د سرحدونو، قومونو او قبایلو چارو وزیر نورالله نوري نن( یکشنبه د غویي شپږمه ) په بلخ ولایت کې د اسلامي نظام د دفاع تر سرلیک لاندې جوړې شوې غونډې ته ډاډ ورکړ؛ افغانستان په سیمه‌ییزه او نړیواله کچه یو امن هېواد دی، چې سیاسي او اقتصادي روابط یې د پراخېدا په حال کې دي.

نورالله نوري دغه راز ویلي، چې افغانانو د تاریخ په اوږدو کې په‌خپله خاوره د حاکمیت اجازه چا ته نه‌ده ورکړې.

نوموړي زیاته کړې؛ د افغانستان اقتصاد اوس قوي دی او اسلامي امارت د خپل کلک هوډ پر مټ په ډېرو برخو کې ځان بسیاینې ته رسېدلی دی.

هغه وویل: که څوک زمونږ په کورنیو چارو کې لاسوهنه کوي او یا هم پر افغانستان د تېري سوچونه وهي؛ له روس، انګرېز او امریکا څخه دې درس واخلي.

د ولسونو استازو او مخورو مشرانو د افغانستان اوسنی یووالی په تېرو ۴۵ کلونو کې بې‌سارې وباله او څرګندوي، چې خلک تر بل هر وخت په‌دې نظام ډېر باور لري. د اسلامي امارت مشران له ختیځ او لویدیځ څخه نه‌دي راغلي، بلکې د دې خاوري اصلي بچیان دي.

یادو مشرانو یو ځل بیا وویل؛ دا نظام د ولسونو د زړه نظام دی او کوم کارونه، چې په دې لنډه موده کې ترسره شوي بېلګې یې په څو پېړیو کې لیدل شوې نه‌دي. 

د امربالمعروف نهی عن المنکر او شکایتونو اورېدلو وزارت مسلکي معین شیخ نور محمد حقاني تېر ٤٠ کلونه له کړاوونو ډک پېر وباله او د افغانانو د حوصلې او مېړانې ستاینه یې وکړه.

هغه ویلي؛ د اسلامي امارت له راتګ مخکې دلته د قومونو تر منځ اختلافات اوج ته رسېدلي وه، خو اوس ټول افغانان له متقابل درناوي برخمن دي.

د بلخ والي یوسف وفا هم غونډې ته ویلي؛ جمهوریت د بُن په کنفرانس کې پر افغانانو تپل شوی حکومت و، چې هیڅ قانون او تګلاره یې له ولسي ژوندانه سره اړخ نه‌لګاوه.

هغه ویلي: اسلامي امارت د خلکو له متن څخه انتخاب شوی نظام دی، چې د اسلامي شرعیت په رڼا کې د ولس هرې مشورې او نظر ته د قدر پر سترګه ګوري. 

ویل کیږي، چې په دې ناسته کې د یاد وزارت د وزیر پر مشري تللي پلاوي او د بلخ د والي ترڅنګ ولایتي مسوولانو، علماء کرامو، د خلکو استازو، زده‌کړیالانو، ډاکټرانو او عامو خلکو ګډون کړی و.

د افغانستان بهرنیو چارو وزیر امیرخان متقي په کابل کې د دودیزې غېږنیونې په ننداره کې د ګډون کوونکو هېوادونو له استازو سره وکتل.

په دې کتنه کې متقي د افغانستان او سیمې ترمنځ کلتوري اړیکې تاریخي وبللې او څرګندوي، چې کابل هڅه کوي د سپورټي ډیپلوماسۍ له لارې خپلې نړیوالې اړیکې پراخې او نورې هم ژورې کړي.

د بهرنیو چارو وزیر د ویزو د آسانتیا او لوبغاړو ته د اړین ملاتړ د برابرولو پر پرله‌پسې هڅو ټینګار وکړ او وایي، چې په نړیوالو سپورټي سیالیو کې د ګډون د آسانتیا لپاره هم هڅې روانې دي.

هغه همدارنګه ویلي، چې د اسلامي امارت له بیا واکمنېدا راپدېخوا په ټول هېواد کې د دودیزو سپورټونو د ودې لپاره د پام وړ پرمختګونه شوي دي.

د ګډون کوونکو هېوادونو استازو د دې نړیوالې نندارې د جوړېدا، د سیالۍ مدیریت او په افغانستان کې د دودیزې غېږنیونې له معیار ستاینه وکړه. هغوی همدارنګه په سپورټي برخه کې د همکاریو او ګډو نوښتونو د پیاوړتیا لپاره خپل چمتووالی څرګند کړ.

د دودیزې غېږنیونې نړیواله ننداره، چې افغانستان یې کوربه و؛ تېره پنجشنبه په کابل کې پیل شوه او د اووه هېوادونو لوبغاړي یې سره ولوبول. په دې سیالیو کې شاوخوا ۶۰ بهرنيو او ۱۰۰ افغان لوبغاړو برخه اخیستې وه. د غېږنیونې په دې ننداره کې د ازبکستان، قرغزستان، ترکمنستان، تاجکستان، ایران او ترکیې لوبغاړو ګډون درلود.

د سرحدونو، قومونو او قبایلو چارو وزارت پر مشرۍ او د نورو کاري ادارو پر همکارۍ د نورستان ولایت له برګ‌مټال څخه د پکتیکا ولایت تر تروې ولسوالۍ پورې ۱۲۵ پراختیایي پروژې پلي کېږي.

د سرحدونو، قومونو او قبایلو چارو وزارت د څرګندونو له مخې؛ د دې وزارت د ښوونې او روزنې رییس عبدالرحمان رحماني د لوګر ولایت ازرې ولسوالۍ په جانوخېلو سیمه کې، چې ډیورنډ فرضي کرښې ته نږدې پرته ده؛ د ۲۳ میلیون افغانیو پر ارزښت د یوې عام‌‌المنفعه پروژې د پرانستې مراسمو ته څرګنده کړې: د اسلامي امارت د رهبر د ځانګړي شفقت له مخې؛ د نورستان ولایت له برګ‌مټال ولسوالۍ څخه د پکتیکا ولایت تر تروې ولسوالۍ پورې ۱۲۵ پراختیایي پروژې پلي کېږي، چې چارې یې د سرحداتو وزارت او د هر ولایت د مرستیال والي، نورو اړوند ولایتي ادارو او قراردادي شرکتونو له لوري پر مخ وړل کېږي، چې خلکو ته سهولتونه برابر شي.

دغه راز د یاد ولایت مرستیال والي محمد انور دین ‌پرور له دې پروژې څخه د خوښۍ څرګندونو تر څنګ ویلي: هغه هېوادونه، چې په افغانستان کې د حاکم نظام پرمختګ نشي زغملی او تل هڅه کوي او غواړي په یوه او بله پلمه دا هېواد له ناورین سره مخ کړي؛ زمونږ خبرداری دا دی، چې له دې کاره لاس واخلي او افغانان د افغانستان ودانولو ته پریږدي.

ویل کیږي، چې د هېواد سیاسي، اقتصادي او ټولنیز پرمختګ، ودانول او خلکو ته د سهولتونو برابرول د اسلامي نظام بنسټیزې موخې دي.