د پاکستان دولتي بانک راپور ورکړی، چې د مالي کال (۲۰۲۴-۲۵) په لومړیو نهو میاشتو کې افغانستان ته د توکو او خدماتو صادرات د تېر کال د ورته وخت د صادراتو پر پرتله ۶۴.۴۸ سلنه زیاتوالی موندلی دی.

د پاکستان دولتي بانک (SBP) د څرګندونو له مخې؛ افغانستان ته ټول صادرات د جولای – مارچ (۲۰۲۴-۲۵) په بهیر کې ۶۲۳.۲۸۵ میلیون ډالرو ته رسیدلي دي. په داسې حال کې، چې تېر کال د ورته وخت په بهیر کې ۳۷۸.۹۲۲ میلیون ډالر صادرات ول.

د کلني شمېر پر بنسټ افغانستان ته صادرات د ۲۰۲۴ کال د مارچ په میاشت کې د ۵۵.۹۰۷ میلیون ډالرو څخه ۴۵.۵۴ سلنه کم شوي، چې د ۲۰۲۵ کال په مارچ کې د ۳۰.۴۴۵ میلیون ډالرو صادراتو پر پرتله ډېر کم شوي دي.

د SBP معلومات ښیي، چې افغانستان ته صادرات د ۲۰۲۵ کال  په مارچ  کې ۱۵.۳۷ سلنه کم شوي. په داسې حال کې، چې د ۲۰۲۵ کال په فبرورۍ کې د ۳۵.۹۷۷ میلیون ډالر صادرات ول.

دغه راز د همدې میاشتو په بهیر کې له افغانستان څخه پاکستان ته واردات د تېر کال د ۶.۴۳۸ میلیون ډالرو پر پرتله ۲۰.۱۲۷ میلیون ډالرو ته رسیدلي، چې د جولای – مارچ (۲۰۲۴-۲۵) کې ۲۱۲.۶۲ سلنه زیاتوالی ښیي.

د تېر کال پر پرتله له افغانستان څخه په وارداتو کې ۹۹.۷۹ سلنه زیاتوالی راغلی، چې د ۲۰۲۴ کال په مارچ کې د ۰.۹۶۰ میلیون ډالرو څخه د ۲۰۲۵ کال په مارچ کې د ۱.۹۱۸ میلیون ډالر د وارداتو پر پرتله لوړ شوی دی.

د اړوند معلوماتو له مخې؛ د ۲۰۲۵ کال په مارچ کې له افغانستان څخه پاکستان ته په وارداتو کې هم ۳۶.۲۳ سلنه کمښت راغلی، چې د ۲۰۲۵ کال په فبرورۍ کې د ۳.۰۰۸ میلیون ډالرو وارداتو پر پرتله ډېر شوی دی.

د قرغزستان د ملي احصائې کمیټې د دوشنبې پر ورځ ویلي، چې دې هېواد په دوه میاشتو کې افغانستان ته ۲۴.۹ میلیون لیټره پټرول صادر کړي دي.

د سیمه‌ییزو رسنیو د څرګندونو له مخې؛ قرغزستان د روان کال د جنورۍ او فبرورۍ په میاشتو کې د ۱۱.۵ میلیون ډالرو پر ارزښت تېل صادر کړي دي.

افغانستان ته د تېلو صادرات په تېرو دوه کلونو کې پرله‌پسې مخ پر لوړېدو دي.

د تېر کال په لومړیو شپږ میاشتو کې ۷۰۰ لیټره افغانستان ته تللي وه. په داسې حال کې، چې د ۲۰۲۳ کال په ورته وخت کې یوازې ۱۹ لیټره ول.

د دواړو هېوادونو ترمنځ په ټولیزه توګه سوداګرۍ هم له هغې وروسته، چې د قرغزستان حکومت د تېر کال په سپټمبر کې د افغانستان اسلامي امارت (IEA) د منع شویو ډلو له نوملړه لرې کړ؛ ورسره صادراتو هم زیاتوالی وموند.

افغانستان اوس د قرغزستان د تېلو اصلي مصرفي هېواد دی، چې د دې تېلو د ټولو صادراتو شاوخوا ۹۲ سلنه جوړوي.

که څه هم افغانستان د آمو سیند په حوزه کې د تېلو او ګازو خپلې زیرمې لري؛ خو د انرژۍ د اړتیاوو پوره کولو لپاره د منځنۍ آسیا د هېوادونو او ایران پر وارداتو ډېره تکیه کوي.