تازه خبرونه
د خپلو خلکو په خدمت کې ډېر اخلاص او کوښښ وکړئ ـ د شیخ هبةالله آخوندزاده د کوچني اختر پیغام
د اسلامي امارت مشرتابه د سې شنبې پر ورځ د نېکمرغه کوچني اختر په مناسبت په خپل پیغام کې د افغانستان مجاهد او مؤمن ولس او د نړۍ ټولو مسلمانانو ته د کوچني اختر د مبارکۍ ترڅنګ د افغانانو پر لاسنیوي، خدمت او اخلاص پوره ټینګار څرګند کړی دی.
په دغه پیغام کې راغلي، چې د افغانستان خلک باید شکر وباسي، چې له ډېرو جګړو وروسته مو امنیت او شرعي نظام خوندي کړ.
هغه له شتمنو هېوادوالو وغوښتل، چې په دې موده کې د کونډو، یتیمانو او د شهیدانو د کورنیو په ګډون له اړمنو سره مرستې وکړي.
هغه ویلي؛ ټول شتمن وروڼه دې د خپلو مسکینو او غریبو هېوادوالو، یتیمانو، کونډو او شهیدانو له کورنیو سره هر ډول مرسته او د هغوی لاس نیوی وکړي؛ خپلې فرضي او نفلي صدقې او خیراتونه دي په دې مبارکو شپو کې مستحقو خلکو ته ورکړي، چې خپل حاجتونه پرې پوره او د اختر خوښۍ په ښه توګه ولمانځي او د شتمنو وروڼو د روژو د نواقصو جبیره هم وشي.
آخوندزاده د اسلامي امارت پر مسوولینو او ځواکونو غږ وکړ، چې خلکو ته نږدې شي او د شریعت له مخې د هغوی د حقونو او د هغوی خوښي په نظر کې ونیسي.
هغه د اسلامي امارت مسوولین او مجاهدین مکلف کړي، چې د خپلو خلکو په خدمت کې ډېر اخلاص او کوښښ وکړي.
نوموړی وایي: د خلکو خدمت عبادت دی؛ ځکه باید په ښه وجه ترسره او د هغوی شرعي حقوق او خوښي په نظر کې ونیول شي.
نوموړي دغه راز له ټولو خواوو وغوښتل، چې د قانون د ټينګښت په برخه کې له پوهنې وزارت سره همکاري وکړي.
په خبرپاڼه کې راغلي: د فرهنګ، پوهنې، اقتصاد، رسنیو او نورو برخو کې د پام وړ اصلاحي اقدامات شوي او د اشغال ناسم فکري او اخلاقي اغېزې د پای ته رسېدو په حال کې دي… زمونږ هېوادوال باید دا اصلاحي اقدامات تر بل هر څه ډېر مهم وګڼي؛ ځکه د دیني اصولو او شریعت په رڼا کې زمونږ د دنیوي او اخروي ژوند د هوساینې ضمانت کوي او د ټولنې د خوشالۍ، سوکالۍ او دایمي نجات سبب ګرزي.
هغه د هېواد پر دیني عالمانو غږ وکړ، چې په ځانګړي ډول د دین په اړه خلکو ته د معلوماتو ورکولو او د پوهنې، لوړو زدهکړو او اطلاعاتو او فرهنګ له وزارتونو سره د همکارۍ په برخه کې خپل مسوولیت تر سره کړي.
د شیخ هبةالله آخوندزاده د څرګندونو له مخې؛ ملت او هېواد هغه وخت عزت، امنیت او رښتینې سوکالي ترلاسه کوي، چې په خلکو کې بغاوت او سرکشي نه وي.
هغه زياته کړې؛ له همدې کبله د خلکو د اصلاح او خبرولو مسووليت د علماوو پر اوږو دى او هغوى بايد په دې برخه کې خپل مکلفيت او دنده په ښه ډول ترسره او د خلکو د ذهنونو د اصلاح او روښانولو په برخو کې خپل کارونه روان وساتي او په جوماتونو، غونډو، رسنیو او پروګرامونو کې د هغو د لارښوونې ښه وسیله او د دوی ترمنځ د همغږۍ او د باور فضا رامنځته کړي. دوی باید له اختلافاتو ډډه وکړي او دین او خلکو سترو ګټو ته پام راواړوي.
