په دې لیدنه کې د افغانستان او چین ترمنځ د دوه اړخیزو اړیکو د پیاوړتیا ترڅنګ د سیمې د وروستي امنیتي وضعیت په ځانګړي توګه د پاکستان له لوري پر افغانستان د تېري په اړه بشپړ بحث تر سره شو.

د بهرنیو چارو وزارت د خپرې شوې خبرپاڼې له مخې؛ امیرخان متقي د افغانستان اسلامي امارت د متوازن او اقتصادمحوره بهرني سیاست د یادونې تر څنګ ټینګار وکړ، چې افغانستان د متقابل احترام، نه‌مداخلې او ښه ګاونډیتوب پر اصولو ولاړې اړیکې غواړي.

دغه راز نوموړي څرګنده کړې، چې د افغانستان حاکمیت او ځمکنۍ بشپړتیا هغه بنسټیز اصل دی، چې درناوی یې د سیمې د ثبات او باور جوړونې لپاره اړین دی او هر ډول اقدام، چې له دې اصل سره په ټکر کې وي؛ نه یوازې دوه اړخیزې اړیکې زیانمنوي، بلکې د سیمې پر عمومي امنیت هم منفي اغېز کوي.

د چین ولسي جمهوریت سفیر د سیمې د روان وضعیت په اړه اندېښنه د اندېښنې څرګندونو تر څنګ ویلي، چې چین د سیمې ثبات د ټولوهېوادونو په ګټه بولي.

هغه هیله وښوده، چې اختلافات به د خبرو او ډیپلوماټیکو لارو چارو له لارې حل شي او ټینګار یې وکړ، چې ځینې بهرني عناصر د سیمې د ثبات او پرمختګ پر ضد هڅې کوي؛ خو د سیمې هېوادونه کولی شي د همغږۍ او همکارۍ له لارې دغه ډول منفي اغېزې شنډې کړي.

د بریټانیا کورنیو چارو وزارت څرګنده کړې، چې د افغانستان په ګډون یې د بېړني حالت له کبله د څلور هېوادونو وګړو ته د ځینو ویزو ورکول ځنډولي دي.

د بریټانوي رسنیو د راپورونو له مخې؛ په دې پرېکړه کې د افغانستان، کامرون، میانمار او سوډان د وګړو لپاره د زده‌کړو ویزو ځنډول د پام وړ دي او افغانانو ته د کار ویزې هم وځنډول شوې.

د بریټانیا د کورنیو چارو وزیره شبانه محمود وایي، چې یو شمېر خلکو د پناه غوښتنې لپاره د قانوني مهاجرت لارې کارولي دي. هغې دا اقدام “بې ساري” وباله او ټینګار یې وکړ، چې د هېواد د ویزې له سیسټم باید ناوړه ګټه پورته نشي.

د بریټانیا کورنیو چارو وزارت د څرګندونو له مخې؛ په ۲۰۲۵ ز. کال کې د هغو خلکو له‌خوا د پناه‌غوښتنه ثبت شوې، چې له قانوني لارو؛ لکه د زده‌کړې ویزو له لارې هېواد ته راننوتي دي. دا محدودیتونه باید په رسمي ډول د کډوالۍ په مقرراتو کې د بدلونونو له لارې پلي شي.

بریټانوي چارواکو دا اعلان هم کړی؛ د نویو پالیسیو له مخې به د کډوالو وضعیت په هرو ۳۰ میاشتو کې یوځل بیا وارزول شي او هغه کسان، چې هېوادونه یې خوندي ګڼل کیږي اړ دي ژر تر ژره خپلو هېوادونو ته ستانه شي.

د ترکیې ولسمشر رجب طیب اردوغان د پاکستان له لومړي وزیر شهباز شریف سره په ټیلیفوني اړیکه کې د پاکستان او افغانستان تر منځ د اوربند غوښتنه په داسې حال کې کیږي، چې پر افغانستان د یاد پوځي رژیم د یرغل اوونۍ پوره کېدونکې ده.

د ترکیې ولسمشر رجب طیب اردوغان د سې‌شنبې پر ورځ (د کب دیارلسمه) د پاکستان له لومړي وزیر شهباز شریف سره په ټيلیفوني اړیکه کې د دواړو لوریو تر منځ د اوربند غوښتنه وکړه.

د ترکیې د ولسمشرۍ د خبرپاڼې له مخې؛ اردوغان په دې اړیکه کې ټینګار کړی، چې د ډیپلوماسۍ لارې ته راستنېدا کولی شي د تاوتریخوالي د زیاتېدا مخه ونیسي او د کړکیچ د حل لپاره لار اواره کړي. هغه د تاوتریخوالي د کمولو لپاره هر راز همکارۍ او ملاتړ ته چمتووالی څرګند کړی دی.

د دغو خبرو پر مهال اردوغان په پاکستان کې وروستي ترهګریز بریدونه وغندل او د ترهګرۍ پر وړاندې په مبارزه کې یې له اسلام‌آباد سره د انقرې پر پیوستون ټینګار وکړ.

د ترکیې د ولسمشرۍ په خبرپاڼه کې د پاکستاني پوځي رژیم د هوايي بمبارډ له کبله افغان ملګي وګړو ته د اوښتې مرګ او ‌ژوبلې په اړه څه ویل شوي نه‌دي.

د ترکیې ولسمشر د افغانستان او پاکستان ترمنځ د ډیورنډ کرښې په اوږدو کې روان تاوتریخوالو ته پر نغوته ویلي؛ ترکیه چمتو ده، چې د پاکستان او افغانستان ترمنځ د اوربند په بیارغونه کې رول ولوبوي.

دا په داسې حال کې ده، چې اسلامي امارت له پاکستان سره د روانې تپل شوې جګړې دفاعي حالت خپل مشروع حق بولي او خبرداری ورکوي، چې «دفاعي» جګړه به تر هغې روانه وي، چې «یرغل » پای ته  رسېدلی نه‌وي.