د پاکستان جماعت اسلامي ګوند مشر حافظ‌‌ نعیم‌الرحمن د ډیورند فرضي کرښې د لارو د بېرته پرانیستو غوښتنه کړې او څرګندوي، چې دا کار د پاکستان د اقتصاد د ښه‌والي او پر خلکو د فشار د کمېدا لپاره اړین دی.

هغه د بلوچستان په ژوب سیمه کې یوې غونډې ته د وینا پر مهال داسې وړاندیز وکړ؛ د قبایلي مشرانو او سوداګرو ګډه کمیټه دې جوړه شي، چې د سوداګرۍ په بیا راژوندي کولو او د ډیورند فرضي کرښې په اوږدو کې د ثبات په ساتلو کې مرسته وکړي.

دغه راز نوموړي د ډیورند فرضي کرښې په اوږدو کې د ځانګړو سوداګریزو سیمو د جوړېدا غوښتنه هم وکړه.

د پاکستان جماعت اسلامي ګوند مشر د ډیورند فرضي کرښې د اوسني مدیریت پر سیاستونو د نیوکې ترڅنګ ویلي؛ لارې د خوښې پر بڼه او د محدودو کسانو د ګټې لپاره پرانیستل کېږي. په داسې حال کې، چې زرګونه نور کسان اوس هم اقتصادي زیانونه ویني.

د یادونې ده، چې د ډیورند فرضي کرښې لارې له اووه میاشتو حخه د ډېر وخت لپاره پر افغانستان د پاکستان له بریدونو وروسته وتړل شوې او د دواړو لوریو ترمنځ سوداګري درېدلې پاتې ده.

ملا عبدالغني برادر نن( پنجشنبهد غویي یودېرشمه) په بلخ ولایت کې د حیرتان ـ مزارشریف د اوسپنې‌پټلۍ پېنځمه برخه بېرته فعاله کړه.

د ریاست‌الوزراء اقتصادي مرستیالۍ ویلي، چې د اوسپنې‌پټلۍ پېنځم سټیشن له بیارغونې او چمتووالي وروسته بېرته ګټې اخیستنې ته سپارل شوې ده.

ملا برادر د دغې پروژې د پرانیستې په مراسمو کې د هېواد د اوسپنې‌پټلۍ شبکې د پراختیا لپاره د ټولګټوچارو وزارت هڅې وستایلې او د ازبکستان له همکاریو یې هم مننه وکړه.

هغه زیاته کړې؛ د افغانستان او ازبکستان ترمنځ اقتصادي او سوداګریزې اړیکې د پخوا پر پرتله پیاوړې شوې دي او د دغو همکاریو د پراختیا لپاره د بلخ والي پر مشرۍ او د اړوند ادارو په ګډون ګډه کمیټه جوړه شوې ده.

د ورکړ شویو معلوماتو له مخې، د حیرتان ـ مزارشریف د اوسپنې پټلۍ پېنځمه برخه ۷۰ کیلومټره اوږدوالی، ۳۰ کیلومټره فرعي کرښې، پېنځه تم‌ځایونه او په یو وخت کې د ۵۰ واګونونو د تخلیې وړتیا لري.

مسوولان وایي، چې د دغې برخې له بېرته فعالېدا سره به د افغانستان او د سیمې د هېوادونو ترمنځ د سوداګریزو توکو د لېږد او د سوداګرۍ د کچې په لوړولو کې د پام وړ آسانتیاوې رامنځته شي.

د ریاست‌الوزرا اقتصادي مرستیال ملا عبدالغني برادر نن( سې‌شنبه د غویي نهه‌ویشتمه) د ابو علي سينا بلخي دوه‌یم ملي او نړیوال تخصصي نندارتون پرانیست او په افغانستان کې یې د درمل جوړونې صنعت له ودې خبر ورکړ.

هغه د نندارتون د پرانیستې په مراسمو کې ویلي، چې دا مهال د خلکو د درملو د اړتیاوو لویه برخه د کورنیو تولیداتو له لارې پوره کېږي او د کورنیو تولیداتو ملاتړ د اقتصادي فشارونو او بندیزونو پر وړاندې د مبارزې تر ټولو غوره لار ده.

د ملا برادر د څرګندونو له مخې؛ په وروستیو میاشتو کې د بهرنیو درملو د وارداتو کمښت د هېواد د درملو د تولید سکټور د پام وړ ودې لامل شوی او خلک تر ډېره د کورنیو درملو کارولو ته مخه کړې ده.

د ریاست‌الوزرا اقتصادي مرستیال ټینګار کړی؛ له اوسنیو پرمختګونو سره – سره اړتیا ده، چې د درملو تولیدي فابریکې پوره معیاري شي او خپل تولیدات د نړیوالو معیارونو له مخې پراخ کړي.

ملا برادر له سوداګرو وغوښتل، چې د درملو له احتکار او پر لوړه بیه یې له پلورلو ډډه وکړي.

نوموړي له اړوند ادارو وغوښتل، چې له ورته کړنو سره جدي چلند وکړي.

هغه کورنیو او بهرنیو پانګه‌والو ته بلنه ورکړه، چې په افغانستان کې پانګونه وکړي.

د ریاست الوزراء اقتصادي مرستیال ډاډ څرګند کړ، چې اسلامي امارت د پانګونې د بهیر د آسانتیا او د برښنايي سیسټم د رامنځته کولو لپاره هڅې کوي.

ملا برادر وایي؛ اسلامي امارت یوازې پر کورني اقتصاد تمرکز نه‌لري، بلکې د سیمه‌ییزو او نړیوالو اقتصادي اړیکو د پراختیا غوښتونکی هم دی او څرګندوي، چې له سیمه‌ییزو او ګاونډ هېوادونو سره اقتصادي تعاملات هم زیات شوي دي.

دا مهال په افغانستان کې د درملو ۱۳۴ تولیدي فابریکې فعالې دي، چې ۱۱۷۰ ډوله درمل تولیدوي. په دې برخه کې شاوخوا ۴۵۰ میلیون ډالره پانګونه شوې او د هېواد ۳۸ سلنه اړتیاوې پوره کېږي؛ دا هغه شمېر دی، چې اته میاشتې مخکې ۲۵ سلنه و.

ویل کیږي، چې د ابو علي سينا بلخي تخصصي نندارتون به د لسګونو درمل جوړوونکو شرکتونو په ګډون د څلورو ورځو لپاره پرانیستې وي.