آخوندزاده دا هم ويلي، چې هر څوک د خپل وطن د آبادولو مسووليت لري؛ مونږ ټول مسوول او غیر مسوول افغانان اړ یوو، چې خپل هېواد آباد او پخپلو پښو ودروو.
هغه دا هم ویلي، چې افغانان باید پر نورو تکیه ونکړي او خپله کار ته ته مټې رابډوهي؛ ځکه، چې کار عبادت دی.
دغه راز څرګنده شوې، چې د هېواد ملي سوداګر او د سوداګرۍ خاوندان د نورو پر پرتله له ډېرو حقونو برخمن دي او اسلامي امارت یې نه یوازې ملاتړ کوي،بلکې اسانتیاوې هم ورته برابروي.
هغه د ثبات او امنیت پر ټینګښت هم ټینګار څرګند کړ.
آخوندزاده له ګاونډ هېوادونو او نړيوالې ټولنې سره د اړيکو په اړه ويلي: افغانستان له خپلو ګاونډیو، اسلامي هېوادونو او نړۍ سره د متقابلو ګټو پر بنسټ او د اسلامي اصولو په چوکاټ کې د مثبتو اړيکو غوښتونکى دى؛ ځکه افغانستان نه غواړي د چا په کورنيو چارو کې لاسوهنه وکړي او له نورو هېوادونو هم غواړي، چې زمونږ په کورنيو چارو کې لاسوهنه ونهکړي. دا کار د افغانستان او نړۍ دواړو پر ګټه دى.
نوموړي په هېواد کې د کوکنارو د کښت مخنيوى يوه لويه لاسته راوړنه ګڼي او څرګندوي، چې ډېر ژر به افغانستان د کوکنارو له کښت او نشه يي توکو پاک شي.
هغه یادونه وکړه، چې په کابل او ولایتونو کې پر نشهيي توکو روږدي کسان له سړکونو راټول شوي او راټولیږي؛ ځکه، چې دا داسلامي امارت یو بل شرعي مکلفیت دی.
نوموړي ډاډ څرګند کړی، چې د اقتصادي او ښوونیز حالت د ښه کېدو لپاره هم هڅې همغږې شوې دي او وایي؛ په ټول هېواد کې د تعلیم او تربیې پراخول او د ټولو ماشومانو ښه روزنه د اسلامي امارت له مسوولیتونو څخه یو مسوولیت دی او د نور پرمختګ لپاره یې پر اغېزمنو پلانونو کار روان دی.
هغه د حکومتولۍ د نورو مسلو او د قضایي سیستم پر اړه ویلي: د اسلامي امارت محاکم او قضايي نظام، چې د ټولو ارګانونو تر منځ ځانګړی حیثیت لري او کار یې ډېر مهم ګڼل کیږي؛ ځکه، چې د اسلامي نظام اساسي هدف د سر، مال، عقل، حیثیت او الله پاک ورکړیو حقونو ساتنه ده. له همدې کبله ټولو قاضیانو او د محاکمو مسوولینو ته لارښوونه کیږي، چې د خلکو د حقوقو پر ترلاسه کولو، شخړو اوارولو او پلوي نهکولو ټینګار وکړي؛ د مجرم پر ځای جرم ته وګوري او د مظلوم دفاع وکړي. د ظالم مخه ونیسئ او د خلکو قضیې پرته له ځنډ او خنډ څخه حل کړئ.
دغه راز هغه له امنيتي او دفاعي ځواکونو وغوښتل، چې پر عدالت، سخاوت او ميړانه عمل وکړي او له کبر، غرور، ظلم، خيانت او بې ځايه لګښتونو څخه ډډه وکړي.
ویل کیږي، چې له هر ډول تبعیض څخه په کلکه ډډه وکړئ، خپلو خپلوانو ته د دندې وړاندیز مه کوئ او هره ګمارنه باید د وړتیاوو پربنسټ ترسره شي.
