د افغانستان ملي دفاع وزارت اعلان کړی، چې د هېواد هوايي ځواک د کندهار د تېرې شپې د بریدونو په غچ کې د جنوبي وزیرستان د مرکز واڼې د اړوند سیمې پر یوه ځانګړي پوځي کمپ برید کړی دی.

د وزارت ویاند عنایت الله خوارزمي ویلي، چې برید د اس اس جي کومانډو پر ودانۍ او د پوځي کمپ نورو ودانیزو بنسټونوشوی دی.

هغه زیاته کړې، چې په برید کې د دې مهم مرکز د مرکزي دفتر او نورو جوړښتونو لویه برخه ویجاړه شوې او پاکستاني سرتېرو ته درانده تلفات او مالي زیانونه اوښتي دي.

د کندهار ولایت سیمه‌ییزو چارواکو د څرګندونو له مخې؛ د پاکستان پوځي رژیم په دې ولایت کې د نشه‌یي توکو د روږدو کسانو یو مرکز پر نښه کړې و.

د افغانستان او پاکستان ترمنځ د تاوتریخوالي له زیاتېدا وروسته چین څرګنده کړې، چې د شخړو د خپرېدا د مخنیوي لپاره د کابل او اسلام‌آباد ترمنځ منځګړیتوب ته چمتو دی.

د چین بهرنیو چارو وزارت ویلي، چې وانګ یی د اسلامي امارت له بهرنیو چارو وزیر امیر خان متقي سره په ټیلیفوني اړیکه کې د کړکېچونو د حل لپاره چمتووالی څرګند کړی دی.

د افغانستان لپاره د چین ځانګړی استازی هم د کابل او اسلام‌آباد ترمنځ د تګ راتګ په حال کې دی، چې دواړه خواوې خبرو اترو او پخلاینې ته وهڅوي.

د چین بهرنیو چارو وزارت په خبرپانه کې راغلي: “چین هیله لري، چې دواړه خواوې به له زغمه کار واخلي؛ ژر تر ژره مخامخ خبرې وکړي، اوربند اعلان کړي او د خبرو اترو له لارې اختلافات حل کړي.”

کارپوهان خبرداری ورکوي، چې دا منځګړیتوب ممکن لنډمهاله اغېزمن وي او دا تاوتریخوالی به تر هغې روان وي، چې د افغانستان پر وړاندې د پاکستان پالیسي بدله نشي.

اسلامي امارت هم ټینګار کړی، چې له خپلو ګاونډیانو سره د تاوتریخوالي هڅه نه‌لري، بلکې د هېواد له حاکمیت څخه دفاع خپل مشروع حق ګڼي.

د هند د بهرنیو چارو وزارت د افغانستان په ځینو برخو کې د پاکستان د پوځي رژیم وروستي هوايي بریدونه غندلي او د پاکستان جمعیت علمای اسلام ګوند مشر مولانا فضل الرحمن د پاکستان پوځي رژیم د هند، افغانستان، چین او ایران له ننګونو سره ګڼلی دی.

د هند بهرنیو چارو وزارت ویاند رندهیر جیسوال د خپرې شوې خبرپاڼې له مخې؛ پاکستان په دې بریدونو ګڼ ملکي وګړي وژلي او ملکي ودانیز بنسټونه یې ویجاړه کړي او دا د افغانستان په خاوره کې د پاکستان د یرغل یوه بله بېلګه ده.

هغه ټینګار کړی: “د افغانستان حاکمیت او ځمکني بشپړتیا ته باید بشپړ درناوی وشي.”

دغه راز د پاکستان جمعیت علمای اسلام ګوند مشر مولانا فضل الرحمن د پاکستان د پوځي رژیم بهرنی سیاست په اړه کلکه نیوکه کړې او ویلي یې دي، چې اسلام‌آباد له لسیزو راپدېخوا له خپلو ګاونډیانو سره د باثباته اړیکو په جوړولو کې پاتې راغلی او پر ځلونو یې له ناسمو پرېکړو سره تاوتریخوالی او دښمني رامنځته کړې ده.

هغه زیاته کړې؛ پاکستان اوسمهال په خپلو ختیځو او لویدیځو پولو کې له ناورین سره مخ او د هند، افغانستان، چین او ایران له ننګونو سره مخ دی.

د پاکستان پوځي رژیم د پنجشنبې پر شپه په کابل، کندهار، پکتیا، پکتیکا ولایتونو او ځینو نورو سیمو کې وحشیانه هوایي بریدونه کړي؛ په کابل کې یې لږ تر لږه څلور ملکي وګړي شهیدان کړل او ۱۴ نور، چې ښځې او ماشومان دي ټپیان کړي دي.

دغه راز یو شمېر ملکي کورونه او ودانیز جوړښتونه هم ویجاړ شوي.

اسلامي امارت خبرداری ورکړی، چې دا جنایت به بې ځوابه پاتې نشي او د پاکستان د تېري ځواب یې له پولې هاخوا پر ډزو او هوايي بریدونو ورکړی دی.

چارواکو دا ټینګار هم کړی، چې دوی د جګړې پلوي ندي او د دښمن د تېري پر وړاندې د هېواد له خاورې د دفاع حق یې مشروع دی.

د پاکستان دا اقدام د هېوادوالو، نړیوالو ادارو او سیمه‌ییزو او نړیوالو سیاسي شخصیتونو پراخې نیوکې راپارولې دي.