د افغانستان بهرنیو چارو وزیر امیرخان متقي د ملګرو ملتونو د سياسي چارو لپاره د عمومي منشي له مرستيالې روزميري ډيکارلو سره د پاکستان پر وروستي بريد، چې په کې د هېواد ملکي وګړو ته ځاني او مالي زیانونه اوښتي ټیلیفوني خبرې کړې دي.

د افغانستان بهرنیو چارو وزارت د نننۍ خپرې شوې خبرپاڼې له مخې؛ په دې ټیلیفوني خبرو کې امیرخان متقي د پاکستان له‌خوا د وروستیو هوايي بريدونو په اړه، چې په کې ملکي وګړي پر نښه شوي خپله ژوره اندېښنه څرګنده کړې او وایي، چې د تېرو څلورو کلونو په بهیر کې د پاکستان له لوري په بريدونو کې يوازې ملکي وګړي پر نښه شوي دي.

امیرخان متقي د پاکستاني پوځیانو د هوایي بریدونو په اړه دا هم ویلي؛ په یادو بریدونو کې هيڅکله داسې کوم وسله‌وال ندی وژل شوی، چې پاکستانی لوری یې د شتون او پر نښه کولو ادعا لري.

د بهرنيو چارو وزير زیاته کړې؛ په افغانستان کې وسلوالي ډلي شتون نلري او د ملګروملتونو د استازیو په ګډون ټولې خواوې کولی شي، چې د وروستي هوايي بريد ځای ته ورشي او وضيعت له نږدې وارزوي.

په دې خبرپاڼه کې راغلي؛ د ملګرو ملتونو د عمومي منشي مرستیالې روزميري ډيکارلو د پاکستان په وروستي بريد کې د ملکيانو پر زیانونو خپله ژوره خواشیني ښکاره کړې او څرګندوي، چې د هوايي بريدونو موضوع به د ملګرو ملتونو له غړو هېوادونو او ټولو اړخونو سره راپورته کړي.

ویل کیږي، چې په دي خبرو کې د دوحې پر ناستو، کاري ډلو او اړوند نورو مسائلو هم خبرې او وړانديزونه وشول او ډاډ څرګند شو، چې د شته پرمختګونو تر څنګ به د ګډو هڅو په اړه نور پرمختګ ته هم لار اواره شي.

د افغانستان اسلامي امارت د روسیې د وروستۍ ادعا په ځواب کې، چې په افغانستان کې د نړیوالو ترهګرو ډلو جنګیالي حضور لري؛ رد کړه او وړاندې شوې سرچینې او معلومات یې ناسم ښودلي دي.

د اسلامي امارت ویاند ذبیح الله مجاهد ټینګار کړی، چې افغانستان په یوه باثباته امنیتي وضعیت کې دی او هیڅ بهرنۍ ډله په هېواد کې فعاله نده.

د نوموړي د څرګندونو له مخې؛ د افغانستان ټوله جغرافیه د یو واحد حاکمیت لاندې اداره کیږي او د بهرنیو ډلو د فعالیت لپاره هیڅ زمینه نشته.

ذبیح‌الله مجاهد ویلي: “مونږ خواشیني یوو، چې د روسیې له سرچینو څخه دا ډول ادعاوې وړاندې کیږي؛ هغه ادعاوې، چې په تېر کې ان د امریکا له اشغال راپدېخوا تکراریږي. مونږ یې په ټوله کې ردوو.”

هغه دا هم ویلي؛ اسلامي امارت د روسیې له چارواکو څخه غوښتي، چې په افغانستان کې واقعیتونه په سمه توګه درک کړي او خپل راپورونه د عیني حقایقو او د هېواد د اوسنیو شرایطو پر بنسټ تازه کړي.

اسلامي امارت تل  ټینګار کړی، چې د افغانستان خاوره به د بل هېواد پر ضد ونه کارول شي؛ ځکه په هېواد کې امنیت خوندي دی.