تازه خبرونه
په افغانستان کې له نیمايي ډېر ماشومان له رسمي زدهکړو بېبرخې دي- ملګري ملتونه
د دې دوه بنسټونو په ګډ راپور کې، چې« په ۲۰۲۶ز.کال کې د افغانستان د زدهکړو وضعیت» نومېږي؛ خبرداری ورکړ شوی، چې د هېواد ښوونیز نظام د زدهکړو لپاره د غوښتنې زیاتوالي، د نفوس د ودې، پرلهپسې کړکېچونو، د پانګونې د کموالي او له پاکستان او ایران څخه د افغان کډوالو د پراخې بېرته راستنېدا له کبله له زیاتېدونکو فشارونو سره مخ دی.
د ملګرو ملتونو تعلیمي، علمي او فرهنګي بنسټ( یونسکو) او د ماشومانو د ملاتړ صندوق( یونیسف) په یوه تازه راپور کې څرګنده کړې: د افغانستان له نیمايي ډېر هغه ماشومان، چې د لومړنیو زدهکړو عمر لري؛ رسمي زدهکړو ته لاسرسی نهلري او څه باندې ۲.۶ میلیون نجونې هم نهشي کولی له شپږم ټولګي پورته خپلې زدهکړې روانې وساتي.
د دې دوه بنسټونو په ګډ راپور کې، چې« په ۲۰۲۶ز.کال کې د افغانستان د زدهکړو وضعیت» نومېږي؛ خبرداری ورکړ شوی، چې د هېواد ښوونیز نظام د زدهکړو لپاره د غوښتنې زیاتوالي، د نفوس د ودې، پرلهپسې کړکېچونو، د پانګونې د کموالي او له پاکستان او ایران څخه د افغان کډوالو د پراخې بېرته راستنېدا له کبله له زیاتېدونکو فشارونو سره مخ دی.
د راپور له مخې: په افغانستان کې د زدهکړو عمر لرونکو کسانو، چې له اووه څخه تر ۱۸ کلونو پورې عمرونه لري؛ شمېر په ۲۰۱۹ز.کال کې له شاوخوا ۱۰.۴ میلیون څخه په ۲۰۲۴ کال کې ۱۱.۵ میلیون کسانو ته لوړ شوی، چې له کبله یې پر ښوونځیو، ښوونکو او ښوونیزو خدمتونو فشار زیات شوی دی.
دغه راز سږ کال له ګاونډ هېوادونو څخه څه باندې یو میلیون افغان کډوال هېواد ته راستانه شوي، چې څه باندې ۲۴۵ زره یې ماشومان دي.
په راپور کې زدهکړو ته د لاسرسي نابرابرۍ ته نغوته شوې، چې د ۲۰۲۱ز.کال په اګست کې واک ته د اسلامي امارت له بیا رسېدا راپدېخوا څه باندې ۲.۶ میلیون نجونې له شپږم ټولګي څخه پورته له زدهکړو بېبرخې پاتې شوې دي.
د دغو دوه بنسټونو د څرګندونو له مخې؛ د ځوانو نجونو لپاره د بدیلو زدهکړیزو فرصتونو لکه ټولنیزې زدهکړې، د سواد زدهکړې او مسلکي مهارتونو پروګرامونه، له لرې واټنه زدهکړې او خصوصي تدریس، د هغوی د اړتیاوو د پوره کولو لپاره بسنه نهکوي.
په راپور کې راغلي، چې د ټولنې پر بنسټ شاوخوا پنځه زره او ۳۰۰ ښوونیزو ټولګیو نږدې ۱۶۲ زره زدهکوونکو ته د زدهکړو زمینه برابره کړې، چې ۶۴ سلنه یې نجونې دي؛ خو دغه پروګرامونه د رسمي او حضوري زدهکړو ځای نهشي نیولی.
دغه راپور همدارنګه په ښوونیز نظام کې د هلکانو د ګډون د کموالي یادونه کړې او ویلي یې دي، چې د لومړنیو زدهکړو د عمر شاوخوا ۵۳ سلنه ماشومان له رسمي عمومي زدهکړو بېبرخې پاتې دي.
