د فلسطین رسمي خبري سرچینې وفا د شنبې پر ورځ سهار وختي راپور ورکړ، چې په غزه کې د کډوالو پر یوه مدرسه او د استوګنې پر یوې ودانۍ د اسرائیلو په بریدونو کې لږ تر لږه ۱۳ فلسطینیان وژل شوي او ۱۵ نور ټپیان دي.

د وفا خبري سرچینې د څرګندونو له مخې؛ د غزې د شمال د کډوالو د خیمو په جبلیه حلیمه السعدیه مدرسه کې لږ تر لږه ۸ کسان وژل شوي دي.

د اسرائیلو پوځ په خبرپاڼه کې راغلي، چې دوی پر هغو ترهګرو برید کړی، چې د حماس د قومندې او کنټرول په مرکز کې یې فعالیت کاوه … په هغه ودانۍ کې ځای پرځای شوي وه، چې له دې مخکې ترې د غزې د حلیمه السعدیه  مدرسه وه.

دغه راز د غزې د مرکزي سیمې د نصیرات د کمپ د استوګنې پر ودانۍ د اسرائیلو په برید کې پېنځه فلسطینیان وژل شوي دي.

د اسرائیلو او فلسطینیانو تر منځ د لسیزو لرغونې جګړې وروستۍ خونړۍ پېښه د تېر کال د اوکټوبر پر اوومه هغه مهال رامنځته شوه کله، چې د حماس پر مشرۍ پوځیانو پر اسرائیلو برید وکړ، چې د اسرائیلو د څرګندونو له مخې، ۱۲۰۰ کسان یې ووژل او شاوخوا ۲۵۰ یرغمل شول.

د حماس تر واکمنۍ لاندې سیمو کې د اسرائیلو پر بریدونو د سیمه‌ییز روغتیا وزارت د څرګندونو له مخې ؛ له ۴۰ زره ۸۰۰ ډېر فلسطینیان وژل شوي. په داسې حال کې، چې نږدې ۲ اعشاریه ۳ میلیون نفوس یې بې ځایه شوی؛ لوږې رامنځته شوی او په نړیواله محکمه کې پرې د نسلي وژنې تورونه لګېدلي، چې اسرائیل یې ردوي.

د ملګرو ملتونو د څرګندونو له مخې؛ د غزې په تړانګه کې لږ تر لږه یو اعشاریه نهه میلیون خلک په کور دننه له ۱۰ ځلو ډېر بې ځایه شوي دي.

د چارشنبې پر ورځ د امریکا د جورجیا ایالت په یوه عالي لیسه کې یوه ۱۴ کلن هلک دوه زده‌کوونکي او دوه ښوونکي پر ډزو ووژل او نهه نور کسان یې ټپیان کړل.

د رویټرز د اړوند چارواکو د څرګندونو له مخې لیکلي؛ شکمن د جورجیا د وینډر په اپالاچي عالي لیسه کې له ډزو سمدستي وروسته ونیول شو. هغه تېر کال د انلاین ګواښونو له کبله د پولیسو لخوا په ښوونځي کې د ډزو کولو په اړه تر پوښتنو او ګروېږنو لاندې نیول شوی و.

د جورجیا د پلټنې ادارې مشر کریس هوسي په یوه خبري کنفرانس کې ویلي، چې شکمن کولټ ګري ۱۴ کاله عمر لري او د یوه بالغ په توګه محاکمه شي.

دې ډزو یو ځل بیا په امریکا کې د ټوپک ګرځولو د څارنې په اړه ملي بحث راپورته کړی دی.

د امریکا ولسمشر جوبایډن په یوه بیان کې د جمهوري غوښتونکیو او ډیموکراټانو له‌خوا د وسلې د مصونیت قانون د تصویب غوښتنه وکړه.

ویل کیږي، چې امریکا له تېرو دوه لسیزو راپدیخوا د سلګونه ښوونځيو او پوهنتونونو د ډزو شاهده ده، چې ترټولو خونړی برید د ۲۰۰۷ کال د ویرجینیا ټک و، چې په کې له ۳۰ ډېر خلک ووژل شول.

د یو لړ څرګندونو له مخې؛ په نږدې راتلونکي کې امریکا اوکراین ته اوږده واټن ویشتونکي توغوندي یا امریکایی جیټ الوتکې سپاري، چې ممکن د روسیې په نښه کولو کې ورسره مرسته وکړي، ځکه په دې اړه د مسکو ګواښونه نور هم زیات شوي دي.

د روسیې بهرنیو چارو وزیر سرګي لاوروف د چارشنبې پر ورځ کیف ته د اف – ۱۶ جیټ الوتکو د سپارلو د شونتیا په اړه د یوې پوښتنې په ځواب کې ټینګار وکړ، چې د واشنګټن چلند د روسیې له سرې کرښې تېر شوی دی.

لاوروف همداراز زیاته کړې، چې هېواد یې د خپلو سرو کرښو په اړه ډېر جدي دی او له هغې د تېرېدو اجازه نه‌ورکوي.

د روسیې بهرنیو چارو وزیر دا ومنله، چې واشنګټن له روسیې سره د “دوه اړخیزه همکارۍ” احساس له لاسه ورکړی او خبرداری یې ورکړ، چې دا یوه “ډېره خطرناکه مسله” ده.

د روسیې بهرنیو چارو وزارت ویاندې ماریا زاخارووا هم د چارشنبې پر سهار خبرداری ورکړ، چې که اوکراین د روسیې پر خاوره پراخ برید وکړي؛ د شمالي اټلانټیک د تړون ټولنې (ناټو) غړي هېوادونه به د مسکو له «بېړني او دردناک غبرګون» سره مخ شي.

زاخارووا همداشان د ختیځې اقتصادي غونډې په څنډه کې یوې خبري ناستې ته دا هم ویلي: د اروپايي ټولنې سیاستوال د کړکېچ د زیاتېدو د خطرونو په اړه ان خپلو ګټو ته فکر نکوي.

روسیې په دې وروستیو کې ټینګار کړی، چې پر لویدیځو وسلو د برید د مخنیوي لپاره به پرېکنده ځواب ورکړي.

هغې دا اعلان هم وکړ، چې د اتومي وسلو د استعمال د شرایطو په اړه په پوځي اصولو کې د اصلاحاتو د پلي کولو لپاره چمتووالی روان دی.

د روسیې دا اخطارونه په وروستیو اوونیو کې له هغې وروسته زیات شول، چې د انګلستان او ندرلینډ په ګډون یو شمېر اروپايي هېوادونو اعلان وکړ، چې د روسیې د پر نښه کولو لپاره اوکراین ته د ورکړ شویو وسلو په کارولو کې کوم خنډ نه‌ویني.

د اروپايي ټولنې د بهرنۍ تګلارې چارواکي جوزپ بورل هم تېره اوونۍ په دغه هېواد کې د روسیې پر ضد برید مشروع وباله.

د یادولو ده، چې ځینو امریکايي سرچینو کیف ته د اوږده واټن ویشتلو کروز توغندیو د استولو له شونتیاهم یادونه کړی ده.