په افغانستان کې د نړیوالو ځواکونو پخواني قومندان ویلي؛ امریکا ته نه ښایي، چې له افغانستان څخه د ځواکونو په بې وخته ویستو کې د عراق تجربه تکرار کړي.

په افغانستان کې د نړیوالو ځواکونو پخواني قومندان جنرال دېوید پتریوس ، چې د سي آی اې مشري یې هم کړې؛ د وال ستریت ژورنال یوه لیکنه کې له افغانستان څخه د امریکایي ځواکونو د بې وخته وتلو پر ناوړه پایلو خبرداری ورکوي او وایي، چې  که امریکایي ځواکونه له افغانستان څخه ووتل دا هېواد به بیا د ترهګرو پر خوندي مرکز واوړي او امریکا باید دا تېروتنه ونکړي.

هغه تینګار کوي، چې امریکا باید لومړی په افغانستان کې پر سوله او ټیکاو خپل ډاډ بشپړ کړي او وروسته ځواکونه وباسي.

دا څلور ستوریز جنرال وایي، امریکا باید له افغانستان څخه د ځواکونو په ویستو کې د عراق تجربه تکرار نکړي.

په افغانستان کې د نړیوالو ځواکونو پخوانی قومندان جنرال دېوېد پتریوس وايي، چې د واشنګتن مشران باید په احتیاط عمل وکړي. په داسې حال کې، چې له طالبانو سره دیپلوماتیک پرمختګونه ممکن دي؛ خو دا د ځواکونو د کمولو لپاره دلیل نشي کیدای. د ترمپ دولت باید د مخکیني دولت تېروتنه، چې په عراق کې تر سره کړې وه، تکرار نکړي او له افغانستان څخه د ټولو جنګي ځواکونو د ویستو لپاره غاړه کیندي. نن  له افغانستان څخه د ټولو ځواکونو ویستنه ناقانونه او له هغې خطرناکه ده، چې د اوباما دولت پر ۲۰۱۱ کال په عراق کې تر سره کړې وه.

د امریکا دا متقاعد جنرال وایي؛ په کار ده، چې امریکا په افغانستان کې پر توند لارو ډلو پوځي فشار وساتي او دا هغه مهال شونې ده، چې امریکا په دې هېواد کې پرمختللي پوځي وسایل او هوایي ځواک ولري.

د نوموړي د څرګندونو له مخې؛ داسې ښکاري، چې له میاشتو خبرو او مذاکرو وروسته د امریکا او طالبانو تر منځ د سولې هوکړه ژر اعلان شي او په بدل کې طالبان له نړیوالو ترهګرو ډلو سره د مبارزې او له افغان حکومت سره د خبرو اترو ژمنه وکړي. د امریکا پوځي حضور کمیږي؛ خو که امریکایي ځواکونه له افغانستان څخه ووځي، طالبان ممکن د افغان حکومت پرځولو لپاره کار وکړي.

ده ټینګار کړی، چې د طالبانو مخالفت له رسمي اوربند سره، پر ملکیانو شدید بریدونه او له ټاکنو سره د دې ډلې مخالفت د خطر زنګ بلل کیدای شي. ده د داعش په ګډون د نورو شل ترهګرو ډلو پر شتوالي هم اندېښنه ښودلې ده.

د ملي دفاع وزارت ویاند روح الله احمدزي ویلي، چې له افغان حکومت څخه د نړیوالو ځواکونو وتل به د یوه تړون پر بنسټ وي او په وینا یې اوس هم د جګړې مشري افغان ځواکونه کوي.

جنرال دېوید پتریوس د خپلې مقالې په پای کې د ترمپ دولت ته سپارښتنه کړې، چې باید د عراق له ترخې تجربې عبرت واخلي.