له دې ننګونو سره- سره افغان کورنۍ اوس هم خپلو ماشومانو ته د زدهکړو د فرصتونو برابرولو هڅې کوي.
د راپور له مخې، تېر کال شاوخوا ۶.۶ میلیون ماشومان په دولتي لومړنیو ښوونځیو کې شامل شوي، چې د ۲۰۲۲ز.کال پر پرتله شاوخوا ۵۶۰ زره کسان زیاتوالی ښيي؛ خو د نوملیکنې دغه زیاتوالی د زدهکړو عمر لرونکو ماشومانو د نفوس له ودې سره سمون نهلري.
په راپور کې د زدهکړو کیفیت هم د اندېښنې وړ بلل شوی او راغلي، چې د یوې ټولهېوادیزې ارزونې له مخې؛ د څلورم ټولګي له نیمايي کم زدهکوونکي د ژبې په برخه کې اړینو لومړنیو مهارتونو ته رسېدلي دي.
دغه راز د افغانستان د لوړو زدهکړو برخه هم د ۲۰۲۱ز.کال له مخکنیو کلونو سره پر پرتله د پام وړ کوچنۍ شوې ده.
په راپور کې راغلي، اوسمهال د هېواد په پوهنتونونو کې شاوخوا ۲۰۸ زره زدهکړیالان پر زدهکړو بوخت دي. په داسې حال کې، چې دغه شمېر په ۲۰۲۴ز.کال کې شاوخوا ۱۸۹ زره او په ۲۰۲۰ز، کال کې نږدې ۴۳۰ زره کسان و.
یونسکو او یونیسف د افغان نجونو او ښځو د اړوند زدهکړو د حق د بېرته ورکړې غوښتنه کړې او د پوهنې په برخه کې یې د پانګونې پر زیاتوالي، د ښوونکو د وضعیت پر ښهوالي او د درسي توکو پر برابرولو ټینګار کړی دی.
دغو دوه بنسټونو خبرداری ورکړی، چې که د شته ننګونو د اواري لپاره بېړني ګامونه پورته نهشي؛ د افغانستان د ماشومانو او تنکیو ځوانانو یو بشپړ نسل به له زدهکړیزو فرصتونو پاتې شي؛ دا هغه څه دي، چې د هېواد پر راتلونکې بیارغونه او پرمختګ ناوړه اغېزې لرلی شي.
تازه خبرونه
په افغانستان کې د ډیپلوماسۍ او اسلامي همکاریو ټولنې د هڅو په اړه علمي ناسته تر سره شوه
په دې ناسته کې د بهرنیو چارو وزارت د کارکوونکو ترڅنګ د بېلابېلو وزارتونو او امارتي ادارو یو شمېر مسوولانو هم ګډون کړی و.
د اسلامي همکاریو ټولنې د دفتر عمومي رییس او سفیر ډاکټر محمد بن سعید العیاش د افغانستان د بهرنیو چارو وزارت د ډیپلوماسۍ په انستیتوت کې د ډیپلوماسۍ او د دې ټولنې د هڅو په اړه علمي وینا او څرګندونې کړې دي.
په دې ناسته کې د بهرنیو چارو وزارت د کارکوونکو ترڅنګ د بېلابېلو وزارتونو او امارتي ادارو یو شمېر مسوولانو هم ګډون کړی و.
محمد بن سعید العیاش په خپله وینا کې د عامه او څو اړخیزې ډیپلوماسۍ پر ارزښت، مهمو وسایلو او کاري میکانېزمونو خبرې وکړې او ګډونوالو ته یې د اسلامي همکاریو ټولنې د تاریخ، بېلابېلو اداري او تشکیلاتي جوړښت معلومات وړاندې کړل.
نوموړي همدارنګه د اسلامي همکاریو ټولنې په سرمشریزو او د بهرنیو چارو وزیرانو په غونډو کې د افغانستان په اړه د شویو پرېکړو په اړه معلومات ورکړل او څرګنده یې کړه، چې په کابل کې د دې ټولنې دفتر د یادو پرېکړو د پلي کېدا بهیر څاري.
د نوموړي د وینا یوه مهمه برخه په بېلابېلو برخو کې د افغانستان د ملاتړ لپاره د اسلامي همکاریو ټولنې هڅو او رول ته ځانګړې شوې وه.
