د اسلامي امارت کورنیو چارو وزیر خلیفه سراج‌الدین حقاني د پاکستان د بهرنیو چارو وزیر اسحاق ډار وروستیو څرګندونو ته، چې په کابل کې د علماوو د وروستۍ غونډې په اړه یې کړې وې؛ هرکلی ویلی دی.

همدارنګه حقاني د یکشنبې پر ورځ د کابل ښاروال د ستاینې په مراسمو کې د پاکستان د دیني علماوو هغه اعلامیه وستایله، چې په کراچۍ کې خپره شوې وه او له دواړو حکومتونو یې غوښتي، چې خپلې ستونزې د خبرو اترو له لارې حل کړي.

حقاني وایي: «که د دواړو هېوادونو د خلکو ترمنځ د اړیکو د پیاوړتیا لپاره مثبت تعامل او هڅې دوام ومومي؛ مونږ به ترې قدرداني وکړو.»

هغه له پاکستان وغوښتل، چې د بې‌ثباته کوونکو فعالیتونو پر ځای د افغانستان له بیارغونې ملاتړ وکړي. حقاني همدارنګه نړیوالې ټولنې ته ډاډ ورکړ، چې د افغانستان خاوره به د هیڅ بل هېواد پر ضد ونه کارول شي.

اسلام‌آباد تل ادعا کړې، چې په افغانستان کې د دوی میشت وسله‌وال د پاکستان په ناامنۍ کې لاس لري.

اسلامي امارت دا تورونه ردوي او ټینګار کوي، چې د پاکستان د کورني امنیت د ټینګښت مسوولیت پر غاړه اخیستلی نشي.

د تېر کال د اوکټوبر په میاشت کې دواړه لوري د ډیورنډ فرضي کرښې ته نږدې ونښتل، چې په پایله کې یې لسګونه کسان ووژل شول او د دواړو هېوادونو ترمنځ سوداګري ودرېده او د سولې پړاویزې خبرې هم بې پایلې شوې.

د بهرنیو چارو وزارت ويلي، چې په افغانستان کې د امریکا شل‌کلن حضور د دواړو هېوادونو په اړیکو کې یو استثنايي پړاو و او له دې هاخوا هم د کابل او واشنګټن اړیکې له جدي پېچلتیاوو سره مخ ندي.

د بهرنیو چارو وزارت د سیاسي چارو دوه‌یم رییس ذاکر جلالي کابل ته د امریکا د پخواني ځانګړي استازي زلمي خلیلزاد له سفر سره هم‌مهاله ټینګار کړی، چې د کندهار نړیوال هوايي ډګر او د هلمند د کجکي بند ته ورته د لویو پراختیايي پروژو په پلي کېدا کې د امریکا مثبت رول باید له پامه ونه غورځول شي.

د نوموړي د څرګندونو له مخې؛ په اوسنیو شرایطو کې یو ځل بیا داسې زمینه برابره شوې، چې د افغانستان او امریکا ترمنځ د اړیکو د رغېدا او پراختيا په لار کې کوم جدي خنډ نه ليدل کېږي.

ذاکر جلالي ټینګار کړی؛ د دوحې تاريخي هوکړې لاسليک ښيي: په دواړو لوريو کې د پام وړ کچه عمل‌گرايي شته، چې د ماضي اسيران پاتې نشي او د يوه واقع‌بينانه تګلارې له مخې د اړيکو د پراختيا پر فرصتونو کار وکړي.

د افغانستان لپاره د امریکا د سولي پخوانی استازی زلمی خلیلزاد په کابل له بهرنیوچارو وزیر امیرخان متقي سره لیدلي دي.

په دې لیدنه کې، چې نن (یکشنبه د مرغومي اوومه) تر سره شوې؛ دواړو خواوو د افغانستان او امریکا ترمنځ د دوه اړخیزو اړیکو د پراختیا لپاره د لارو چارو، فرصتونو او همدارنګه د ننګونو په اړه نظرونه تبادله کړي دي.

د بهرنیو چارو وزیر ویلي، چې د بهرنیو ځواکونو له وتلو او د جګړې له پای ته رسېدو وروسته د کابل او واشنګټن ترمنځ تعامل یو نوي پړاو ته داخل شوی او د خبرو اترو له لارې د اړیکو د پرمختګ لپاره فرصتونه شتون لري.

زلمی خلیلزاد په افغانستان کې د امنیت او بیارغونې په برخو کې له پرمختګ ستاینه کړې او د دوه اړخیزو خبرو اترو پر دوام یې ټینګار کړی دی.