تازه خبرونه
پاکستان، چین او افغانستان د سیمې پر اقتصادي ثبات او همکاریو ټینګار څرګند کړ

په اسلامآباد کې د افغانستان، پاکستان او چین په درې اړخیزه غونډه کې د سیمې پر اقتصادي ثبات او همکاریو ټینګار څرګند شو.
په دې غونډه کې امیرخان متقي، بلاول بوتو زرداري او کین ګانګ پر اقتصادي همکاریو، سولې، امنیت، ثبات او نورو مسایلو خبرې وکړې.
له درې اړخیزې غونډې وروسته د چین او پاکستان د بهرنیو چارو وزیرانو په یوه ګډه خبري غونډه کې له اسلامي امارت وغوښتل، چې جامع حکومت جوړ کړي او د ګاونډ هېوادونو هغه اندېښنې لرې کړي، چې له دې هېواده یې د ترهګریزو فعالیتونو له کبله احساسوي.
د پاکستان د بهرنیو چارو وزیر بلاول بوتو زرداري ویلي: په سیمه کې د ټولنیز او اقتصادي پرمختګ، اتصال او هوساینې لپاره په افغانستان کې سوله او ثبات اړین دی. مونږ به د یوه سولهییز، هوسا او متحد افغانستان لپاره له خپلو نورو شریکانو سره کار ته دوام ورکړو.
په دغه خبري کنفرانس کې د چین د بهرنیو چارو وزیر له اسلامي امارت وغوښتل، چې ټول شموله او منځلاری حکومت جوړ کړي او د تروریستي ګواښونو په اړه د افغانستان د ګاونډیانو اندېښنو ته هم ځواب ووایي.
د چین بهرنیو چارو وزیر چین ګانګ څرګنده کړې: مونږ هیله لرو، چې طالبان به د حکومت ټول شموله او اعتدال پالیسي ومني او له ګاونډیانو سره به دوستانه اړیکې وساتي. دا مهمه ده، چې طالبان د خپلو ګاونډیانو امنیتي اندېښنې جدي وګڼي او په افغانستان کې له مختلفو ترهګرو ډلو سره د مقابلې لپاره قوي اقدامات وکړي.
د افغانستان د بهرنیو چارو وزارت سرپرست او ورسره مل پلاوي اسلامآباد ته په خپل سفر کې د چین او پاکستان د بهرنیو چارو له وزیرانو سره جلا جلا کتنې وکړې.
دغه راز امیرخان متقي د پاکستان د پوځ له لوی درستیز جنرال منیر عاصم سره په بېلابېلو مسایلو په ځانګړي ډول د امنیتي مسایلو په اړه غږیدلی دی.
د بهرنیو چارو وزارت د ویاند مرستیال ضیا احمد تکل وایي: د بهرنیو چارو وزیر مولوي امیرخان متقي د پاکستان د پوځ له لوی درستیز جنرال عاصم منیر سره د سیمهییز امنیت، د خلکو د تګ راتګ د اسانتیا او د افغان کډوالو د ستونزو په اړه د دوه اړخیزو همکاریو په اړه هراړخیزې خبرې وکړې.
دا په داسې حال کې ده، چې د جمعې پر ورځ د هند په ګواه ښار کې د شانګهای د همکارۍ ټولنې د بهرنیو چارو وزیرانو په غونډه کې د هند، روسیې او پاکستان د بهرنیو چارو وزیرانو په جلا جلا غونډو کې له اسلامي امارت څخه د یوه ټول شموله حکومت د جوړولو او د ښځو حقونو ته د درناوی غوښتنه وکړه.
تازه خبرونه
په هرات کې د ټاپي نللیکې ۱۴ کیلومټره کار بشپړ شو – عبدالله یوف
د هرات والي دفتر نن (پنجشنبه) په یوه رسنیزه خبرپاڼه کې څرګنده کړې، چې عبدالله یوف د ټاپي پروژې د پرمختګ په اړه یو لنډ راپور له والي اسلام جار سره شریک کړ.

په افغانستان کې د ټاپي پروژې مشر بګنج عبدالله یوف د هرات له والي نور احمد اسلام جار سره وکتل او په دې ولایت کې یې د نللیکې د غځولو د بهیر له چټکتیا خبر ورکړ.
د هرات والي دفتر نن (پنجشنبه) په یوه رسنیزه خبرپاڼه کې څرګنده کړې، چې عبدالله یوف د ټاپي پروژې د پرمختګ په اړه یو لنډ راپور له والي اسلام جار سره شریک کړ.
د یادې خبرپاڼې له مخې، د ټاپي پروژې مشر د اړینو آسانتیاوو په برابرولو کې د دې ادارې له همکارۍ ستاینه وکړه او اعلان یې وکړ، چې د ۱۴ کیلومټره پایپ ایښودلو کار بشپړ شوی او سربېره پردې د پروژې ۲۴ کیلومټره لار هم پخه شوې ده.
په دې غونډه کې د هرات والي هم د دې پروژې د کار د پرمختګ په برخه کې د ټاپي پروژې د چارواکو له هڅو هرکلی وکړ او په افغانستان کې یې د ټاپي پروژې مشر ته د کار د چټک پرمختګ لپاره د اړینو اسانتیاوو په برابرولو کې د سیمهییزې ادارې له بشپړې همکارۍ ډاډ ورکړ.
تازه خبرونه
طارق علي بخیت د افغانستان په اړه له جاپاني چارواکو سره وکتل
د اسلامي همکاریو ټولنې په یوه رسنیزه خبرپاڼه کې ویلي، چې په دې ناسته کې په ټولیزه توګه د افغانستان پر اوسني وضعیت راوڅرخېدل او د دې ټولنې او جاپان ترمنځ یې د بشري همکاریو د زیاتولو لارې چارې وارزول شوې.

