المرصاد رسنۍ د امنیتي سرچینو د څرګندونو له مخې راپور ورکړی: زلمی بدخشي، چې د داعش خراسان څانګې له‌خوا په کندوز ولایت کې د کابل بانک پر څانګې د برید له اصلي طراحانو څخه و؛ په پېښور ښار کې د ناڅرګندو وسله‌والو د برید له کبله وژل شوی دی.

بدخشي، چې د داعش خراسان په څانګه کې سلمان هم یادېده؛ د ۲۰۲۵ ز.کال په اوکټوبر کې له افغانستان څخه وتښتېد او د خیبر پښتونخوا ایالت د داعش له فعالو مرکزونو سره یوځای شو.

هغه په ​​مستقیم ډول د ۲۰۲۵ کال د فبرورۍ پر یوولسمه د کندوز پر کابل بانک د برید پلان جوړولو مسوول و، چې په کې پېنځه کسان وژل شوي او اووه نور ټپیان شول.

المرصاد دا هم لیکلي، چې د فبرورۍ پر اته‌ویشتمه په تیراه دره کې د داعش پر مرکزونو د لیزري لرلیدونو پر کارولو عملیات ترسره شول، چې په کې د دې ډلې ۱۰ غړي ووژل شول.

همدارنګه د مارچ پر لومړۍ د اورکزو د تورکاڼي او نریک غلجو په اړوند سیمو کې یو برید وشو، چې له کبله یې د داعش د دوه قومندانانو( عبدالرحمن(ابو ناصر) او ملا فاروقي ) په ګډون نهه غړي ووژل شول.

د اسلامي امارت عدلیې وزیر عبدالحکیم شرعي نن( پنجشنبه د کب څوارلسمه) له سوداګرو او د معاملاتو لارښوونو د اتحادیو له مسوولانو سره په ناسته کې د لومړنیو توکو له احتکار او کورونو د کرايې لوړېدا پر مخنیوي ټینګار کړی دی.

د عدلیې وزیر څرګنده کړې، چې د اتحادیو مسوولان دې خپل مسوولیتونه سم ترسره کړي او خلکو ته دې خدمت وکړي.

نوموړي زیاته کړې؛ د سوداګرو اتحادیه او د معاملاتو لارښوونې اتحادیه دې د خوراکي لومړنیو توکو د احتکار د مخنیوي او همدارنګه د کورونو د کرايې د لوړېدا د مخنیوي په برخه کې خپلو مسوولیتونو ته پوره پاملرنه وکړي.

عبدالحکیم شرعي ټینګار کړی، چې یادې اتحادیې دې له اړوند ادارو په ځانګړي توګه له ښاروالۍ سره په همغږۍ کې د بیو د کنټرول او تنظیم په برخه کې ګډ کار او هڅې وکړي.

ویل کیږي، چې د سوداګرو او د معاملاتو لارښوونو د اتحادیو رییسانو او مسوولانو د بازار د نظم او ټیکاو د ساتنې او د بیو د کنټرول ژمنه وکړه.

د خیبر پښتونخوا اعلی وزیر سهیل افریدي غوښتنه کړې، چې له پاکستان څخه دې یو ټولګډونه پلاوی د سلامي امارت له چارواکو سره د خبرو لپاره افغانستان ته سفر وکړي.

سهیل اپریدي د چارشنبې پر ورځ په پېښور کې د یوې پروژې د پرانیستې پر مهال اړوند مراسمو ته ویلي؛ دا پلاوی باید د پاکستان له ایالتي او فډرالي چارواکو، علماوو او قبایلي مشرانو څخه جوړ شي.

افریدي زیاته کړې: « زمونږ نظر دا دی، چې دا پلاوی به اغېزمنه وي او که ټولګډونه پلاوی افغانستان ته ولاړ شي؛ نو وضعیت به ښه شي.»

اسلام‌آباد تل ادعا کړې، چې وسلوالې ډلې د افغانستان له خاورې د پاکستان پر ضد بریدونه کوي.

اسلامي امارت هم تل د پاکستان د پوځي رزیم دا ادعا رد کړې او څرګندوي، چې افغانستان د پاکستان د «امنیتي ناکامیو» مسوول ندی.