د غونډې په پای کې ګډونوالو خپلې پوښتنې او لیدلوري شریک کړل او د مطرح شویو موضوعاتو په اړه هراړخیز بحث او اندونه وړاندې شول.
تازه خبرونه
امریکايي محکمې پاکستان او افغانستان ته د نیول شویو افغانانو د لېږدولو بهیر ودراوه
اسوشیتیډ پرس خبري آژانس راپور ورکړی، چې دغه پرېکړه له هغې وروسته شوې، چې د کډوالو د حقونو مدافع بنسټونو او د امریکا د کانګرس لسګونو غړیو افغانستان ته د دغو کسانو د بېرته لېږلو په صورت کې د شکنجې، ځورونې او ان د مرګ له ګواښ څخه اندېښنه څرګنده کړه.
د امریکا په نیویارک کې یوې فډرالي محکمې د سېشنبې پر ورځ په لنډمهالي بڼه د ډونالډ ټرمپ د حکومت هغه پلان ودراوه، چې له مخې یې په امریکا کې نیول شوي افغان وګړي پاکستان یا افغانستان ته لېږدول کېدل.
اسوشیتیډ پرس خبري آژانس راپور ورکړی، چې دغه پرېکړه له هغې وروسته شوې، چې د کډوالو د حقونو مدافع بنسټونو او د امریکا د کانګرس لسګونو غړیو افغانستان ته د دغو کسانو د بېرته لېږلو په صورت کې د شکنجې، ځورونې او ان د مرګ له ګواښ څخه اندېښنه څرګنده کړه.
فډرالي قاضي والري کاپروني په یوه حکم کې امریکايي چارواکو ته لارښوونه کړې، چې تر شنبې ورځې پورې د دغو افغانانو له لېږدولو ډډه وکړي.
د دغه حکم له صادرېدا مخکې د امریکا حکومت محکمې ته ویلي وه، چې د دې هېواد د کډوالۍ او ګمرکونو اداره لږ تر لږه د اوونۍ تر پایه پاکستان یا افغانستان ته د افغان وګړو د لېږدولو لپاره د چارټر یا سوداګریزو الوتنو پلان نهلري.
د محکمې د هغو اسنادو له مخې، چې اسوشیتیډ پرس ترلاسه کړي، د امریکا حکومت پلان درلود، چې د دوشنبې پر ورځ د لويیزیانا ایالت له توقیفخونو څخه یو شمېر افغان کډوال په الوتکو کې پاکستان ته ولېږدوي.
دغه راز د امریکا د استازو جرګې او مشرانو جرګې له ۶۵ ډېرو غړیو د دغه هېواد د بهرنیو چارو وزیر مارکو روبیو او د کورني امنیت وزیر مارکوین مولین ته په یوه لیک کې د زیانمنونکو افغانانو د لېږدولو په اړه خبرداری ورکړی او څرګندوي، چې د دغو کسانو بېرته لېږل ښايي هغوی د شکنجې، څارنې او ان د مرګ له ګواښ سره مخ کړي.
د کډوالو د حقونو مدافع بنسټونو ويلي؛ له ۸۰ ډېرو افغان وګړو وروسته له هغې له بشري حقونو بنسټونو سره اړیکې نیولي، چې د امریکا د کډوالۍ ادارې له پاکستان څخه د احتمالي لېږدولو په اړه خبرتیاوې ورکړې دي. په دغو کسانو کې ښځې، د پولیسو یو افسر، د مذهبي لږکیو غړي او هغه کسان شامل دي، چې د کورنۍ غړیو یې د امریکا په پوځ کې دنده ترسره کړې ده.
د اسلامي امارت غبرګون
پاکستان ته د افغان وګړو د لېږدولو په اړه د راپورونو له خپرېدا وروسته د بهرنیو چارو وزارت د ویاند مرستیال ضیا احمد تکل د حکومت جدي اندېښنه څرګنده کړې ده.
هغه له امریکا غوښتي، چې د افغانستان د وګړو د برخلیک په اړه د پرېکړې پر مهال د هغوی مشروع حقونه او غوښتنې په پام کې ونیسي.