د افغانستان د چارو لپاره د اسلامي همکاریو ټولنې ځانګړي استازي طارق علي بخیت د افغانستان په اړه د جاپان د بهرنیو چارو وزارت د مرستیال کامډا ماسایوکي پر مشرۍ له جاپاني پلاوي سره خبرې اترې کړې دي.
د اسلامي همکاریو ټولنې په یوه رسنیزه خبرپاڼه کې ویلي، چې په دې ناسته کې په ټولیزه توګه د افغانستان پر اوسني وضعیت راوڅرخېدل او د دې ټولنې او جاپان ترمنځ یې د بشري همکاریو د زیاتولو لارې چارې وارزول شوې.
د دې خبرپاڼې له مخې؛ دواړو خواوو د افغانانو د بېړنیو اړتیاوو د پوره کولو لپاره د پرلهپسې همکارۍ پر اړتیا ټینګار وکړ.
په دې رسنیزې خبرپانه کې راغلي، چې په جده کې د جاپان جنرال قونسل او د هغه مرستیال هم په پلاوي کې برخه لرله.
دا په داسې حال کې ده، چې دا ناسته د سعودي عربستان په جده ښار کې د افغانستان د چارو لپاره د اسلامي همکاریو ټولنې د ځانګړي استازي په دفتر کې شوې ده.
تازه خبرونه
افغان بېسیم د ننګرهار په کوزکوڼر ولسوالۍ کې یو نوی سایټ فعال کړ
د افغان بېسیم چارواکو د څرګندونو له مخې؛ د دې سایټ پر جوړولو زرګونو کورنیو مخابراتي او انټرنیټي خدماتو ته لاسرسی موندلی دی.

د افغان بېسیم مخابراتي شرکت چارواکو ويلي، چې د ننګرهار ولایت په کوزکوڼر ولسوالۍ کې یې یو نوی سایټ فعال کړی دی.
د افغان بېسیم چارواکو د څرګندونو له مخې؛ د دې سایټ پر جوړولو زرګونو کورنیو مخابراتي او انټرنیټي خدماتو ته لاسرسی موندلی دی.
دوی زیاته کړې، چې افغان بېسیم به ډېر ژر په دې سیمو کې د ۴جي 4G انټرنیټي خدمتونه هم فعال کړي.
دغه راز د ننګرهار مخابراتو او معلوماتي ټکنالوژۍ ریاست چارواکو ويلي، چې د دې ولایت لرې پرتو سیمو ته د مخابراتي خدمتونو د غځولو لپاره هڅې روانې دي.
له بلې خوا په ننګرهار کې د اټرا ادارې مشر رحیم الله شینواري ویلي، چې د افغان بېسیم د نوي سایټ له فعالیدو سره به ۲۵ زره کورنیو ته مخابراتي او انټرنیټي خدمتونه وړاندې شي.
د کوزکوڼر ولسوالۍ اوسېدونکو د مخابراتي او انټرنیټي خدمتونو ته د لاسرسي له کبله خپله خوښي څرګنده کړې او په ننګرهار کې یې د مخابراتي خدمتونو د نورې پراختیا غوښتنه کړې ده.
دا په داسې حال کې ده، چې په دې وروستیو کلونو کې د افغان بېسیم مخابراتي شبکې خپل مخابراتي او انټرنیټي خدمتونه د هېواد ډېرو لرې پرتو سیمو ته غځولي دي.
-
تازه خبرونه4 days ago
آریانا هوايي شرکت چین ته د اوونیزو الوتنو له زیاتېدا خبر ورکړ
-
تازه خبرونه3 days ago
د افغانستان لپاره د امریکا نوې استازې یوه افغانيالاصله میرمن غوره شوه
-
لوبی2 days ago
د افغانستان الف کرکټ لوبډلې د سریلانکا پر وړاندې ماتې وخوړه
-
سیمه ییز خبرونه3 days ago
په هندي کشمیر کې وسلوالو له ۲۰ ډېر سیلانیان ووژل
-
تازه خبرونه3 days ago
په روسیه کې د افغانستان محصولات نندارې ته وړاندې کېږي
-
سوداگري2 days ago
د پاکستان او ازبکستان استازو پر افغان – ټرانس پروژې خبرې وکړې
-
د هوا حالاتو بدلونونه2 days ago
یوې ۶.۲ درجې زلزلې استانبول ولړزاوه
-
تازه خبرونه2 days ago
افغان بېسیم د ننګرهار په کوزکوڼر ولسوالۍ کې یو نوی سایټ فعال کړ