمشر ډونالډ ټرمپ په یوه ویډیو کې ویلي، چې د ایران پر وړاندې به پوځي عملیات تر هغه وخته پورې روان وي، چې “ټول اهداف ترلاسه شي” او له ایرانیانو یې وغوښتل، چې د خپل حکومت پر وړاندې راپورته شي.

د رویټرز د څرګندونو له مخې؛ د امریکا پوځ تر اوسه پورې له ۱۰۰۰ څخه زیات ایراني پوځي اهداف پر نښه کړي دي او په دې عملیاتو کې درې امریکایي سرتېري وژل شوي دي.

د ایران ملي امنیت عالي شورا عمومي منشي علي لاریجاني اعلان کړی، چې د لنډمهالې رهبرۍ شورا به نن جوړه شي؛ په پرونۍ غونډه کې یې چمتووالی نیول شوی و.

وروستیو بدلونونو ته په نغوته کې لاریجاني ویلي، چې د ایران خلکو د هېواد د وېشلو هڅو پر وړاندې مقاومت کړی او وسلوالو ځواکونو پر بشپړ چمتووالي د عملیاتو د دوام لپاره زمینه برابره کړې ده.

هغه دا خبرداری هم ورکړی، چې د تېري هر ډول عمل به بې ځوابه پاتې نشي.

هغه زیاته کړې؛ ایران له برید مخکې د سویس سفارت له لارې امریکا ته خبرداری ورکړی و، چې د هر برید په صورت کې به د امریکا پوځي اډې پر نښه شي.

د نوموړي د څرګندونو له مخې؛ که څه هم راتلونکې ورځې ممکن له لوړو او ژورو سره مل وي، خو “لید به روښانه وي.”

دغه راز د ایران پارلمان رییس محمد باقر قالیباف ټینګار کړی، چې امریکا او اسرائیل ” له سرې کرښې واوښتل” او باید بیه یې پرې کړي.

هغه زیاته کړې، چې د ایران ځواب به کلک وي.

د لنډمهاله مشرتابه شورا جوړېدا په داسې وخت کې رامنځته کیږي، چې په سیمه کې کړکېچ تر ټولو لوړې کچې ته رسېدلې او د ایران سیاسي راتلونکی په یوه حساس پړاو کې دی.

د ایران دولتي رسنیو څرګنده کړې، چې د ایران ستر رهبر علي خامنه‌یي په تهران کې د هغه پر ​​مرکزي دفتر د اسرائیلو او امریکا له هوايي بریدونو وروسته د ۸۶ کلونو پر عمر ووژل شو.

خامنه‌یي په ۱۹۸۹ .زکال کې د اسلامي جمهوریت د بنسټ ایښودونکي خمیني له مړینې وروسته د رهبر په توګه وټاکل شو او له درې لسیزو زیات یې د ایران د کورنۍ او بهرنۍ پالیسۍ مشري وکړه؛ لوړ سیاسي، نظامي او مذهبي واکونه یې په لاس کې درلودل.

هغه، چې په پیل کې د یوه ټیټ نفو‌ذ لرونکي شخصیت په توګه ستایل شوی و؛ ورو – ورو یې خپل دریځ پیاوړی کړ او پر امنیتي او نظامي جوړښتونو په ځانګړي توګه د سپاه پاسداران د ځواک په جوړښت کې یې پراخ نفوذ ترلاسه کړ. د هغه د مشرتابه پرمهال ایران خپل سیمه‌ییز رول پراخ کړ او د عراق، سوریې، لبنان او یمن له حکومت پلوه ډلو یې ملاتړ وکړ، چې د دې تګلارې له کبله د منتقدینو له لوري پر نړیواله کچه تهران نور هم منزوي شو.

خامنه‌یي تل د ایران اټومي پروګرام سوله‌ییز بللی او د اټومي وسلو د جوړولو هر ډول هڅه یې رد کړې ده؛ خو په دې وروستیو کلونو کې له لویدیځ سره، په ځانګړي توګه له امریکا سره تاوتریخوالی زیات شو او د اټومي انرژۍ په اړه خبرې اترې پر ځلونو ځنډېدلې دي.

پر کورني کچه د هغه رهبري د پراخو لاریونونو سره مخ شوې؛ په ځانګړي توګه په ۲۰۰۹ او ۲۰۲۲ کې، چې د امنیتي ځواکونو له سخت غبرګون سره مخ شول.

د ایراني مشر وژنه په داسې وخت کې رامنځته شوه، چې سیمه له بې ساري تاوتریخوالي سره مخ ده او د ایران سیاسي راتلونکی هم په ناڅرګند حالت کې دی.