نوموړي ټینګار کړی، چې درېیم هېوادونه باید د یوه هېواد د وګړو د حقونو له په پام کې نیولو پرته د هغوی د برخلیک په اړه پرېکړه ونهکړي.
د لېږدول شویو افغانانو د برخلیک په اړه اندېښنې
د بشري حقونو بنسټونو خبرداری ورکړی، چې افغانستان ته د دغو کسانو بېرته لېږل ښايي هغوی له خپلسرو نیونو، اعدام، په عام محضر کې د دورو وهلو او غچاخیستونکو تاوتریخوالو له ګواښ سره مخ کړي.
د افغان ایواک (AfghanEvac) بنسټ مشر شان ونډایور د محکمې له پرېکړې هرکلی کړی او ویلي یې دي، چې دا پرېکړه یو لنډمهالی فرصت دی، نه د افغانانو د لېږدولو د مخنیوي د هڅو پای.
هغه ټینګار کړی، چې په امریکا کې د نیول شویو افغان وګړو د خوندیتوب لپاره مبارزه به روانه وي.
د امریکا د ټاکنو پایلې؛ یو شمېر جمهوريغوښتونکو د ټرمپ په سیاستونو کې د بدلون غوښتنه وکړه
په افغانستان کې له نیمايي ډېر ماشومان له رسمي زدهکړو بېبرخې دي- ملګري ملتونه
په پنجشېر کې دودیزه زروینځنه پیل شوه
په فلوریډا کې وسلهوال برید؛ یوه ښځه وژل شوې او څلور کسان ټپیان دي
د افغانستان او ایران سوداګریزې خونې د کندهار او خراسان رضوي د اړیکو پر پراختیا ټینګار وکړ
سوریه د حوثیانو پر وړاندې په جګړه کې سعودي عربستان ته خپله پوځي مرسته ارزوي
په مسکو کې پر افغانستان او منځنۍ آسیا امنیتي غونډه جوړېږي
په ایران کې نږدې ۶۰ زره افغان زدهکړیالان زدهکړې کوي
دوغارون افغانستان ته د ایران د ۷۰ سلنې صادراتو اصلي لاره ده
په پېښور کې د یوه ښوونځي د چت د لوېدا له کبله ۲۲ کسان مړه شوي
تحول: په مسکو فرمټ کې د افغانستان د ستونزو پر حل د روسیې ټینګار
څار: د اقلیم بدلون په نړۍ واله غونډه کې د افغانستان دوم ځل ګدون
ډیموکرات عبدال السید د امریکا د مشرانو جرګې لومړنی مسلمان غړی شو
تحول: د افغانستان په اړه د ایران د څلور اړخیزو خبرو کوربهتوب
څار: له فرانسې څخه د بېاسنادو افغانانو ایستل
-
تازه خبرونه4 days agoد داعش غړی اوغور بهادر اسلامآباد هوايي ډګر ته له ننوتلو وروسته په بلوچستان کې روزل شوی و- سرچینې
-
تازه خبرونه2 days agoایران د افغانستان په اړه د څلور اړخیزې غونډې له جوړولو خبر ورکړ
-
نړۍ4 days agoد جرمني د ځوان نسل په تاوتریخجنو لاریونونو کې د فرانکفورټ هټۍ لوټ شوې
-
نړۍ3 days agoټرمپ له کانګرس پرته د حکومتولۍ پر پلان کار کوي- رویټرز
-
تازه خبرونه4 days agoامریکا غواړي یو شمېر افغان کډوال د پاکستان له لارې افغانستان ته ولېږدوي- اسوشیټډ پرس
-
تازه خبرونه2 days agoد امریکا ۶۶ سناتورانو د افغان کډوالو د ایستلو د بهیر د درولو غوښتنه وکړه
-
نړۍ1 day ago
ډیموکرات عبدال السید د امریکا د مشرانو جرګې لومړنی مسلمان غړی شو
-
نړۍ1 day agoډیموکراټان کانګرس ته بریالي شول؛ ټرمپ له سترې سیاسي ماتې سره مخ شو