د سوداګرۍ او صنایعو وزارت مرستیال د سې شنبې پر ورځ په یوه خبري کنفرانس کې ویلي، چې په تېر لمریز لېږدیز کال کې د افغانستان صادرات دوه میلیارد دالره ول.

د صنعت او سوداګرۍ وزارت مرستیال قدرت الله جمال ويلي؛ په  تېر یوه کال کې د صادرا توکچه نږدې  دوه میلیارد دالروته  لوړه شوې ده.

نوموړی وایي: مونږ د خصوصي سکتور لپاره د اقتصادي فعالیتونو د سرته رسولو لپاره ډېره ښه زمینه برابره کړې او له ګونډهېوادونو سره مو هم اقتصادي اړیکې ښې دي او هڅه کوو، چې دا ړیکې نورې هم پراخې او پیاوړې کړو.

د صنعت اوسوداګرۍ  وزارت ویاند عبد السلام جواد آخوندزاده ويلي، چې هېواد یې په نږدې پنځوس قلمه توکو کې، چې په هېواد کې تولیدیږي؛ ځان بسیاینې ته رسیدلی او د تېرکال په بهیر کې شاوخوا ۱۰۰ بهرني پانګوال افغانستان ته راغلي او په بېلا بېلو برخو کې يې پانګونې ته لیوالتیا څرګنده کړې ده.

هغه وایي: په دې پانګوالو کې د ګاونډ هېوادونو په ګډون د سیمې هېواد نو پانګوال هم شته، چې ډېر يې د کانونو، کرنې، خدماتواو انرژۍ د تولید په برخه کې د پانګونې لپاره لیواله دي.

د یاد وزارت د څرګندونو له مخې؛ د هېواد پر کچه نږدې ۸۰۰۰ میرمنې پر اقتصادي فعالیتونو بوختي دي او ورته اسانتیاوې په نظر کې نیول شوي، چې راتلونکی کال به د اقتصادي طرحو جوړول، د نساجي پر صنعت تمرکز، د سیمه ییزو همکاریو  پرا ختیا، د صادارتو پراختیا، د پانګونې جذب او په صنعتي پارکونو کې د پانګونې پرا ختیايي هڅې مو له کاري لومړیتوبونو څخه دي.

ویل کیږي، چې په تېر یوه کال کې ۵۱۰۰ جوازونه صادر شوي، ۷۲۲۸ جوازو نه تمدید شوي او ۳۳۳ جوازونه لغوه شوي دي. دغه راز د تېرکال په اوږدو کې د ۹۲۵ میلیون و ۴۹۳ زره ۶۲۹ دالرو پر ارزښت سکاره، پنبه، ایجه، انار، ممیز، انځر، انګور، رومي بانجان، او پیاز پاکستان، هند، ازبکستان، تاجکستان، عربي متحده اماراتو، چین، ایران، عراق، ترکیې ته صادر شوي دي.

د مالیې وزارت ويلي، د افغانستان اسلامي امارت د رهبرۍ د پرېکړې له مخې په تېر لمریز لېږدیز کال کې پر لومړنیو خوراکي توکو ګمرکي محصول له ۵۰ څخه تر ۷۰ سلنې راټیټ شوی دی.

دې وزارت دا هم په ډاګه کړې، چې د دې پرېکړې په پایله کې سږ کال د ۶ اعشاریه ۷ میلیون افغانیو پر ارزښت ګمرکي محصول کم شوی دی.

په سيمه ييزو بازارونو کې پر خوراکي توکو؛ اوړو، غنمو، غوړيو، وريجو او بورې د ګمرکي محصول د کمولو پرېکړه د بيو د راټيټوالو لپاره رامنځته شوې ده.

د کندور ولایت د سوداګرۍ او صنعت ریاست مسوولینو د څرګندونو له مخې؛ په روان کال کې تولیدي شرکتونو ته د جواز د ورکړې او تمدید له کبله څه باندې ۱۲ میلیون افغانۍ عواید تر لاسه شوي.

د کندوز ښاروالۍ مسوولینو ويلي، په تېرو یوولس میاشتو کې د عوایدو له بېلا بېلو ادارو څخه ۱۲۰ میلیون افغانۍ عواید راټول شوي، چې د تېر کال پر پرتله ۴۰ سلنه زیاتوالی ښیي.

د کندوز ښاروالۍ ویاند تاج الدین صحاک ویلي؛ په تېرو یوولس میاشتو کې د صفایۍ محصول، د کار جواز وېش، ګمرکي تعرفو او د جایدادونو د کرايې له درکه یې  ۱۲۰ میلیون افغانۍ عواید راټول کړي، چې د ښار جوړونې پر چارو لګول شوي دي.

د کندوز د سوداګرۍ او صنعت رییس محمد رحیم سیرت رییس هم وايي؛  د ۳۰۳ تولیدي شرکتونو لپاره د جواز تمدیدولو او ۱۳۰ شرکتونو ته د جواز له ورکولو د دوی په عوایدو کې ۴۸  سلنه زیاتوالی راغلی دی .

د تولیدي شرکتونو خاوندان د بازار د نشتوالي له کبله د خپلو تولیداتو له کموالي شکایت کوي او په دې برخه کې د حکومت له لوري د لازمو اسانتیاوو په رامنځته کولو ټینګار کوي.

دوی ویلي؛ په تېر کې یې له هېواد څخه بهر ته صادرات درلودل، خو دا مهال یې صادرات کم شوي دي.

د کندوز سیمه‌ییز مسوولینو څرګنده کړې؛ دوی د سوداګر و او پانګوالو لپاره د اسانتیا د برابرولو لپاره تل هڅه کړې او تمه ده، چې په راتلونکي کال کې به د تولیدي شرکتونو لپاره له هېواده بهر د بازار موندنې په برخه کې لازمې هڅې وکړي.