طالب مشرتابه د روان کال د شنبې پر ورځ ( د کب ۲) خپلو ټولو سیمه ییزو مسوولينو او جنګياليو ته سپارښتنه کړی، چې د افغانستان له هنري او تاريخي آثارو نه یوازې ساتنه وکړي، بلکې د خپلسرې کېندنې، قاچاق او سوداګرۍ مخه دې هم ونیسي.

طالبانو په خپله خپره شوې اعلامیه کې له خپلو ټولو واليانو، ولسوالانو، د قطعو مسوولينو، ډلګي مشرانو، عامو جنګياليو او ټول ولس ته سپارښتنه کړې، چې تاريخي ٍثار د هېواد د هويت او بډايه فرهنګ مهمه برخه ده او ټول يې بايد په کلکه د څارنې او ساتنې هڅې وکړي.

په اعلاميه کې راغلي، چې د هېواد په هیڅ ځای کې د تاريخي آثارو د کېندلو، قاچاق او پلورلو اجازه نشته او نه بايد څوک له دې لارې د ګټې وټې تمه وکړي.

په اعلامیه په ډاګه شوې، چې؛ ټول مجاهدین دې د تاریخي سیمو لکه زړې کلاوې، تاریخي څلیو، منارونو ، برجونه او نورو پخوانيو ځایونو ښه څارنه وکړي، چې له تخریب، ویجاړۍ او ضرر څخه خوندي پاتې شي.

دغه راز څرګنده شوې؛ د تاريخي آثارو د څار او ساتنې مسووليت د طالبانو فرهنګي کميسيون ته سپارل شوی او ټولو مسوولينو او جنګياليو ته سپارښتنه شوې، چې پدې اړه له فرهنګي کميسيون سره مرسته او همکاري وکړي.

طالبانو په داسې حال کې پر هېوادنیو فرهنګي آثارو د څارنې سپارښتنه کړې، چې له تېرو څو کلونو راپدیخوا په هېواد کې د تاريخي آثارو او قيمتي ډبرو قاچاق او د تاريخي سیمو کېندنې زور اخیستی او د يو شمېر بهرنيانو په ګډون ګڼشمېر زور واکانو خپلسرې کېندنې کړي او د آثارو د قاچاق هڅې تر سره شوې دي.

له دې مخکې د افغانستان په پارلمان کې هم د هنري او تاریخي آثارو پر نه خوندیتوب اندېښنه په ډاګه شوې وه.

د ولسي جرګې مشر مير رحمان رحماني د سرو زرو د باختري خزانې د خوندي کولو په اړه ویلي وه، چې بايد یو باوري هېواد ته د امانت په توګه وسپارل شي، چې څو ورځې وروسته ولسمشسرۍ ماڼۍ دغه تاریخې خزانه نندارې ته وړاندې کړه او پر خوندیتوب او څارنې یې ټینګار وړاندې کړ.  

دا په داسې حال کې ده، چې په تېرو وختونو کې طالبان د بودا د پژو تاریخي میراث پر ویجاړولو تورن شوي دي.